Eksodusi 32 - Siswati 1996 Bible

Litfole legolide

¹ Batsi kube bantfu babone kutsi Mosi sewutsetse sikhatsi lesidze angasehli entsabeni, babutsana ndzawonye beta ku-Aroni bakhuluma kuye batsi: “Kota, usentele nkulunkulu lotawuhamba embikwetfu, ngobe phela asati kutsi sekwente njani kulendvodza lenguMosi leyasikhipha eveni laseGibhithe.”

² Aroni wakhuluma kubo watsi: “Khumulani lamacici egolide lasetindlebeni tebafati benu, netemadvodzana enu, netemadvodzakati enu, niwaletse lapha kimi.”

³ Ngako bonkhe bantfu bakhipha emacici abo etindlebeni tabo, bawaletsa ku-Aroni.

⁴ Wawatsatsa wawancibilikisa, wase ubumba litfole lelidvuna legolide. Bantfu bamemeta batsi: “Israyeli! Nangu-ke nkulunkulu wakho lowakukhipha eveni laseGibhithe!”

⁵ Watsi kube Aroni akubone loku, wase wakha lilati embikwalelitfole, wamemetela watsi: “Kusasa kutawuba nesibhimbi sekudvumisa Simakadze.”

⁶ Ngakusasa bavuka ekuseni ngeluvivi baletsa iminikelo yekushiswa kanye neminikelo yekuthula. Bantfu bahlala phansi, badla, banatsa, basukuma badlala.

⁷ Simakadze wakhuluma kuMosi watsi: “Ncandzeka wewuke, ngobe labantfu bakho lowabakhipha eveni laseGibhithe sebonakele.

⁸ Sebaphambuke ngekushesha kuloko lengabayala ngako; sebancibilikise igolide benta litfole lelidvuna. Balikhotsamela balikhonta, badzimate batsi: ‘Israyeli! Nangu-ke nkulunkulu wakho lowakukhipha eveni laseGibhithe.’ ”

⁹ Simakadze wachubeka wakhuluma kuMosi watsi: “Sengibabonile labantfu kutsi basive lesinentsamo lelukhuni.

¹⁰ Ngako-ke ase ungiyekele kutsi lulaka lwami lutewubahashula lubabhubhise. Wena-ke ngitakwenta ube sive lesikhulu.”

¹¹ Kodvwa Mosi wancenga Simakadze longuNkulunkulu wakhe watsi: “Hhawu Simakadze, lulaka lwakho lusivutselelani lesive sakho lowasikhipha eveni laseGibhithe ngesandla sakho lesinemandla lamakhulu?

¹² Pho, kudzingeke ngani kutsi emaGibhithe abe asatsi: ‘Wabakhipha ngebucili eGibhithe wabe sewubabulala ngekubacitsa ebusweni bemhlaba baphelela etintsabeni bonkhe’? Mane uluyekele lulaka lwakho loluvutsako, ucole, ungasehliseli imbhubhiso lesive sakho.

¹³ Khumbula Abrahama, na-Isaka, na-Israyeli, tinceku takho, lowafunga kuto ngelibito lakho watetsembisa, watsi: ‘Ngiyawunandzisa, titukulwane tenu tibe ngangetinkhanyeti tesibhakabhaka. Lelive lenginitsembisa lona ngiyawulipha titukulwane tenu, liyawuba ngelabo phakadze naphakadze.’ ”

¹⁴ Ngako Simakadze wagucula umcondvo wakhe, wangabe asababhubhisa bantfu bakhe.

¹⁵ Mosi wancandzeka, wehla entsabeni, etfwele tibhelekeca tematje letimbili letatibhalwe imiyalo ndzawo totimbili ngemuva nangembili.

¹⁶ Letibhelekeca tematje tatibatwe nguNkulunkulu, tabhalwa nguye ngekuticopha ngesandla sakhe.

¹⁷ Joshuwa watsi kube eve bantfu bamemeta, wakhuluma kuMosi watsi: “Kunemsindvo wemphi enkambu.”

¹⁸ Mosi waphendvula watsi: “Loko akufanani nemsindvo wekuncoba nome kukhala kwekwehlulwa, kodvwa ngiva kungumsindvo wekuhlabela.”

¹⁹ Watsi kube Mosi asondzele enkambu, abone lelitfole nebantfu bagidza, watfukutsela wabilelana. Letibhelekeca labetetfwele watilahla phansi, tephukela khona lapho phansi kwentsaba.

²⁰ Watsatsa lelitfole lelase lakhiwe, walishisa ngemlilo, waligaya, lacolisakala laba yimphuphu, walibhuca ngemanti, watsi onkhe ema-Israyeli akalinatse.

²¹ Wakhuluma ku-Aroni watsi: “Labantfu benteni kuwe, uze ubaholele kulesono lesikhulu kangaka?”

²² Aroni waphendvula watsi: “Ungangitfukutseleli, nkhosi yami, nawe uyati kutsi labantfu babutsambele kanjani bubi.

²³ Ngobe bakhulume kimi batsi: ‘Sentele nkulunkulu, lotawuhamba embikwetfu; ngobe asati kutsi sekwente njani kulendvodza lenguMosi leyasikhipha eGibhithe.’

²⁴ Mine ngatsi kubo: ‘Wonkhe lonegolide akayiletse lapha kimi.’ Ngako banginika igolide, ngayifaka emlilweni, kwase kuphuma nali litfole lelidvuna.”

²⁵ Mosi wabona kutsi bantfu sebangumhlambi kazelusile, ngobe Aroni abesabayekelele batentela matsandza, batihlazisa ngisho nasembikwetitsa tabo.

²⁶ Mosi wema esangweni lenkambu wamemeta watsi: “Lowo longakuSimakadze akete lapha kimi.” Onkhe emadvodzana aLevi abutsana ndzawonye eta kuye.

²⁷ Wakhuluma kuwo watsi: “Simakadze longuNkulunkulu wa-Israyeli utsi: ‘Ngulowo nalowo emkhatsini wenu akatsatse inkemba yakhe, angene ngalelisango adzimate ayewuphuma ngale, ahambe abulala bomnakabo, nebangani bakhe, nabomakhelwane bakhe.’ ”

²⁸ EmaLevi enta njengekusho kwaMosi, abulala emadvodza labengaba ti-3 000 ngalelo langa.

²⁹ Mosi wakhuluma kumaLevi watsi: “Lamuhla senitehlukanisele Simakadze ngentsengo yekubulala lowo nalowo indvodzana yakhe nemnakabo. Ngako-ke lamuhla sewunibusisile.”

³⁰ Ngakusasa Mosi wakhuluma kubantfu, watsi: “Nente sono lesikhulu lesesabekako. Kodvwa sengitakwenyuka ngiye kuSimakadze entsabeni; mhlawumbe nginganentela inhlawulo yekubuyisana kuSimakadze ngalokona kwenu.”

³¹ Ngako Mosi wancandzeka wabuyela kuSimakadze, wafike watsi: “Labantfu sebatentele sono lesikhulu lesesabekako. Sebente nkulunkulu ngegolide base bayamkhonta.

³² Kodvwa ngiyakucela umane ubatsetselele; nangabe awubatsetseleli, kuncono nami wesule libito lami encwadzini yakho loyibhalile.”

³³ Simakadze wamphendvula watsi: “Ngulowo lowonile kimi lengiyakwesula libito lakhe encwadzini yami.

³⁴ Hamba-ke uyewuhola labantfu ubayise kulendzawo lengikhulume ngayo kuwe, ingilosi yami itawuhamba embikwakho. Kodvwa siyeta sikhatsi lapho ngitawubajezisa ngenca yekona kwabo.”

³⁵ Ngako Simakadze watfumela sifo kubantfu, ngobe babecindzetele Aroni kutsi ababumbele litfole legolide.