Eksodusi 31 - Siswati 1996 Bible

Lubito lwaBesaleli na-Oholiyabi

¹ Simakadze wakhuluma kuMosi, watsi:

² “Bheka, ngitikhetsele Besaleli, umsa wa-Uri, lotalwa nguHure, wesive sakaJuda;

³ ngamgcwalisa ngaMoya waNkulunkulu. Ngimuphe likhono nekuhlakanipha, nelwati emisebentini yonkhe yebungcweti:

⁴ kutsi akwati kwenta tinhlobonhlobo temihlobiso ngegolide, nesiliva, nelitfusi,

⁵ nekucopha nekufaka ematje laligugu, nekubata lugodvo, nekwenta nome ngabe ngumuphi umsebenti webungcweti.

⁶ Ngetulu kwaloko ngikhetse na-Oholiyabi, umsa wa-Ahisamaki, wesive sakaDani, kutsi asebente naye. Bonkhe laba labanelikhono nabo ngibengetele, khona batewukwati kwenta loku lengikuyale ngako:

⁷ lithende lekuhlangana, nelibhokisi lesivumelwane, nesihlalo semusa, netimphahla tonkhe telithende,

⁸ nelitafula, netimphahla letihambisana nalo, nelutsi lwetibane lolwentiwe ngegolide lecengekile, netimphahla letihambisana nalo, nelilati lemphepho,

⁹ nelilati lemnikelo wekushiswa kanye netimphahla letihambisana nalo, nemgezelo, nesibunu sawo,

¹⁰ netembatfo letihlotjiswe kahle ta-Aroni, umphristi, kanye netemadvodzana akhe tekutsi batembatse nabenta inkonzo yabo yebuphristi,

¹¹ nemafutsa emgcobo, nemphepho lenuka kamnandzi yendzawo lengcwele. Konkhe loku bafanele bakwente njengobe ngikuyalile.”

LiSabatha liluphawu

¹² Simakadze wakhuluma kuMosi, watsi:

¹³ “Khuluma kuma-Israyeli utsi ngitsi: ‘Gcinani emaSabatha ami, loku kuyawuba luphawu emkhatsini wenu nami titukulwane ngetitukulwane, kuze nati kutsi nginguNkulunkulu wenu loningcwelisako.

¹⁴ Kufanele nigcine liSabatha ngobe lingcwele kini; wonkhe umuntfu longaligcini kufanele abulawe. Lowo losebenta ngalelo langa kufanele ancunywe kubantfu bami.

¹⁵ Niyawusebenta emalanga lasitfupha, kodvwa lilanga lesikhombisa liSabatha lekuphumula, lingcwele kuSimakadze; wonkhe umuntfu losebentako ngalo kufanele abulawe.

¹⁶ Ngako-ke ema-Israyeli leliSabatha kufanele aligcine titukulwane ngetitukulwane kube sivumelwane saphakadze naphakadze.

¹⁷ Liluphawu lwaphakadze naphakadze emkhatsini wema-Israyeli nami, kutsi ngemalanga lasitfupha Simakadze wadala lizulu nemhlaba, kwatsi ngelilanga lesikhombisa waphumula emsebentini wakhe.’ ”

¹⁸ Watsi kube Nkulunkulu acedze kukhuluma naMosi eNtsabeni yaseSinayi, wase umnika letibhelekeca letimbili tematje temiyalo, lapho umuno wakhe Nkulunkulu wawubhale khona imiyalo nemitsetfo.