Eksodusi 30 - Siswati 1996 Bible

Lilati lekushisa imphepho

¹ “Ubenta lilati ngemgamba, libe lekushisela imphepho.

² Kufanele libe nemihlubulo lelinganako: libe ngemasentimitha langaba ngema-45 imihlubulo, nemasentimitha langaba ngema-90 kuphakama. Timphondvo temakona alo omane kufanele tibe yintfo yinye nalo.

³ Kufanele uyembese ngegolide lecengekile yomine imihlubulo, ngetulu nangaphansi kanye netimphondvo talo; ulephetse ngegolide ndzawo tonkhe.

⁴ Yenta emajiva egolide ekuletfwala abe mabili, uwashayele ngaphansi kwemphetfo emihlubulweni ngala nangale, lapho nitawufaka khona timboko tekuletfwala.

⁵ Letimboko ubotenta ngemgamba, utembese ngegolide.

⁶ Lelilati ubolibeka embikwendvwangu levimbele libhokisi lesivumelwane lelinesihlalo semusa etikwalo, lapho ngitabohlangana nawe khona.

⁷ “Aroni utaboshisa imphepho lenuka kamnandzi, njalo nje ekuseni nakalungisa letibane.

⁸ Aroni kufanele aphindze akwente loko njalo nje embikwaSimakadze entsambana, nakakhanyisa tibane; lomnikelo wemphepho uyakwentiwa kuSimakadze njalo nje titukulwane ngetitukulwane.

⁹ Ungacali unikele etikwalo ngemphepho lengemukeleki, nome umnikelo wekushiswa nome umnikelo walokutinhlavu, ungacali utsele umnikelo weliwayini etikwalo.

¹⁰ Kanye ngemnyaka Aroni abenta inkonzo yekubuyisana kuSimakadze, ayentele etimphondvweni totine telilati; leyo nkonzo yekuhlawulela tono ngemnikelo wengati, iyakwentiwa njalo nje kanye ngemnyaka. Loko niyawukwenta titukulwane ngetitukulwane. Lelilati kufanele libe ngcwele lehlukaniselwe mine, Simakadze.”

Umtselo welithende laSimakadze

¹¹ Simakadze wakhuluma kuMosi, watsi:

¹² “Nawenta lubalo lwema-Israyeli, ngulowo nalowo kufanele akhiphe inhlawulo yemphilo yakhe ngesikhatsi ubabala, khona angetikwehlelwa sishayo, nasangene elubalweni.

¹³ Ngulowo nalowo muntfu lowewelela kulabo lesebabaliwe kufanele akhiphe imali lekalwe nalejutjwe ngalokusemtsetfweni, lowo mnikelo awukhiphe kimi.

¹⁴ Wonkhe longenile kulolubalo losukela eminyakeni lengema-20 budzala kuye etulu kufanele awukhiphe lomnikelo waSimakadze.

¹⁵ Lonjingile akufanele akhokhiswe ngetulu, nalophuyile akukafaneli akhokhiswe ngaphansi kwalemali, lekuyinhlawulo yetimphilo tenu kuSimakadze.

¹⁶ Lemali leyinhlawulo uboyibutsa kuma-Israyeli, uyisebentise ekuchubeni nasekusekeleni inkonzo yelithende lekuhlangana. Lemali ngeyekuhlenga timphilo tabo, khona mine, Simakadze, ngitabokhumbula kuphephisa sive saka-Israyeli.”

Umgezelo welitfusi

¹⁷ Simakadze wakhuluma kuMosi, watsi:

¹⁸ “Yenta umgezelo welitfusi, kanye netibunu tawo letilitfusi, ube wekugezela. Ubowubeka emkhatsini welithende lekuhlangana nelilati, utsele emanti kuwo.

¹⁹ Aroni nemadvodzana akhe kufanele bageze kuwo tandla netinyawo tabo.

²⁰ Ngaphambi kwekuba bangene ethendeni lekuhlangana nome nabasondzela elatini kutewufeza inkonzo yabo yekushisa umnikelo ngemlilo kuSimakadze, kufanele bageze kulamanti. Nabangakagezi batakufa.

²¹ Kufanele bageze tandla tabo netinyawo tabo, khona bangetikufa. Lona ngumyalo nemtsetfo labatawugcina bona netitukulwane tabo kuze kube phakadze naphakadze.”

Emafutsa langcwele emgcobo

²² Simakadze wakhuluma kuMosi, watsi:

²³ “Tsatsa tinongo leticolisakele, emakhilogremu langaba sitfupha emure lemanti, nemakhilogremu langaba matsatfu esinamoni lenuka kamnandzi, nemakhilogremu langaba matsatfu ekalamu,

²⁴ nemakhilogremu langaba sitfupha ekhasiya; konkhe kukalwe ngesikalo lesisemtsetfweni. Ubengeta emalitha langaba mane emafutsa emncumo,

²⁵ bese wakha ngato emafutsa langcwele emgcobo, lahlanganiswe aba ngemakha, uwente njengengcweti yalomsebenti.

²⁶ Ubowasebentisa ekugcobiseni ngawo lelithende lekuhlangana, nelibhokisi lesivumelwane,

²⁷ nelitafula, netimphahla letihambisana nalelitafula, nelutsi lwetibane, netimphahla letihambisana nalolutsi lwetibane, nelilati lekushisa imphepho,

²⁸ nelilati lekushisa iminikelo, netimphahla letihambisana nalelilati, nemgezelo kanye nesibunu sawo.

²⁹ Tonkhe letimphahla ubotinikela, khona titewuba ngcwele ngalokuphelele; loko lokutitsintsako kutawulinyatwa bungcwele bato.

³⁰ Ubogcoba bo-Aroni nemadvodzana akhe babe ngcwele, khona batewungikhonta njengebaphristi bami.

³¹ Ubokhuluma kuma-Israyeli utsi: ‘Lamafutsa ami langcwele emgcobo niyakuwasebentisa kuto tonkhe titukulwane tenu.

³² Akukafaneli atselwe emitimbeni yebantfu nje, futsi kufanele ningawakhi lamanye ngaletilinganiso talawa; angcwele, futsi nibowatsatsa ngekutsi vele angcwele.

³³ Nangabe kungaba khona lowakha lafana nawo nome awasebentise kulomunye longesiye umphristi, uyawuncunywa esiveni sakubo.’ ”

Imphepho

³⁴ Simakadze wakhuluma kuMosi atsi: “Tsatsa sikalo lesilinganako kuto tonkhe letinongo letimnandzi: sitakathi, ne-onkha, negalibhanume, nemakha lacengekile.

³⁵ Tihlanganise ndzawonye njengengcweti yalomsebenti, utente tibe yimphepho yemakha lanongwe ngeluswayi, khona itawuba ngulehlantekile nalengcwele.

³⁶ Lenye yayo uboyisila icolisakale, bese uyifaka ethendeni lekuhlangana uyifafate embikwelibhokisi lesivumelwane, lapho ngihlangana khona nawe. Lemphepho uboyiphatsa uyente ibe ngcwele.

³⁷ Ningacali nente imphepho ngayo lendlela nangaletilinganiso; kini itawuba ngcwele, inikelwe kuSimakadze.

³⁸ Lowo lowenta emakha lafanana nawo uyawuncunywa esiveni sakubo.”