Eksodusi 29 - Siswati 1996 Bible

Imiyalo mayelana nekugcotjwa kwebaphristi

¹ “Naku lofanele ukwente nawunikela bo-Aroni nemadvodzana akhe kulenkonzo yekuba baphristi: Ubotsatsa inkunzana, netihhanca letimbili letingenasiyela.

² Sebentisa sinkhwa lesite imbiliso, nemipotongwane lete imbiliso lahlanganiswe nemafutsa, kanye nemacebelengwane lagcotjiswe ngemafutsa; konkhe loko kwentiwe ngemphuphu yakolo lecolisakele.

³ Konkhe loko ukufake esitjeni ukunikele kimi kanye nalenkunzana naletihhanca letimbili.

⁴ “Uboletsa bo-Aroni kanye nemadvodzana akhe bete ekungeneni kwelithende lekuhlangana, bese ubageza ngemanti.

⁵ Ubobe sewembatsisa Aroni ngaletembatfo takhe tebuphristi: ingubo lete imikhono, nesidziya, nemjiva longetulu kwesidziya, nesembatfo sesifuba kanye nelibhande.

⁶ Ubomfaka lomshuculo wenhloko, ucoboshele kuwo loluphawu lwebungcwele lolungungcwengcwe lobhalwe kutsi: ‘Kwehlukaniselwe Nkulunkulu’.

⁷ Ubotsatsa lamafutsa emgcobo, uwatsele enhloko yakhe, umgcobe ngawo.

⁸ “Ubobe sewuletsa emadvodzana akhe, uwagcokise letingubo letingenamkhono,

⁹ uwabophe ngemabhande etinkhalweni tawo, uwafake nemishuculo etinhloko. Utamgcoba kanjalo-ke Aroni kanye nemadvodzana akhe. Bona netitukulwane tabo bayawuba baphristi bami phakadze naphakadze.

¹⁰ “Ubobe sewuletsa lenkunzana embikwalelithende lekuhlangana, Aroni nemadvodzana akhe bayawube sebabeka tandla tabo etikwenhloko yayo.

¹¹ Lenkunzana uboyihlabela embikwaSimakadze, ekungeneni kwelithende lekuhlangana.

¹² Ubotsatsa litsantana lalengati ngemuno ulibhoce etimphondvweni telilati; lengati lesele uyitsele esisekelweni selilati.

¹³ Emvakwaloko tsatsa onkhe lamanoni lembese kwangekhatsi, nemanoni lambonye sibindzi, nemanoni lembese tinso totimbili kanye nato, bese ukushisela etikwelilati.

¹⁴ Kodvwa inyama yalenkunzana, nesikhumba sayo, nemswane wayo ukushisele ngephandle kwenkambu, ngobe kungumnikelo wesono.

¹⁵ “Tsatsa lesinye setihhanca, bo-Aroni nemadvodzana akhe babeke tandla tabo etikwalenhloko yaso.

¹⁶ Sihlabe, utsatse ingati yaso uyifafate ndzawo tonkhe kutungeleta lilati.

¹⁷ Usisike ngekusihlahlela sibe ticucu; ugeze kwangekhatsi kwaso kanye nemilente yaso, ukubeke ndzawonye neticucu, nenhloko yaso.

¹⁸ Sonkhe lesihhanca usishisele etikwelilati sibe ngumnikelo wekushiswa kuSimakadze. Lelo liphunga lelinuka lusi lolumnandzi kuSimakadze, umnikelo lowentiwa ngemlilo kuSimakadze.

¹⁹ “Ubotsatsa lesinye setihhanca, bo-Aroni nemadvodzana akhe babeke tandla tabo etikwenhloko yaso.

²⁰ Sihlabe, utsatse litsantana lengati yaso ubhoce lihwandza lendlebe ya-Aroni yangesekudla, uphindze ubhoce emahwandza etindlebe tangesekudla temadvodzana a-Aroni, uphindze ubhoce netitfupha tangesekudla, uphindze ubhoce naboqukulu bangesekudla, lengati letawusala uboyifafata ndzawo tonkhe kutungeleta lilati.

²¹ Ubotsatsa lengati leselatini kanye nemafutsa emgcobo ufafate bo-Aroni nemadvodzana akhe kanye netingubo tabo; ngaloko bo-Aroni nemadvodzana akhe batawube sebanikelwe kimi kanye netingubo tabo.

²² “Kulesihhanca ubosika konkhe lokungemanoni: umsila, nemanoni lasetibilinini, nemanoni lambonye sibindzi, nemanoni lambonye tinso totimbili kanye nato letinso, nemlente wangesekudla; ngobe lesihhanca semgcobo.

²³ Kulesitja lesinetinkhwa letite imbiliso letisembikwaSimakadze, ubotsatsa sinkhwa sibe sinye, nempotongwane munye wesinkhwa lesinemafutsa, nelicebelengwane libe linye.

²⁴ Konkhe lokudla kwetfule etandleni ta-Aroni nasetandleni temadvodzana akhe, bakujikitisele kimi njengemnikelo lojikitiselwe kuSimakadze.

²⁵ Ubobe sewuyakutsatsa kubo ukushisele etikwemnikelo wekushiswa loselatini. Lelo liphunga lelinuka lusi lolumnandzi kuSimakadze, umnikelo lowentiwa ngemlilo kuSimakadze.

²⁶ “Ubotsatsa umganga walesihhanca sekugcotjwa kwa-Aroni uwujikitisele kuSimakadze; kube ngumnikelo wekujikitiswa. Lomganga-ke usabelo sakho.

²⁷ “Kufanele ungehlukanisele umganga lonikelwe ngekujikitiswa, nemlente lonikelwe ngekujikitiswa; yebo, wona lowo mganga nemlente lonikelwe ngekujikitiswa ngesikhatsi kugcotjwa bo-Aroni kanye nemadvodzana akhe.

²⁸ Loko kutawuhlala kusabelo sa-Aroni nemadvodzana akhe ngesimiso saphakadze kuma-Israyeli. Njalo nje nakwentiwa umnikelo wekuthula, umganga nemlente kuyawuba kwebaphristi. Leso-ke sipho sebantfu labasinika mine, Simakadze.

²⁹ “Tembatfo ta-Aroni letingcwele tiyawuba temadvodzana akhe, nasafile; ayawutembatsa nasagcotjiwe.

³⁰ Indvodzana ya-Aroni leyawumlandzela itsatse inkonzo yebuphristi iyawutembatsa emalanga lasikhombisa, nayita kutewukhonta endzaweni lengcwele lesethendeni lekuhlangana.

³¹ “Ubotsatsa lenyama yesihhanca semgcobo wa-Aroni nemadvodzana akhe uyiphekele endzaweni lengcwele.

³² Bo-Aroni nemadvodzana akhe baboyidla kanye nesinkhwa lesisesitjeni, ekungeneni kwelithende lekuhlangana.

³³ Loko bekukwemsimeto wenhlawulo nabagcotjwa, banikelwa, kubodliwa ngibo bodvwana; longesiye umphristi angakudli, ngobe kungcwele.

³⁴ Nakwenteka lenyama yemgcobo, nome sinkhwa kusala kuze kube ngakusasa ekuseni, ubobe sewukushisa ngemlilo loku lokulibhadlela. Akukafaneli kudliwe, ngobe kungcwele.

³⁵ “Lemisimeto yemgcobo uboyenta ku-Aroni nakumadvodzana akhe njengobe ngikuyalile, iyawutsatsa emalanga lasikhombisa.

³⁶ Onkhe emalanga ubonikela ngenkunzi ibe ngumnikelo wetono, khona titawutsetselelwa; ngekwenta njalo utawuhlambulula lilati, uligcobe ngemafutsa ulingcwelise bese uyalinikela.

³⁷ Loku ubokwenta onkhe lamalanga lasikhombisa. Lelilati litawuba ngcwele ngalokuphelele; lowo nome loko lokulitsintsako kutawulinyatwa ngemandla ebungcwele balo.”

Iminikelo yemalanga onkhe

³⁸ “Naku-ke lotawunikela ngako elatini njalo ngemalanga onkhe: Uyawunikela emazinyane etimvu lamabili lanemnyaka munye budzala.

³⁹ Lizinyane lelinye utabolinikela ekuseni, lelinye ulinikele entsambama nakushona lilanga.

⁴⁰ Lelizinyane lelitabonikelwa ekuseni libohambisana nemphuphu yakolo locolisakele leyikhilogremu yinye, lebhicwe nelitha yinye yemafutsa emncumo. Utsele ilitha yinye yeliwayini ibe ngumnikelo wesinatfo.

⁴¹ Niyawunikela leli lelinye lizinyane entsambana kanye nalowo mnikelo walokutinhlavu nemnikelo wawo wesinatfo njengasekuseni. Lelo liphunga lelinuka lusi lolumnandzi kuSimakadze, umnikelo lowentiwa ngemlilo kuSimakadze.

⁴² “Kuyawuhlala kungumnikelo wekushiswa titukulwane ngetitukulwane, wentiwe ekungeneni kwelithende lekuhlangana embikwaSimakadze; kulapho ngitabohlangana khona nebantfu bami, ngikhulume kuwe.

⁴³ Ngitabohlangana lapho nema-Israyeli; lendzawo bese ingcweliswa yinkhatimulo yami.

⁴⁴ “Lelithende lekuhlangana nelilati ngitawukungcwelisa; bo-Aroni nemadvodzana akhe ngitabehlukanisela inkonzo yekuba baphristi.

⁴⁵ Ngitawuhlala emkhatsini wema-Israyeli, ngibe nguNkulunkulu wabo.

⁴⁶ Bayawukwati kutsi nginguSimakadze longuNkulunkulu wabo, lowabakhipha eveni laseGibhithe, ngentela kuhlala emkhatsini wabo. NginguSimakadze longuNkulunkulu wabo.”