Eksodusi 28 - Siswati 1996 Bible

Tembatfo tebaphristi

¹ “Ubobe sewubita umnakenu, Aroni, kanye nemadvodzana akhe boNadabi, na-Abihu, naEleyazare, na-Ithamari, ubehlukanise nema-Israyeli, ngobe ngifuna babe baphristi bekungikhonta.

² Ubotfungela umnakenu, Aroni, tembatfo letingcwele tebuphristi; ngito letitamnika sitfunti nekuhlonipheka.

³ Tjela bonkhe bantfu labanelikhono lekutfunga, lengibaphe kuhlakanipha, kutsi bafanele bentele Aroni tembatfo tebuphristi kuze angikhonte njengemphristi.

⁴ Tembatfo lekumele batente ngunati: sembatfo sesifuba, sidziya, nemjiva, nengubo lete umkhono lehlotjisiwe, nemshuculo wenhloko, nelucotfo. Letembatfo letingcwele batawutentela umnakenu Aroni kanye nemadvodzana akhe, kuze bangikhonte njengebaphristi.

⁵ Letingcweti tibosebentisa imitiya yelineni leyephotselwe ngalokucolisakele, nensontfo leluhlata njengesibhakabhaka, nalebukhwebeletane, nalebovu ngalokutopele, nemicwana yegolide.

⁶ “Kufanele bente sidziya ngensontfo leluhlata njengesibhakabhaka, nalebukhwebeletane, nalebovu ngalokutopele, naleyigolide kanye nangemtiya welineni lecolisakele.

⁷ Lesidziya sitawuba nemichilo lemibili ngala nangale yekusibophela nekusihlanganisa emahlombe.

⁸ Nalelibhande lelelukiwe leliselukhalweni kufanele libe yintfo yinye nalesidziya, lentiwe ngemicwana yegolide, nangensontfo lebukhwebeletane, naleluhlata njengesibhakabhaka, nalebovu ngalokutopele kanye nangemitiya yelineni leyephotselwe ngalokucolisakele.

⁹ Ubotsatsa ematje lamabili e-oniksi, uwabhale ngekucopha emabito emadvodzana a-Israyeli lali-12,

¹⁰ ngekwelamana kwawo, lasitfupha kulelitje lelinganhlanye, nalasitfupha kulelitje lelinganhlanye.

¹¹ Funa umuntfu lonelikhono lekubhala ngekucopha lamatje lamabili, acophe emabito emadvodzana aka-Israyeli; lamatje abowahlobisa ngegolide lapha emaphetselweni.

¹² Lamatje ubowafaka kulemichilo lebophela lesidziya emahlombe. Aroni utabowagaca emahlombe lamabito emadvodzana aka-Israyeli njalo nje naketa kimi, kuze kube sikhumbuto.

¹³ Ubenta imiphetfo yegolide ibe mibili,

¹⁴ nemigaco yegolide lecengekile lephotsene njengentsambo leyelukiwe, bese uyibophela emiphetfweni.”

Sembatfo sesifuba

¹⁵ “Ubenta sembatfo sesifuba ngebungcweti lobukhulu, sibe ngesekwehlulela kwemPhristi Lomkhulu; njengesidziya sibe nalokuyigolide, nalokubukhwebeletane, nalokuluhlata njengesibhakabhaka, nalokubovu ngalokutopele kanye nemitiya yelineni lecolisakele.

¹⁶ Kufanele siphindvwe kabili, khona sitewuba sikhwama lesilingene ndzawo tonkhe, budze baso bube ngemasentimitha langaba ngema-22, nebubanti lobungemasentimitha langaba ngema-22.

¹⁷ Unamatsisele kuso imigca lemine yematje laligugu; emgceni wekucala unamatsisele isadiyusi, nethophazi, nerubhi;

¹⁸ emgceni wesibili unamatsisele simaragidu, nesafire, nedayimani;

¹⁹ emgceni wesitsatfu unamatsisele ihiyakinte, ne-agathe, ne-amethiste;

²⁰ emgceni wesine unamatsisele ikhrisolithe, ne-oniksi, nejasiphi. Lamatje kufanele ephetfwe ngegolide.

²¹ Kufanele kube nematje lali-12, ngulelo nalelo litje libe nelibito lendvodzana ya-Israyeli; ngulelo nalelo litje libekwe luphawu ngekusikwa kwelibito lesive setive letili-12 taka-Israyeli.

²² Lesembatfo sesifuba kufanele usentele imigaco yegolide lecengekile lephotsene njengentsambo leyelukiwe.

²³ Lesembatfo sesifuba kufanele usentele emajiva lamabili egolide, uwacoboshele kulamakona lamabili langetulu.

²⁴ Uyawubophela lemigaco lemibili yegolide kulamajiva lamabili lasemakoneni alesembatfo sesifuba.

²⁵ Letinye tihloko talemigaco kufanele utibophele kulemiphetfo lemibili, ngalendlela titawuba ngembili emichilweni yemahlombe yalesidziya.

²⁶ Ubenta emajiva lamabili egolide uwatfungele kulamakona lamabili langentansi ngaphansi kulesembatfo sesifuba, ngekhatsi macondzana nesidziya.

²⁷ Wente lamanye emajiva lamabili egolide uwatfungele ngaphansi kulemichilo lemibili yesidziya ngembili kwaso, eceleni kwemtfungo, ngetulu kwalelibhande lelelukwe kahle.

²⁸ Bopha lamajiva lasesembatfweni sesifuba uwahlanganise nalamajiva esidziya ngentsambo leluhlata njengesibhakabhaka. Loko kutakwenta sembatfo sesifuba sibe ngetulu kwelibhande singaceki.

²⁹ “Ngesikhatsi Aroni angena endzaweni lengcwele utabokwembatsa lesembatfo sesifuba lesinemabito emadvodzana aka-Israyeli, khona atawubokhumbuleka njalo nje kuSimakadze.

³⁰ Kulesembatfo sesifuba sekwehlulela ubofaka i-Urimu neThumimu, kubesetikwenhlitiyo ya-Aroni sonkhe sikhatsi nangena ebukhoneni baNkulunkulu. Kanjalo-ke Aroni uyawuphatsa letehlulelo tema-Israyeli etikwenhlitiyo yakhe nasembikwaNkulunkulu.”

Letinye tembatfo tebuphristi

³¹ “Umjiva wonkhe longetulu kwalesidziya kufanele wentiwe ngendvwangu leluhlata njengesibhakabhaka.

³² Lomjiva kufanele ube nembobo yekufaka inhloko; lembobo kufanele yephetfwe ngekugocotwa, bese iyatfungwa khona ingetiwudzabuka.

³³ Emphetfweni wawo ngaphansi kufanele uwuhlobise ngemahananandza entiwe ngensontfo leluhlata njengesibhakabhaka, nalebukhwebeletane, nalebovu ngalokutopele atungelete lomphetfo, kube netinsimbi tegolide emkhatsini wawo.

³⁴ Kufanele kube nelihananandza lilandzelwe yinsimbi yegolide wonkhe umphetfo wemjiva.

³⁵ “Aroni kufanele embatse lomjiva njalo nje nakakhonta njengemphristi, nangena endzaweni lengcwele eme embikwaSimakadze nome aphuma, letinsimbi titabovakala tikhala, khona angetikufa.

³⁶ “Yenta ngcwengcwe wegolide lecengekile bese ubhala ngekucopha nankha emagama: ‘Kwehlukaniselwe Nkulunkulu’.

³⁷ Longcwengcwe ubombophela ngembili kulomshuculo wenhloko ngentsambo leluhlata njengesibhakabhaka.

³⁸ Aroni kufanele akufake ebuntini lakhe, khona atekutsatsa onkhe emaphutsa esive sema-Israyeli lababe nawo, khona iminikelo yabo itekwamukeleka, nome ngabe bebonile ekunikeleni ngayo.

³⁹ “Ingubo ya-Aroni lengenamkhono uboyitfunga ngendvwangu yelineni lecolisakele, nalomshuculo wenhloko uwente ngendvwangu yelineni lecolisakele kanye nelibhande lekufanele lihlotjiswe.

⁴⁰ “Ubenta tingubo letingenamkhono nemabhande, nemishuculo yenhloko, wentele emadvodzana a-Aroni, khona atewuba nesitfunti ahlonipheke.

⁴¹ Letimphahla ubotembatsisa umnakenu Aroni nemadvodzana akhe. Ubobagcoba ngemafutsa emncumo, ungehlukanisele bona babe ngcwele bangene esigabeni sekungikhonta njengebaphristi.

⁴² “Kufanele ubentele imibekelo yelineni kusukela elukhalweni kuze kufike ematsangeni, khona batewufihla bungcunu babo.

⁴³ Aroni nemadvodzana akhe kufanele batifake njalo nje nabaya ethendeni lekuhlangana nome beta kutekungikhonta elatini endzaweni lengcwele, khona bangetiwubulawa ngenca yekona ngebungcunu babo. “Lona-ke ngumyalo wa-Aroni netitukulwane takhe kuze kube phakadze naphakadze.”