Eksodusi 27 - Siswati 1996 Bible

Lilati leminikelo yekushiswa

¹ “Ubenta lilati ngemgamba, libe nemihlubulo lelinganako: budze balo libe ngemamitha langaba mabili nemasentimitha langema-20, bubanti libe ngemamitha langaba mabili nemasentimitha langema-20, nekuphakama libe ngulelingaba yimitha nemasentimitha langema-30.

² Lamakona lamane ubowenta abe netimphondvo lapha ngetulu, tihlangane tibe yintfo yinye nelilati, konkhe loku ubokwembesa ngelitfusi.

³ Ubolentela emabhodo ekucitsa umlotsa, ulentele nemafosholo, nemigezelo, netindishi, netintsi tekuhloma inyama, nemakesi; tonkhe letitja ubotenta ngelitfusi.

⁴ Ubolentela umhlobiso welitfusi losasisefo, etikwawo ubokwenta emajiva lamane elitfusi emakoneni awo omane.

⁵ Ubowuvunulisa ngaphansi kwalomtsandvo welilati loselukhalweni lwelilati.

⁶ Lelilati ubolentela timboko ngemgamba, uyembese ngelitfusi.

⁷ Uyawutifaka emajiveni ngala nangala kwelilati njalo nje naletfwalwako.

⁸ Lelilati ubolenta ngemapulango libe nemhubhe, ulakhe ngaleyo ndlela lengakukhombisa yona entsabeni.”

Sibuya selithende laSimakadze

⁹ “Lelithende lekukhontela ubolibiyela ngesibuya; lesibuya ubosakha ngetindvwangu telineni lecolisakele. Ngaseningizimu lesibuya kufanele sibe nebudze lobungemamitha langaba ngema-46,

¹⁰ sibe netinsika letingema-20 letimiswe emasekweni elitfusi langema-20, letinsika tibe nemahhuka nemigcala yesiliva.

¹¹ Kufanele kwentiwe njalo futsi nangasemhlubulweni longasenyakatfo; lesibuya sibe nebudze lobungemamitha langaba ngema-46, letindvwangu tesibuya kufanele tilengiswe etinsikeni letingema-20 letimiswe emasekweni elitfusi langema-20. Letinsika tibe nemahhuka nemigcala yesiliva.

¹² Ngasenshonalanga kufanele kube nesibuya setindvwangu lesingemamitha langaba ngema-23 budze, letinsika tisinyiswe emasekweni lalishumi.

¹³ Bubanti balesibuya ngembili kwaso, ngasemphumalanga, kufanele bube ngemamitha langaba ngema-23.

¹⁴ Kulenga kwato letindvwangu ngala kwemnyango kufanele kube ngemamitha langaba sitfupha nemasentimitha langema-60 bubanti, tihhukwe etinsikeni letintsatfu letisinyiswe emasekweni lamatsatfu.

¹⁵ Nangale kwemnyango kufanele kulenge tindvwangu letingemamitha langaba sitfupha nemasentimitha langema-60 bubanti, tihhukwe etinsikeni letintsatfu letisinyiswe emasekweni lamatsatfu.

¹⁶ Lomnyango wesibuya kufanele ube nesivalo lesentiwe ngendvwangu yelineni lecolisakele lehlotjiswe nangensontfo leluhlata njengesibhakabhaka, nalebukhwebeletane, nalebovu ngalokutopele; kube ngumsebenti wengcweti yetekuhlobisa, bubanti balendvwangu bube ngemamitha langaba yimfica. Kufanele ihhukwe etinsikeni letine letisinyiswe emasekweni lamane.

¹⁷ Tonkhe tinsika letitungelete lesibuya kufanele tibe nemigcala yesiliva nemahhuka esiliva, emaseko ato entiwe ngelitfusi.

¹⁸ Lesibuya kufanele sibe nebudze lobungemamitha langaba ngema-46, nebubanti lobungemamitha langaba ngema-23, nekuphakama kwetindvwangu lokungemamitha langaba mabili nemasentimitha langema-20. Letindvwangu kufanele tentiwe ngemitiya yelineni leyephotselwe yacolisakala, emaseko ato letinsika entiwe ngelitfusi.

¹⁹ Tonkhe timphahla letitawusetjentiswa kulelithende ekukhonteni ngisho netiphunti talelithende kanye netesibuya kufanele kwentiwe ngelitfusi.”

Kunakekelwa kwetibane

²⁰ “Uyale ema-Israyeli kutsi akakuletsele emafutsa lacengekile ekukhanyisa tibane lentiwe ngemncumo. Letibane kufanele tihlale tikhanya.

²¹ Aroni nemadvodzana akhe kufanele balinakekele lelithende lekuhlangana ngekulikhanyisa kusukela kusihlwa kuze kube ngusekuseni; lolutsi lwetibane kufanele lubekwe ngaphandle kwendvwangu lesembikwelibhokisi lesivumelwane, lapho ngikhona khona. Lomtsetfo kufanele wentiwe ngema-Israyeli titukulwane ngetitukulwane.”