Eksodusi 24 - Siswati 1996 Bible

Sivumelwane sibekwa luphawu

¹ Simakadze wakhuluma kuMosi, watsi: “Yenyuka, ukhuphukele kuSimakadze, wena, na-Aroni, naNadabi, na-Abihu kanye nebaholi bema-Israyeli labangema-70 nikhotsame nikhonte nisesekhashane.

² Wena-ke Mosi, ubosondzela kuSimakadze, kodvwa laba labanye bangacali basondzele kimi. Bantfu kufanele bangenyuki nawe.”

³ Mosi wahamba wafike wabatjela yonkhe imiyalo nemitsetfo yaSimakadze. Bonkhe bantfu baphendvula kanyekanye batsi: “Onkhe emavi lawakhulumile Simakadze siyakuwenta.”

⁴ Mosi wawabhala phansi onkhe emavi aSimakadze. Wavuka ekuseni ngeluvivi wakha lilati phansi kwentsaba, ngematje lali-12, labemele tive tema-Israyeli.

⁵ Watfuma emajaha etive tema-Israyeli, anikela iminikelo yekushiswa, ngemihlatjelo ngetinkunzana taba ngiminikelo yekuthula kuSimakadze.

⁶ Mosi watsatsa incenye yalengati wayifaka emigezelweni, lenye yayo wayinyenyeta etikwelilati.

⁷ Wase utsatsa incwadzi yesivumelwane, wayifundza, bonkhe bantfu balalela, bakhuluma batsi: “Konkhe lokushiwo nguSimakadze siyawukwenta sikulalele.”

⁸ Mosi wase utsatsa lengati leyayisemigezelweni wanyenyeta ngayo labantfu, akhuluma atsi: “Lena yingati yesivumelwane Simakadze lasente nani macondzana nalamavi.”

⁹ Mosi na-Aroni, naNadabi, na-Abihu kanye nebaholi bema-Israyeli lababengema-70 benyuka baya entsabeni,

¹⁰ bafike babona Nkulunkulu wema-Israyeli. Ngaphansi kwetinyawo takhe kwabonakala lokwakufanana nendlela yelitje lesafire lelalingumbala loluhlata njengesibhakabhaka.

¹¹ Nkulunkulu akazange abatsintse, baholi besive sema-Israyeli; babona Nkulunkulu. Banatsa, badla ndzawonye.

Mosi eNtsabeni iSinayi

¹² Simakadze wakhuluma kuMosi, watsi: “Yenyuka ukhuphukele kimi entsabeni uhlale khona; ngitakunika tibhelekeca tematje letinemiyalo lengiyibhalele kutsi ibe ngimiyalo yebantfu.”

¹³ Mosi kanye nemsiti wakhe labenguJoshuwa batilungiselela; benyuka baya eNtsabeni yaNkulunkulu.

¹⁴ Mosi wakhuluma kulabaholi, watsi: “Ase nisimele la, size sibuye futsi. Aroni naHure batawusala nani. Nakukhona lonesikhalo, akaye kubo.”

¹⁵ Mosi wenyuka intsaba iSinayi, lifu layisibekela yonkhe intsaba.

¹⁶ Inkhatimulo yaSimakadze yahlala etikweNtsaba iSinayi, lifu layembesa kwaze kwaphela emalanga lasitfupha; kwatsi ngelilanga lesikhombisa Simakadze wamemeta Mosi asekhatsi efini.

¹⁷ Ema-Israyeli lenkhatimulo yaSimakadze leyayembese leNtsaba ayibona ayifanisa nemlilo locotfulako.

¹⁸ Mosi wangena kulelifu, wenyuka waya entsabeni. Wahlala lapho emalanga langema-40 kanye nebusuku bawo.