Eksodusi 18 - Siswati 1996 Bible

Jethro uvakashela Mosi

¹ Jethro, uyisetala waMosi, labengumphristi wakaMidiyani, weva ngako konkhe Nkulunkulu labekwentele Mosi kanye nesive sakhe ema-Israyeli, kutsi Simakadze wabakhipha kanjani eGibhithe.

² Weta kuMosi ahamba naSiphora, umkaMosi, labesambuyisele ekhaya kuyise

³ nemadvodzana akhe Mosi lamabili. Lenye Mosi wayetsa libito watsi nguGeshomu, atsi: “Ngisihambi eveni lengingalati.”

⁴ Lenye wayetsa libito watsi ngu-Eliyezeri atsi: “Nkulunkulu wabobabe ube lusito lwami wangiphephisa kutsi Faro angangibulali.”

⁵ Jethro weta nemkaMosi nemadvodzana akhe lamabili lapho Mosi abemise khona entsabeni yaNkulunkulu lesehlane.

⁶ Jethro abesalitfumele livi kuMosi kutsi uta nemkakhe nebantfwabakhe.

⁷ Ngako Mosi waphuma wayakumhlangabeta, wafike wamkhotsamela, wamanga. Babutana imphilo, base bangena ethendeni laMosi.

⁸ Mosi walandzisa uyisetala ngako konkhe Simakadze lakwenta kuFaro nemaGibhithe kuze akhulule sive sema-Israyeli. Wamlandzisa nangebumatima labahlangabetana nabo endleleni, nekutsi Simakadze wabasindzisa kanjani kubo.

⁹ Jethro wajabula kakhulu nasalandziswe ngako konkhe lokuhle ema-Israyeli labekwentelwe nguSimakadze, nekuwakhulula kwakhe esandleni semaGibhithe.

¹⁰ Watsi: “Akadvunyiswe Simakadze lonikhulule esandleni semaGibhithe naFaro, nalophephise sive sakhe ekugcilatweni ngemaGibhithe!

¹¹ Nyalo-ke sengiyati kutsi Simakadze mkhulu kunabo bonkhe labanye bonkulunkulu, ngobe ema-Israyeli uwakhulule ekugcilatweni ngesihluku ngemaGibhithe.”

¹² Jethro, uyisetala waMosi, waletsa umnikelo wekushiswa naleminye imihlatjelo yekunikelwa kuNkulunkulu. Aroni wahamba kanye nebaholi bema-Israyeli; bakhonta ngekudla kudla lokungcwele kanye naJethro, uyisetala waMosi, embikwaNkulunkulu.

Kubekwa kwebehluleli

¹³ Ngakusasa Mosi wahlala esihlalweni sekwehlulela bantfu, alamula lababecabene nalababenemibango. Bantfu babema tindvwendvwe kusukela ekuseni kuze kushone lilanga.

¹⁴ Watsi kube Jethro abone konkhe Mosi labekwentela bantfu, wakhuluma kuye watsi: “Yini lena lobentela yona labantfu? Utibulalelani ngekwenta lomsebenti wedvwana, nebantfu beme la kusukela ekuseni kuze kushone lilanga seloku bamele kusitwa nguwe.”

¹⁵ Mosi wamphendvula watsi: “Kufanele ngikwente loku, ngobe bantfu beta kimi batewufuna intsandvo yaNkulunkulu.

¹⁶ Nangabe kukhona labacabene ngako, bantfu beta kimi, bese-ke mine ngiyabalamula; ngibatjele imitsetfo nemiyalo yaNkulunkulu.”

¹⁷ Uyisetala waphendvula watsi: “Ayikalungi lendlela losebenta ngayo.

¹⁸ Wena nalabantfu nitibulala ngemsebenti; ngobe lomsebenti lowentako mkhulu kakhulu kunawe kutsi ungawenta wedvwana.

¹⁹ Tsatsa nali livi leseluleko sami, Nkulunkulu utawuba nawe. Kufanele wena ube lincusa lebantfu kuNkulunkulu, emacala abo uwaletse kuye.

²⁰ Bafundzise imiyalo nemitsetfo yaNkulunkulu, ubachazele kutsi kufanele baphile njani batiphatse njani.

²¹ Ngetulu kwaloko khetsa emadvodza lafanele, naletsembekile, lesaba Nkulunkulu, nalengatsengeki, uwabeke abe baholi: betinkhulungwane, nebemakhulu, nebema-50, nebemashumi.

²² Akube ngawo lafanele kuba behluleli ngato tonkhe tikhatsi. Tindzaba nemacala lamatima bangawaletsa kuwe, kodvwa wona afanele atijubele emacala abo lamancane. Ngako ngalendlela utakwetfwala kamalula, lamadvodza etfwalisane nawe.

²³ Nawenta loku, njengobe Nkulunkulu akuyala, ungeke wetfwale kamatima, nebantfu labete la batawubuyela ngekushesha emakhaya abo, emacala abo asakhulunyiwe nabo benelisekile.”

²⁴ Mosi wawutsatsa njengobe unjalo lomyalo weyisetala.

²⁵ Wakhetsa emadvodza lafanele emkhatsini wesive sonkhe sema-Israyeli. Wawabeka aba baholi betinkhulungwane, nebemakhulu, nebema-50, nebemashumi.

²⁶ Behlulela tindzaba tebantfu ngato tonkhe tikhatsi: Emacala lamatima bawaletsa kuMosi, kodvwa lamancane ancunywe ngibo.

²⁷ Mosi wavalelisa uyisetala; Jethro wahamba wabuyela eveni lakubo.