Eksodusi 14 - Siswati 1996 Bible

Kwewelwa Lwandle Lolubovu

¹ Simakadze wakhuluma kuMosi, watsi:

² “Tjela ema-Israyeli kutsi akancandzeke ayekumisa embikwePhi Hahirothi emkhatsini weMigdoli neLwandle Lolubovu. Afanele emise eceleni kwelwandle abhekane ngco naBhali Sefoni.

³ Faro utawucabanga kutsi sive sema-Israyeli sesididekile, sivinjetelwe lihlane.

⁴ Ngitakwenta inhlitiyo yaFaro ibe lukhuni, bese uyanicosha, kodvwa ngiyawutentela ludvumo, ngincobe Faro nemabutfo akhe. EmaGibhithe ayawuhlala ati kutsi mine nginguSimakadze.” Ema-Israyeli enta njalo.

⁵ Kwatsi Faro, inkhosi yaseGibhithe, nabikelwa kutsi ema-Israyeli asahambile, Faro netiphatsimandla takhe bagucula umcondvo wabo. Batsi: “Hawu, yini lena lesesiyentile? Sesiyekele ema-Israyeli ahamba! Sesilahlekelwe tigcili!”

⁶ Faro walungisa incola yakhe yemphi kanye nemabutfo akhe.

⁷ Watsatsa tincola temphi telikhetselo letatingema-600 nato tonkhe letinye tincola temphi taseGibhithe, kwaba nguleyo naleyo yabekelwa tindvuna.

⁸ Simakadze wenta inhlitiyo yaFaro yaba lukhuni. Faro waphuma nemphi yakhe wacosha ema-Israyeli labesaphumile ahamba ngesibindzi.

⁹ Emabutfo emaGibhithe labenemahhashi, netincola temphi, nebagibeli bato acosha ema-Israyeli, awakhandzanisa lapho abemise khona ngaseLwandle Lolubovu eceleni kwePhi Hahirothi embikweBhali Sefoni.

¹⁰ Ema-Israyeli atsi ayabuka abona Faro etile nemphi yakhe asondzela, ase efikelwa kwesaba lokukhulu. Atikhalela kuSimakadze.

¹¹ Atsi kuMosi: “Kungobe bekute yini emathuna lena eGibhithe lokutsi uze usikhiphe usiletse sitewufela lapha ehlane? Yini lena losentele yona? Usikhipheleni le eGibhithe?

¹² Asizange sikutjele yini siseseGibhithe satsi: ‘Hlukana natsi, usiyekele sigcilatwe ngemaGibhithe lokungenani’? Bekuyawuba ncono kube mane wasiyekela sagcilatwa ngemaGibhithe kunekutsi sitewufela lapha ehlane.”

¹³ Mosi wabaphendvula watsi: “Ningesabi, manini sibindzi, nicine, nitawubona kusindzisa kwaSimakadze latanentela kona lamuhla. LamaGibhithe leniwabonako lamuhla aniseyiwuphindze niwabone futsi.

¹⁴ Simakadze utanilwela; nine thulani nje.”

¹⁵ Simakadze wakhuluma kuMosi, watsi: “Ukhalelani kimi? Tjela ema-Israyeli kutsi akachubekele embili.

¹⁶ Phakamisa indvuku yakho uyengamise etikwelwandle. Emanti atakwehlukana ekhatsi, kuze sive sema-Israyeli sewele lwandle sihamba emhlabatsini lowomile.

¹⁷ Tinhlitiyo temaGibhithe ngitente taba lukhuni kangangekutsi atanilandzela, kodvwa ngitatentela ludvumo ngekuncoba Faro, nemabutfo akhe, lanemahhashi netincola temphi.

¹⁸ EmaGibhithe ayawungati kutsi mine nginguSimakadze, nase ngiwancobile ngisho naFaro nemphi yakhe, netincola takhe temphi nebagibeli bemahhashi akhe imbala.”

¹⁹ Ingilosi yaNkulunkulu leyayihamba embikwesive sema-Israyeli yakhwesha nyova, yema ngemuva kwaso; nayo lensika yelifu yesuka embikwabo yema emvakwabo,

²⁰ yabasemkhatsini wesive saseGibhithe nesive sema-Israyeli. Lelifu laba bumnyama esiveni saseGibhithe, kodvwa laba kukhanya esiveni sema-Israyeli ngabo bonkhe lobo busuku. Sive semaGibhithe nesive sema-Israyeli atizange tihlangane.

²¹ Mosi welula sandla sakhe wasengamisa etikwelwandle, Simakadze wakhweshisa emanti elwandle ngemoya lonemandla wasemphumalanga lowahhusha busuku bonkhe. Wenta lwandle lwaba ngumhlabatsi lowomile; emanti ehlukana ekhatsi.

²² Sive sema-Israyeli sewela Lwandle Lolubovu sihamba emhlabatsini lowomile, emanti aba tindvonga ngesekudla nangesancele sabo.

²³ EmaGibhithe acosha ema-Israyeli awalandzela, angena ekhatsi nelwandle ngemahhashi awo onkhe, netincola tawo temphi kanye nebashayeli bato.

²⁴ Kwatsi kuseluvivi, Simakadze wabuka phansi asensikeni yemlilo neyelifu abuka imphi yemaGibhithe, emabutfo aseGibhithe wawasanganisa.

²⁵ Wenta kutsi emasondvo etincola temphi abhajwe adzimate ahamba matima. EmaGibhithe atsi: “Asibaleke sisuke la kuma-Israyeli, ngobe Simakadze uyawalwela.”

²⁶ Simakadze wakhuluma kuMosi, watsi: “Yelula sandla sakho usengamise etikwelwandle, khona lamanti atewukwehlela atseleke etikwemaGibhithe, nasetikwetincola tawo temphi kanye nasetikwebagibeli bawo bemahhashi.”

²⁷ Ngako Mosi welula sandla sakhe wasengamisa etikwelwandle, emanti abuyela endzaweni yawo nakudzabuka kusa; emaGibhithe atsi ayabaleka emanti awakhukhula. Simakadze wawatsintsitsela ekujuleni kwelwandle onkhe emaGibhithe.

²⁸ Emanti abuya ambonya tincola temphi, nebagibeli bemahhashi, nawo onkhe emabutfo aFaro labecosha ema-Israyeli. Kute nome munye lowasindza.

²⁹ Kodvwa ema-Israyeli wona abewele emhlabatsini lowomile elwandle, futsi nemanti ajinge achubeka kuma tindvonga ngesekudla nangesancele.

³⁰ Kungalelo langa-ke lapho Simakadze asindzisa ema-Israyeli esandleni semaGibhithe. Ema-Israyeli abona tidvumbu temaGibhithe elugwini lwelwandle.

³¹ Atsi ema-Israyeli nabona emandla lamakhulu Simakadze labewakhombise ngekubhubhisa emaGibhithe, acalela phansi kwesaba Simakadze nekubeka litsemba lawo kuye nakuMosi, inceku yakhe.