Eksodusi 1 - Siswati 1996 Bible

Kwandza kwema-Israyeli eGibhithe

¹ Nankha-ke emabito emadvodzana aka-Israyeli laya eGibhithe ahamba neyise Jakobe, nguleyo naleyo ndvodzana beyihamba nemndeni wakayo:

² bekuboRubeni, naSimeyoni, naLevi, naJuda,

³ na-Isakhari, naZebuloni, naBhenjamini,

⁴ naDani, naNaftali, naGadi, na-Asheri.

⁵ Sewuwonkhe umndeni wakaJakobe wawubantfu lababengema-70. Phela Josefa abesavele aseGibhithe.

⁶ Ngekuhamba kwesikhatsi boJosefa, nabomnakabo, nalo lonkhe lelo butfo labo, lafa laphela.

⁷ Kodvwa titukulwane tabo, ema-Israyeli, tatalana, tandza, taba nemandla kakhulu, kangangobe live laseGibhithe lase ligcwele tona.

Kugcilatwa kwema-Israyeli

⁸ Kwase kubekwa inkhosi lensha eGibhithe, leyayingati lutfo ngaJosefa.

⁹ Yacaphelisa bantfu bayo, yatsi: “Bukani la, lama-Israyeli asandza kakhulu lapha eveni letfu, kantsi futsi anemandla kakhulu kunatsi, asayingoti kitsi.

¹⁰ Ase siwabuke ngalamanye emehlo, sente lisu, funa andze kakhulu, ngobe nakungesuka imphi, angahle asite letitsa tetfu, bese ayabaleka kulelive.”

¹¹ Ngako-ke emaGibhithe agcilata ema-Israyeli ngekuwabekela tindvuna letatiwashayela njengetinkhabi, tiwahlupha ngekuwetfwesa imitfwalo lematima. Ema-Israyeli akhela boFaro iPhithomu neRamsesi lekwakutingungumadolobha.

¹² Kodvwa kuwahlupha nekuwacindzetela lama-Israyeli kwawenta andza kakhulu, andza nalo lonkhe live. EmaGibhithe acala kuwesaba ema-Israyeli.

¹³ Ngako-ke emaGibhithe asebentisa sive sema-Israyeli ngesihluku;

¹⁴ imphilo yawo ayenta yababa ngekuwagcilata kamatima: awabhucisa ludzaka, awafolomisa netitini, awentisa yonkhe inhlobo yemisebenti yasemasimini. Kuko konkhe labekwenta emaGibhithe asebentisa ema-Israyeli kamatima.

¹⁵ Inkhosi yaseGibhithe yakhuluma kuboShifra naPhuwa, labo bekubabelekisi bebafati bemaHebheru, yatsi:

¹⁶ “Nanibelekisa bafati bemaHebheru, kubotsi luswane nalungumfana nilubulale, kodvwa naluyintfombatane ningalubulali.”

¹⁷ Kodvwa babelekisi besaba Nkulunkulu, ngako abazange bawente lomyalo wenkhosi, babengatibulali letinswane letibafana.

¹⁸ Ngako-ke inkhosi yababita lababelekisi, yababuta yatsi: “Nikwentelani loku? Anitibulali ngani letinswane letibafana?”

¹⁹ Babelekisi bayiphendvula inkhosi batsi: “Bafati bemaHebheru abafanani nebafati bemaGibhithe. Bafati bemaHebheru banemandla, babeleka masinyane umbelekisi asengakefiki.”

²⁰ Ngako-ke Nkulunkulu waba nemusa kulababelekisi. Ema-Israyeli andza kakhulu, adlanga kuba nemandla.

²¹ Njengobe lababelekisi bamesaba Nkulunkulu, yena wabapha imiti.

²² Ngako-ke Faro wayala bonkhe bantfu bakhe, watsi: “Lonkhe luswane lwemHebheru lolungumfana lubotsi nalutalwa nilugcumukisele emfuleni iNayili, kodvwa luswane loluyintfombatane niboluyekela luphile.”