Dutheronomi 14 - Siswati 1996 Bible

Kuzila lokungakavunyelwa

¹ “Nine nibantfwana baSimakadze Nkulunkulu wenu. Ningatisiki nome nihhule lingembili letinhloko tenu ngenca yalabafile,

² ngobe nisive lesingcwele saSimakadze Nkulunkulu wenu. Kuto tonkhe tive letisebusweni bemhlaba, Simakadze ukhetse nine kutsi nibe sive lesiligugu lakhe.”

Tilwane letihlantekile naletingcolile

³ “Ningadli lutfo lolusinengiso.

⁴ Nati-ke tilwane leningatidla: yinkhomo, nemvu, nembuti,

⁵ nenyamatane, nenswephe, nelincala, nemphala, nelingcina, neliwula, neligoga.

⁶ Ningatidla tonkhe tilwane letehlukanisa tinselo kabili naletihlabulako.

⁷ Noko kuleto letihlabulako nome kuleto letinetinselo letehlukene ningete nalidla likamela, nemgwaja, nembila. Nome tihlabula, kodvwa tinetinselo letingakehlukani, tingcolile kini ngekwemtsetfo.

⁸ Nehhontji ingcolile kini, nome inetinselo letehlukene, noko ayihlabuli. Akukafaneli niyidle inyama yato, futsi ningatitsintsi ngisho netidvumbu tato.

⁹ “Kuto tonkhe tilwane letihlala emantini, ningatidla tonkhe leto letinetimphikwana tekuntjweza netincwencwe.

¹⁰ Kodvwa konkhe lokute timphikwana tekuntjweza netincwencwe ningacali nikudle; ngekwemtsetfo kungcolile kini.

¹¹ “Ningayidla nome nguyiphi inyoni lehlantekile.

¹² Kodvwa leti ningacali nitidle: lusweti, nelingce, nelingce lelimnyama,

¹³ nanhloyile lobovu, nanhloyile lomnyama, nalohheya wekufuywa nome waluphi luhlobo,

¹⁴ nelihhwabayi nome laluphi luhlobo,

¹⁵ sikhova, nesahhukulu, nenkhankhu, naloklebe nome waluphi luhlobo,

¹⁶ nenkovazana, nesikhova lesikhulu, nesikhova lesimhlophe,

¹⁷ nesikhova sasehlane, nenkwazi, nemphishamanti,

¹⁸ nagilonki, namatalatingwenya nome waluphi luhlobo, natsekwane, nelilulwane.

¹⁹ “Tonkhe tilwanyakatana letindiza tibe libulo tingcolile kini ngekwemtsetfo, ningatidli.

²⁰ Kodvwa niyawutidla tonkhe tilwane letihlantekile letinetimphiko.

²¹ “Ningacali nidle lutfo lenilukhandze lutifele. Loko ningakupha umuntfu wetive lohlala kunome ngukuliphi lalamadolobha enu; yena-ke angakudla nome nine nikutsengisele lomunye wetive. Kodvwa nine nisive lesingcwele kuSimakadze Nkulunkulu wenu. “Ningalipheki lizinyane lembuti elubisini lwenina.”

Umtsetfo wekwelishumi

²² “Yehlukanisani kwelishumi kwaso sonkhe sivuno, umnyaka ngemnyaka.

²³ Niyawudla kwelishumi kwenu kwalokutinhlavu, nekweliwayini lelisha, nekwemafutsa, nekwematubulo etinkhomo netimvu, netimbuti embikwaSimakadze Nkulunkulu wenu endzaweni layawuyikhetsela kubeka Libito lakhe, kuze nitewufundza kuhlonipha Simakadze Nkulunkulu wenu ngaso sonkhe sikhatsi.

²⁴ Kodvwa nangabe leyo ndzawo ikhashane, kantsi Simakadze Nkulunkulu wenu unibusisile futsi ningeke nikhone kwetfwala loko kwelishumi kwenu, ngobe phela lendzawo letawukhetfwa nguSimakadze kutsi kubekwe Libito lakhe kuyo ikhashane kakhulu,

²⁵ ngako shintjiselanani kwelishumi kwenu ngemali, bese nitsatsa leyo mali niyimikisa kuleyo ndzawo Simakadze Nkulunkulu wenu latayikhetsa.

²⁶ Ngaleyo mali niyawutsenga nome ngabe yini leniyitsandzako: tinkhomo, nome timvu, nome liwayini, nome sinatfo lesifakwe imbiliso, nome ngabe yini leniyifisako. Wena nendlu yakho uyawudla lapho utfokote embikwaSimakadze Nkulunkulu wakho.

²⁷ “Ningawakhohlwa emaLevi lahlala emadolobheni enu, ngobe wona akanaso sabelo nome lifa.

²⁸ Njalo nje ekupheleni kweminyaka lemitsatfu niyawuletsa konkhe kwelishumi lokusivuno salowo mnyaka nikulondvolote emadolobheni enu,

²⁹ kuze kutsi emaLevi late sabelo nome lifa lekungelawo, nebetive, netintsandzane, nebafelokati labahlala emadolobheni enu bangeta batekudla besutse, kuze Simakadze Nkulunkulu wenu anibusise kuko konkhe lenikwentako.”