Danyela 5 - Siswati 1996 Bible

Lidzili laBhelshasari

¹ Inkhosi Bhelshasari yenta lidzili lelikhulu yentela tindvuna tayo letatiyinkhulungwane, yanatsa nato liwayini.

² Kwatsi Bhelshasari asanatsa liwayini lakhe, walayeta kutsi kulandvwe tindzebe tegolide netesiliva letatitsetfwe nguNebukhadnezari, uyise, ethempelini eJerusalema, khona inkhosi, netindvuna tayo, nebafati bayo, nemaphovela ayo batewunatsa ngato.

³ Ngako-ke baletsa letindzebe tegolide letatitsetfwe ethempelini laNkulunkulu eJerusalema, kwase kutsi inkhosi, netindvuna tayo, nebafati bayo, nemaphovela ayo banatsa ngato.

⁴ Batsi basanatsa liwayini, babe badvumisa bonkulunkulu begolide, nebesiliva, nebelitfusi, nebensimbi, nebetigodvo, nebematje.

⁵ Ngekushesha kwabonakala iminwe yesandla semuntfu ibhala elubondzeni, macondzana nelutsi lwesibane esigodlweni senkhosi. Inkhosi yasibuka lesandla lesibhalako.

⁶ Buso bayo bagucuka baphaphatseka, yatfutfumela kangangekutsi kwaze kwagedletela emadvolo ayo, kwatsamba nemilente yayo.

⁷ Inkhosi yamemeta kutsi kulandvwe bonkhe batsebuli, nabosonkhanyeti, netangoma. Yakhuluma kuletati taseBhabhulona, yatsi: “Nome ngabe ngubani longafundza lombhalo, angitjele kutsi usho kutsini, utakwembeswa ngaletibukhwebeletane, agacwe umgaco wegolide entsanyeni yakhe, entiwe abe ngumbusi wesitsatfu embusweni.”

⁸ Tonkhe tati tenkhosi tangena; kodvwa atizange tikwati kuwufundza lombhalo nome titjele inkhosi kutsi wawusho kutsini.

⁹ Ngako inkhosi Bhelshasari yatfutfumela kakhulu, nebuso bayo bachubeka baphaphatseka. Tindvuna tayo nato tacakeka.

¹⁰ Indlovukazi yatsi kube ive emavi enkhosi netindvuna, yeta yangena endlini yelidzili. Yafike yatsi: “Bayethe, nkhosi, lunwele loludze, wena waphakathi! Ungetfuki! Ungesabi!

¹¹ Kukhona indvodza lapha embusweni wakho lenemoya wabonkulunkulu labangcwele. Ngesikhatsi seyihlo yatfolakala inako kubonisisa, nekucondzisisa, nekuhlakanipha lokufanana nekwabonkulunkulu. Inkhosi Nebukhadnezari, uyihlo, yambeka kutsi abe ngumphatsi wetinyanga, nebatsebuli, nabosonkhanyeti kanye netangoma.

¹² Lendvodza lenguDanyela, inkhosi leyayetsa yatsi nguBhelteshasari, yatfolakala inengcondvo lekhaliphile, inelwati nekucondza, kantsi futsi yatfolakala ikwati kuchaza emaphupho, nekucaca timfumbe, icatulule netinkinga letilukhuni. Bita Danyela, yena utakutjela kutsi lombhalo usho kutsini.”

Danyela uchaza umbhalo

¹³ Ngako Danyela wangeniswa embikwenkhosi, inkhosi yakhuluma kuye, yatsi: “Wena unguDanyela yini, lomunye webatfunjwa labatfunjwa ngubabe, inkhosi, leyabuya nabo kaJuda?

¹⁴ Ngivile kutsi umoya wabonkulunkulu ukuwe nekutsi uyakubona lokusitsekile, unengcondvo kantsi unekuhlakanipha lokugcamile.

¹⁵ Letati nebatsebuli bangeniswe lapha embikwami kutsi batewufundza lombhalo bangitjele kutsi usho kutsini, kodvwa behlulekile kuwuchaza.

¹⁶ Ngivile-ke wena kutsi ungakwati kuveta tinchazelo nekucatulula tinkinga letilukhuni. Nawungafundza lombhalo, ungitjele kutsi usho kutsini, utakwembatsiswa letibukhwebeletane, kugacwe umgaco wegolide entsanyeni yakho, bese wentiwa uba ngumbusi wesitsatfu embusweni.”

¹⁷ Danyela waphendvula inkhosi, watsi: “Letipho takho ungatigcinela tona, uyinike lomunye leyo mivuzo yakho. Noko lombhalo inkhosi ngitakuyifundzela wona ngiyichazele kutsi usho kutsini.

¹⁸ “Nkhosi, Nkulunkulu Longetulu Kwako Konkhe wapha uyihlo Nebukhadnezari bukhosi, nebukhulu, neludvumo kanye nebukhatikhati.

¹⁹ Ngenca yesikhundla lesiphakeme lamupha sona, bonkhe bantfu, netive, nebantfu bato tonkhe tilwimi babetfutfumela bamesaba. Labo inkhosi leyayifuna kutsi babulawe, yayibabulala; nalabo leyayifuna kubaphephisa, yayibaphephisa; nalabo leyayifuna kubaphakamisela etikhundleni, yayibaphakamisa; nalabo leyayifuna kubatfobisa, yayibatfobisa.

²⁰ Kodvwa watsi kube inhlitiyo yakhe ibe nekutigcabha yaba lukhuni ngenca yekutigcabha, wehliswa esihlalweni sakhe sebukhosi, wemukwa ludvumo lwakhe.

²¹ Wakhishwa emkhatsini webantfu, wanikwa ingcondvo yesilwane; wahlala emkhatsini wetimbongolo tesiganga, wadla tjani njengetinkhomo; nemtimba wakhe wanetfwa ngematolo asezulwini, waze wavuma kutsi Nkulunkulu Longetulu Kwako Konkhe wengamele yonkhe imibuso yebantfu nekutsi ubeka etikwayo nome ngumuphi lowo latsandza kumbeka.

²² “Kodvwa wena ndvodzana yakhe, Bhelshasari, awukatitfobi, lite nome bewukwati konkhe loku.

²³ Esikhundleni saloko, sewutiphakamisile wamelana naNkulunkulu welizulu. Baletsa letindzebe tasethempelini lakhe kuwe, kwatsi wena netindvuna takho, nemakhosikati akho, nemaphovela akho nanatsa ngato liwayini. Nikhuleke nadvumisa bonkulunkulu besiliva nebegolide, nebelitfusi, nebensimbi, nebetigodvo kanye nebematje labangakwati kubona, nome kuva, nome kucondza. Kodvwa awukamdvumisi Nkulunkulu lophetse kuphila kwakho nato tonkhe tindlela takho esandleni sakhe.

²⁴ Ngako-ke utfumele lesandla lesibhale lombhalo.

²⁵ “Lona ngumbhalo lobhaliwe: “MENE, MENE, THEKELI, PHARISINI.

²⁶ Nansi inchazelo yalamagama: Mene: Nkulunkulu sewuwabalile emalanga ekubusa kwakho, wawafikisa ekugcineni kwawo.

²⁷ Thekeli: Sewukaliwe etikalweni, kwatfolakala kutsi ulula.

²⁸ Pharisini: Umbuso wakho wehlukanisiwe wanikwa emaMede nemaPheresiya.”

²⁹ Ngekushesha Bhelshasari watfumela livi kutsi Danyela akembatsiswe ngaletibukhwebeletane, kwagacwa entsanyeni yakhe umgaco wegolide, kwamenyetelwa kutsi yena sewungumbusi wesitsatfu embusweni.

³⁰ Ngabo bona lobo busuku Bhelshasari, inkhosi yemaBhabhulona, wagwazwa wafa.

³¹ Dariyusi, umMede, watsatsa umbuso, asaneminyaka lengema-62.