Danyela 1 - Siswati 1996 Bible

Indzaba yaDanyela nebangani bakhe Emajaha asesigodlweni saNebukhadnezari

¹ Ngemnyaka wesitsatfu wekubusa kwaJehoyakimu, inkhosi yakaJuda, Nebukhadnezari, inkhosi yaseBhabhulona, wefika eJerusalema wayivimbetela.

² Simakadze wanikela Jehoyakimu, inkhosi yakaJuda, kanye naletinye timphahla tasethempelini laNkulunkulu esandleni saNebukhadnezari. Letimphahla watetfwala watiyisa ethempelini lankulunkulu wakhe kulaseBhabhulona, wafike watibeka endlini yengcebo yankulunkulu wakhe.

³ Inkhosi yabe seyitfuma Ashpenazi, indvuna yetiphatsimandla tayo tasesigodlweni, kutsi aletse lamanye ema-Israyeli endlu yebukhosi netikhulu.

⁴ Kwakufanele kube ngemajaha lamahle langenasiyela, labenemandla nenhlitiyo yako konkhe kufundziswa, lanelwati, lanengcondvo lekhaliphile, lalungele kusebenta esigodlweni senkhosi. Kwakufanele awafundzise lulwimi netincwadzi taseBhabhulona.

⁵ Inkhosi yawehlukanisela sabelo sekudla kwawo onkhe emalanga neseliwayini lasetafuleni lenkhosi. Bekufanele aceceshwe iminyaka lemitsatfu, emvakwaloko bese angena emsebentini wenkhosi.

⁶ Emkhatsini wawo bekunemajaha labephuma kaJuda: boDanyela, naHananiya, naMishayeli, na-Azariya.

⁷ Lendvuna yawetsa emabito lamasha: Danyela yatsi nguBhelteshasari, Hananiya yatsi nguShadraki, Mishayeli yatsi nguMeshaki, Azariya yatsi ngu-Abednego.

⁸ Kodvwa Danyela watincumela enhlitiyweni yakhe kutsi yena angeke atingcolise ngalokudla kwenkhosi kanye nangaleliwayini lakhona; wacela imvume endvuneni lenkhulu kutsi yena angatingcolisi ngalendlela.

⁹ Manje Nkulunkulu abesente lendvuna kutsi ibe nemusa nesihawu kuDanyela,

¹⁰ kodvwa lendvuna yamtjela Danyela, yatsi: “Ngiyayesaba inkhosi yami, inkhosi, lekunguyona inehlukanisele leliphakelo lenu lekudla nesinatfo senu. Kufanele ngani kutsi inibone senibukeka nondzile kunalawa lamanye emajaha labontsanga yenu? Inkhosi itangijuba inhloko yami ngenca yenu.”

¹¹ Danyela wakhuluma kulomahlalesangweni labebekwe ngulendvuna kutsi engamele boDanyela, naHananiya, naMishayeli kanye na-Azariya, watsi:

¹² “Ngicela kutsi uke ulinge tinceku takho emalanga lalishumi. Sinike kuphela tibhidvo sitekudla nemanti sitewunatsa.

¹³ Ubobe-ke sewuyasicatsanisa kubukeka kwetfu nekwalamajaha lamanye ladla kudla kwenkhosi, bese tinceku takho utiphatsa ngaleyo ndlela loyibonako.”

¹⁴ Ngako lomahlalesangweni wakuvuma loko, wabalinga emalanga lalishumi.

¹⁵ Ekupheleni kwemalanga lalishumi babukeka baphile kancono kakhulu, futsi bondleke kakhulu kunawo onkhe lawa lamanye emajaha labedla kudla kwenkhosi.

¹⁶ Ngako lomahlalesangweni wavele wakususa lokudla kwelikhetselo neliwayini labebafanele balinatse lekwakusabelo sabo; esikhundleni sako wabanika tibhidvo.

¹⁷ Lamajaha lamane Nkulunkulu wawanika lwati nekucondza kwato tonkhe tinhlobo temfundvo netetincwadzi letatibhaliwe. Danyela abesayicondza yonkhe imibono nemaphupho ato tonkhe tinhlobo.

¹⁸ Kwatsi ekupheleni kwalesikhatsi lesasimiswe yinkhosi kutsi bangeniswe, lendvuna yavele yabetfula kuNebukhadnezari.

¹⁹ Inkhosi yakhuluma nabo, yakhandza kutsi kute namunye labelingana naboDanyela, naHananiya, naMishayeli kanye na-Azariya; ngako base bangena emsebentini wenkhosi.

²⁰ Kuyo yonkhe indzaba yekuhlakanipha neyekucondza, inkhosi leyayibabuta ngayo yabakhandza bancono ngalokuphindvwe kalishumi kunato tonkhe tangoma nebatsebuli lababe kuwo wonkhe umbuso wayo.

²¹ Danyela wahlala lapho kwaze kwaba ngumnyaka wekucala wekubusa kwenkhosi Khuresi.