3 yaJohane 1 - Siswati 1996 Bible

Singeniso

¹ Lencwadzi iphuma kuMbonisi. Iya kuGayusi lotsandzekako, lengimtsandza ngeliciniso.

² Wena lotsandzekako, ngiyakhuleka kutsi konkhe kukuhambele kahle, nekutsi uphile kahle, njengobe ngati kutsi uyaphila emphefumulweni wakho.

³ Ngajabula kakhulu nakufika labanye bazalwane bafakaza ngekutimisela kwakho ecinisweni, njengobe uhamba ecinisweni.

⁴ Kute kujabula lengingaba nako lokwengca loko: kuva kutsi bantfwabami bahamba ecinisweni.

Gayusi uyadvunyiswa

⁵ Wena lotsandzekako, ukwenta ngekwetsembeka konkhe lokwentela bazalwane, ikakhulu etihambini,

⁶ labafakaze ngelutsandvo lwakho ebandleni. Utabe wente kahle ngekubahlinzeka ngako konkhe labangahle bakudzinge, ngiko loko lokufanelekile emsebentini waNkulunkulu.

⁷ Ngobe baphuma egameni laKhristu bangatsatsi lutfo kulabangakholwa kuye.

⁸ Ngako-ke sifanele kubasita bantfu labanjalo, kuze sibambisane nabo emsebentini weliciniso.

Kutiphatsa dlephu kwaDiyotrefesi

⁹ Kukhona lengakubhalela libandla, kodvwa-ke Diyotrefesi lotsandza kutibeka embili uyala kusemukela.

¹⁰ Ngako-ke nangifika lapho, ngiyawuvumbulula konkhe lokubi lakwente kitsi ngemavi lamabi, asihleba. Kodvwa loko akumenelisi, ngobe ujinge angabemukeli bazalwane; nalabo labafuna kubemukela, uyabavimbela abancume nasebandleni.

Kudvunyiswa kwaDemetriyusi

¹¹ Wena lotsandzekako, ungasilandzeli sibonelo lesibi, kepha ubolandzela sibonelo lesihle. Umuntfu lowenta lokulungile waNkulunkulu; kepha umuntfu lowenta lokubi akazange asambone Nkulunkulu.

¹² Demetriyusi unconywa ngibo bonkhe bantfu, ngisho neliciniso imbala liyamncoma; natsi siyamfakazela, futsi nawe uyati kutsi bufakazi betfu buliciniso.

Imikhontiso yekugcina

¹³ Benginetintfo letinyenti lebengingakubhalela ngato, kodvwa angifisi kutibhala phansi,

¹⁴ ngobe ngetsemba kutsi ngitakubona masinyane, sikhulume nawe umlomo nemlomo.

¹⁵ Kuthula akube nawe. Bonkhe bangani bayakuhambisa. Hambisa bangani, ngamunye ngamunye.