2 Tikhronike 9 - Siswati 1996 Bible

Kuvakashela kwendlovukazi yaseSheba kaSolomoni

¹ Indlovukazi yaseSheba yatsi kube ive ngeludvumo lwaSolomoni, yase iyeta eJerusalema yatakumvivinya ngekumbuta imibuto lelukhuni. Yefika ihamba nalolukhulu ludvwendvwe luchuba emakamela labetfwele tinandzisi nemidlidlimba yegolide kanye neyematje laligugu. Yefika kaSolomoni yakhulumisana naye ngako konkhe lokwakusengcondvweni yayo.

² Solomoni wayiphendvula yonkhe leyo mibuto yayo. Kute ngisho namunye lowase waba lukhuni kakhulu enkhosini kutsi iwuchazele lendlovukazi.

³ Yatsi kube lendlovukazi yaseSheba ikubone konkhe loko kuhlakanipha kwenkhosi Solomoni kanye nesigodlo labesakhile,

⁴ nekudla labekudla etafuleni lakhe, nekuhlaliswa kwetindvuna takhe, netembatfo tetinceku takhe, netebaphatsi betindzebe takhe tekunatsa, neminikelo yekushiswa labeyenta ethempelini laSimakadze, yamangala, yaphela emandla.

⁵ Yakhuluma enkhosini yatsi: “Impela lombiko lengatjelwa ngawo ngiseseveni lami macondzana netintfo lophumelele kutenta kanye namacondzana nekuhlakanipha kwakho uliciniso.

⁶ Kodvwa angizange ngikukholwe loku bebangitjela kona, ngidzimate ngefika ngatibonela ngewami emehlo. Ngempela, loku lengitjelwe kona akusiyo ngisho nencenye yalobukhulu bakho nekuhlakanipha kwakho; loku lengikubonako kukhulu kakhulu kunaloku lengakuva ngematekelo.

⁷ Maye, bayajabula labantfu bakakho! Maye, tiyajabula letindvuna takakho letihlala njalo time lapha embikwakho tilalele lokuhlakanipha kwakho!

⁸ Akadvunyiswe Simakadze Nkulunkulu wakho lokujabulele wadzimate wakubeka esihlalweni sakhe sebukhosi kutsi ube yinkhosi ubusele Simakadze Nkulunkulu wakho. Ngenca yelutsandvo lwaNkulunkulu wakho ngema-Israyeli nangenshisekelo yakhe yekuwagcina emile kokuphela, ukwente waba yinkhosi yawo, kuze utewubusa ngekungakhetsi nangekulunga.”

⁹ Indlovukazi yase ipha inkhosi Solomoni igolide leyayingemakhilogremu labengaba ti-4 000, nemidlidlimba yetinandzisi kanye nematje laligugu. Akuzange kufike tinandzisi letase taba njengaleta letake tetfulwa yindlovukazi yaseSheba enkhosini Solomoni.

¹⁰ [Emadvodza akaHiramu nalamadvodza akaSolomoni atfutsetela igolide ayisusa e-Ofiri, aletsa netingodvo te-almugi kanye nematje laligugu.

¹¹ Inkhosi yasebentisa letingodvo te-almugi ekwakheni titebhisi telithempeli laSimakadze kanye netesigodlo, nasekwenteni emahabhu, nemalire ebahlabeli. Kute intfo lenjalo leyayike yabonwa kulo lonkhe lakaJuda.]

¹² Inkhosi Solomoni yapha indlovukazi yaseSheba konkhe leyayikufisa naleyayikucelile. Inkhosi yapha indlovukazi tintfo letinyenti kakhulu kunaleto leyayite nato iphatsele inkhosi. Indlovukazi yase iyancandzeka ihamba nelibandla letimphekeleteli tayo yaya eveni lakubo.

Bunjinga benkhosi Solomoni

¹³ Sisindvo segolide leyayiletfwa kuSolomoni ngemnyaka yayingemakhilogremu labengaba ti-23 000,

¹⁴ ngaphandle kwalemitselo yebahwebi nalabatsenga batsengise. Ngisho nawo onkhe emakhosi ase-Arabiya nebabusi belive lema-Israyeli babeletsa igolide nesiliva kuSolomoni.

¹⁵ Inkhosi Solomoni yakha emahawu lamakhulu langema-200 ngegolide legcotjiwe. Lilinye lalakhiwe ngegolide legcotjiwe leyayingemakhilogremu labengaba sikhombisa.

¹⁶ Inkhosi yaphindze yakha lamanye emahawu lamancane langema-300, nawo yawakha ngegolide legcotjiwe; lilinye lalakhiwe ngegolide leyayingemakhilogremu labengaba matsatfu. Inkhosi yawabeka endlini yayo yeLihlatsi laseLebanoni.

¹⁷ Inkhosi yase yakha lesikhulu sihlalo sebukhosi; yasakha ngematinyo endlovu, yabe seyisembesa ngegolide lecengekile.

¹⁸ Lesihlalo sebukhosi besinetitebhisi letisitfupha, sinesenabelo segolide lesasinamatsiselwe kuso. Lapha emaceleni lesihlalo sasinekwekubeka imikhono, eceleni kwaloko naloko kwakunelibhubesi lelimile.

¹⁹ Emabhubesi lali-12 abeme kuletitebhisi, linye ngala nalelinye ngale kwesitebhisi sisinye. Kute lokufanana naloko lokwase kwentiwa ngisho nome ngukumuphi umbuso.

²⁰ Tonkhe tindzebe taSolomoni tekunatsa tatentiwe ngegolide, nato tonkhe tintfo talapha endlini yeLihlatsi laseLebanoni tatentiwe ngegolide lecengekile. Isiliva yayingakabaluleki kakhulu ngetikhatsi taSolomoni.

²¹ Inkhosi yayinemikhumbi leminyenti yekuhweba elwandle; lemikhumbi yayinemadvodza akaHiramu. Kanye ngeminyaka lemitsatfu yayibuya yetfwele igolide, nesiliva, nematinyo etindlovu, netinkawu kanye netimfene.

²² Inkhosi Solomoni yaba yinkhulu ngebunjinga nangekuhlakanipha, yendlula onkhe emakhosi emhlaba.

²³ Onkhe emakhosi emhlaba abefuna kuta kuSolomoni atewulalela lokuhlakanipha Nkulunkulu labekubeke enhlitiyweni yaSolomoni.

²⁴ Umnyaka ngemnyaka, wonkhe labeta kuye abefika nesipho: tintfo letentiwe ngesiliva nangegolide, nemijiva, netikhali, netinandzisi, nemahhashi kanye neminyuzi.

²⁵ Solomoni abenetitebele letatiti-4 000 temahhashi kanye netincola temphi, nemahhashi lati-12 000, labekugcine emadolobheni etincola temphi, kanye naseJerusalema, lapho abehlala khona.

²⁶ Wawabusa onkhe emakhosi kusukela emfuleni, kuye eveni lemaFilisti, kuze kuyewufika emnyeleni waseGibhithe.

²⁷ Inkhosi yenta isiliva yandza eJerusalema, yaze yafanana nelukhetse, nemsedari waba mnyenti njengetihlahla temkhiwa etsafeni.

²⁸ Emahhashi aSolomoni abewekutsengwa eGibhithe kanye nakulamanye emave.

Kufa kwaSolomoni

²⁹ Leminye imininingwane ngekubusa kwaSolomoni, kusukela ekucaleni kuze kube ngusekugcineni, kubhaliwe encwadzini yemilandvo yaNathani, umphrofethi, nasesiphrofethweni sa-Ahiya waseShilo, nasemibonweni ya-Ido, umboniswa, mayelana naJerobowamu, umsa waNebati.

³⁰ Solomoni wabusela eJerusalema iminyaka lengema-40, abusa sonkhe sive sema-Israyeli.

³¹ Solomoni wase uyakhotsama, wafihlwa edolobheni leyise Davide. Rehobowamu, umsa waSolomoni, waba yinkhosi esikhundleni sakhe.