2 Tikhronike 7 - Siswati 1996 Bible

Kunikelwa kwelithempeli

¹ Watsi Solomoni kube acedze kuthandaza, kwehla umlilo uvela ezulwini wadla lomnikelo wekushiswa nemihlatjelo, inkhatimulo yaSimakadze yase igcwalisa lithempeli.

² Baphristi abazange basakhona kungena kulelithempeli laSimakadze, ngobe inkhatimulo yaSimakadze yase iligcwalisile.

³ Kwatsi kube onkhe ema-Israyeli abone lomlilo wehla nenkhatimulo yaSimakadze isetikwelithempeli, baguca phansi esiyilweni bakhotsama ngetinhloko tabo tibheke phansi, bakhonta Simakadze bambonga batsi: “Akabongwe Simakadze ngebuhle bakhe, ngobe umusa wakhe ume kuze kube phakadze.”

⁴ Inkhosi naso sonkhe sive base banikela ngemihlatjelo embikwaSimakadze.

⁵ Inkhosi Solomoni yanikela ngemhlatjelo wetinkhomo letatiti-22 000, netimvu letatiti-120 000 tihlangene netimbuti. Inkhosi yalinikela kanjalo-ke lithempeli laNkulunkulu, ikanye nesive.

⁶ Baphristi bema ngetindzawo tabo, njengobe kwenta nemaLevi, banetingubhu temculo, letatentiwe yinkhosi Davide, itentele kudvumisa Simakadze, letatiphindze tisetjentiswe nakambonga atsi: “Umusa wakhe ume kuze kube phakadze.” Malungana nemaLevi baphristi nabo babeshaya emacilongo, lapho onkhe ema-Israyeli aseme ngetinyawo.

⁷ Solomoni wase wehlukanisela Nkulunkulu indzawo lesekhatsi nekhatsi nesibuya lesasisembikwendlu yaSimakadze, lapho-ke ngulapho anikelela khona iminikelo yekushiswa nemafutsa eminikelo yebudlelwane, ngobe lilati lelitfusi labelakhile lalingakhoni kwetfwala leminikelo yekushiswa, neminikelo yalokutinhlavu nalamafutsa.

⁸ Inkhosi Solomoni yawenta kanjalo-ke lomkhosi, kwaze kwaphela emalanga lasikhombisa, sonkhe sive sema-Israyeli sasikanye nayo, kungumhlangano lomkhulu, bantfu babephuma kusukela eLebo Hamathi kuze kuyewufika emfudlaleni waseGibhithe.

⁹ Kwatsi ngelilanga lesiphohlongo babamba lomkhulu umhlangano, ngobe bese bawugubhile umkhosi wekunikelwa kwelilati onkhe lamalanga lasikhombisa, nemkhosi sebawentile emalanga lasikhombisa ngetulu.

¹⁰ Kwatsi ngelilanga lema-23 ngenyanga yesikhombisa Solomoni wase uyabacitsa bantfu, babuyela emakhaya abo bajabule kakhulu batsakasile etinhlitiyweni tabo ngaloko lokuhle Simakadze labekwentele Davide naSolomoni kanye naso sive sakhe sema-Israyeli.

Kutibonakalisa kwesibili kwaNkulunkulu kuSolomoni

¹¹ Watsi kube Solomoni acedze kwakha lithempeli laSimakadze kanye nesigodlo sakhe, asaphumelele nekukwenta konkhe labekufisa enhlitiyweni yakhe lapha ethempelini laSimakadze nakulesigodlo sakhe,

¹² Simakadze wase uyatibonakalisa kuye ebusuku watsi: “Ngiwuvile umthandazo wakho, sengitikhetsele lendzawo kutsi kube ngulona thempeli lemihlatjelo.

¹³ “Nangivala emazulu kuze kutsi kubete imvula, nome ngitfume sikhonyane kutsi sitewubhubhisa lelive, nome ngitfumele sifo lesibulalanako emkhatsini wesive sami,

¹⁴ nangabe sive sami lesibitwa ngelibito lami, sititfoba sithandaze kimi, sifunisise intsandvo yami, siphendvuke etindleleni taso letimbi temonakalo, ngiyakuva ngisezulwini, ngitsetselele sono saso, ngiphilise live laso.

¹⁵ Emehlo ami ayawuvuleka, netindlebe tami tilalele imikhuleko lenikelelwa kulendzawo.

¹⁶ Lelithempeli ngilikhetsile ngalehlukanisela kutsi Libito lami sale lihlala lapha phakadze naphakadze. Emehlo ami nenhlitiyo yami sekuyawuhlala kulapho kulo ngaso sonkhe sikhatsi.

¹⁷ “Wena-ke, nangabe ungahamba embikwami ulingise uyihlo Davide, wente konkhe lengikuyala ngako, ugcine timiso tami nemitsetfo yami,

¹⁸ ngiyawusimisa sihlalo sakho sebukhosi, njengobe ngametsembisa Davide, uyihlo, ngesikhatsi ngitsi: ‘Akuyikwenteka kutsi weswele umuntfu loyawuba ngumbusi wema-Israyeli.’

¹⁹ “Kodvwa nangabe nine nigucuka nifulatsela timiso tami nemiyalo yami lenginiyale ngayo, nihambe niyewukhonta labanye bonkulunkulu nikhuleke kubo,

²⁰ ngiyawube sengiyamsiphula Israyeli ngimsuse eveni lami, lebengimuphe lona, ngililahle nalelithempeli lesengilehlukanisele Libito lami. Ngiyakulenta libe yinhlekisa nentfo yekwedzelelwa kuto tonkhe tive.

²¹ Noko nome kwanyalo lelithempeli lisenesitfunti lesimatima kangaka, bonkhe labendlula ngakhona bayawumangala, batsi: ‘Simakadze uyenteleni lentfo lenjena kulelive nakulelithempeli?’

²² Bantfu bayawuphendvula batsi: ‘Kungobe bamfulatsela Simakadze, Nkulunkulu waboyise, lowabakhipha eGibhithe, besuka bagugumatsa labanye bonkulunkulu, basebentela bona, babakhonta bakhuleka kubo. Nguko nje asabehlisele lenhlekelele lengaka.’ ”