2 Tikhronike 4 - Siswati 1996 Bible

Timphahla tasethempelini

¹ Solomoni inkhosi wase wakha lilati lelitfusi lelalingemamitha labengaba yimfica budze, nemamitha labengaba yimfica bubanti, nemamitha labengaba mane nesigamu kuphakama.

² Huramu wakha libhavu ngelitfusi lelalincibilikisiwe, laba yindingilizi lengemamitha labengaba mane nesigamu bubanti, nemamitha labengaba mabili nesigamu kuphakama. Kwakuyintsambo lengemamitha labengaba li-13 nesigamu nalitungeletiswa.

³ Ngephansi kwalomngcengcema walo belitungeletwe ngimifanekiso yetinkunzi, tilishumi ebangeni lelingaba sigamu selimitha. Letinkunzi tatentiwe tinhlu letimbili elucetwini lulunye lwalelibhavu lelitfusi.

⁴ Lelibhavu lalisime etikwetinkunzi telitfusi letili-12: tintsatfu tato tibheke ngasenyakatfo, tintsatfu tibheke ngasenshonalanga, tintsatfu tibheke ngasemphumalanga, tintsatfu tibheke ngaseningizimu. Lelibhavu lalitinte etikwetibunu taletinkunzi, lingemuva lato lalibheke ekhatsi nendzawo.

⁵ Lalingangemphama yesandla bucinsi balo, umngcengcema walo wawunjengewenkomishi, nanjengembali lechakazile. Lalingetfwala emalitha labengaba ti-60 000.

⁶ Wabe sewakha imigezelo lelishumi, wabeka lesihlanu ngaseningizimu nalesihlanu ngasenyakatfo. Kulemigezelo bekutawuyakatelwa khona tintfo teminikelo yekushiswa, kodvwa lelibhavu lona lalitabosetjentiswa baphristi, nabageza.

⁷ Wabe sewenta tintsi tesibane letilishumi tegolide, watenta njengobe abelayelwe, wase utifaka ethempelini, letisihlanu ngaseningizimu naletisihlanu ngasenyakatfo.

⁸ Wase wakha ematafula lalishumi, wawafaka ethempelini, lasihlanu ngasenyakatfo nalasihlanu ngaseningizimu. Waphinidze wenta netitja tegolide tekunyenyeta letatilikhulu.

⁹ Wakha sibuya sebaphristi nesibuya sangephandle lesikhulu kanye netivalo taso, wase utembesa ngelitfusi.

¹⁰ Wabeka libhavu ekoneni lelingaseningizimu nemphumalanga.

¹¹ Wachubeka wakha nemabhodo, nemafosholo, netitja tekunyenyeta. Wawucedzela kanjalo-ke Huramu umsebenti labewusukele awentela inkhosi Solomoni ethempelini laNkulunkulu:

¹² Kwakutinsika letimbili; netingcongwane letimbili letatisasitja letatisetihlokweni taletinsika, netinhlu letimbili taletiviliya letatihlobise letingcongwane letatisetihlokweni taletinsika;

¹³ nalamahananandza labengema-400 aletinhlu letimbili tetiviliya, tinhlu letimbili temahananandza tesiviliya sisinye, tatihlobise letingcongwane letatisasitja letatisetihlokweni taletinsika,

¹⁴ netincodlana nalemigezelo yato,

¹⁵ nelibhavu, netinkunzi letatili-12 letatingaphansi kwalo;

¹⁶ nemabhodo, nemafosholo, netimfologo tenyama, nato tonkhe tintfo letihambisana nako. Tonkhe-ke letintfo letentiwa nguHuramu Abi, atakhela inkhosi entela lithempeli laSimakadze, watakha ngelitfusi lelicwebetelako.

¹⁷ Inkhosi yentelwa tonkhe letintfo ngetimfolomu telibumba etsafeni laseJordane emkhatsini weSukhothi neSarethani.

¹⁸ Setitonkhe-ke letintfo letentiwa yinkhosi Solomoni taba nesisindvo selitfusi lesasingenakukalwa.

¹⁹ Solomoni wabuye wenta tonkhe timphahla letatilapho ethempelini laNkulunkulu, lekwakulilati legolide, nematafula lapho kwakuhlala khona sinkhwa sebukhona,

²⁰ netintsi tetibane tegolide lecengekile, netibane takhona letatitabovutsa njale nje embikwendzawo lengcwelengcwele, njengobe kwakumisiwe,

²¹ netimbali letatakhiwe ngegolide, netibane, netindlawu, konkhe lokwakuyigolide lephelele,

²² netijubantsambo tegolide lecengekile, netitja tekunyenyeta, netingwembe, netitja tekushisela imphepho, netivalo tegolide telithempeli: tivalo tangekhatsi tendzawo lengcwelengcwele kanye netendlu lenkhulu.