2 Tikhronike 34 - Siswati 1996 Bible

Josaya, inkhosi yakaJuda

¹ Josaya abeneminyaka lesiphohlongo budzala, nakabekwa kuba yinkhosi. Wabusela eJerusalema iminyaka lengema-31.

² Wenta lokuhle emehlweni aSimakadze, wahamba ngetindlela teyise Davide, akazange aphambukele ngesekudla nome ngesancele.

Josaya ucitsa kukhontwa kwetitfombe

³ Kwatsi ngemnyaka wesiphohlongo wekubusa kwakhe, asesemncane impela, wacala wafunisisa Nkulunkulu weyisemkhulu Davide. Kwatsi ngemnyaka weli-12 wacala kuhlambulula lakaJuda nelaseJerusalema, wesusa tonkhe tindzawo letiphakeme tekukhontela tithico, netinsika ta-Ashera, netithico letibatiwe, netitfombe letibunjiwe.

⁴ Ngekuyala kwakhe emalati aboBhali abhidlitwa, wagawula nalamalati ekutfuncisela timphepho labesetikwawo, wawajuba aba ticucu, wabhidlita naletinsika ta-Ashera, netithico, netitfombe. Loko wakubhidlita kwaba timvutfu, wakusakatela emadlizeni alabo labebahlabela kuwo imihlatjelo.

⁵ Washisela ematsambo ebaphristi etikwemalati abo; walihlambulula kanjalo-ke lakaJuda nelaseJerusalema.

⁶ Emadolobheni akaManase, newaka-Efrayimu, newakaSimeyoni kuze kuyewufika kaNaftali nasetindzaleni letatiwatungeletile,

⁷ wabhidlita lamalati netinsika ta-Ashera, letithico watisila taba yimphuphu, wajuba emalati emphepho, kwaba tincetu kulo lonkhe laka-Israyeli. Wesuka lapho wabuyela eJerusalema.

Kutfolakala kwencwadzi yemtsetfo

⁸ Ngemnyaka weli-18 wekubusa kwaJosaya, asahlambulula live kanye nelithempeli, watfumela boShafani, umsa wa-Asaliya, naMaseya, umphatsi welidolobha, banaJowa, umsa waJowahazi, labengulobhalisako, kutsi abavusetele lithempeli laSimakadze Nkulunkulu wakhe.

⁹ Bahamba baya kuHilkiya, umPhristi Lomkhulu, bafike bamnika lemali leyayiletfwe ethempelini laNkulunkulu, leyayicocwe ngemaLevi labebomahlalesangweni, labeyibutse kubantfu bakaManase nebaka-Efrayimu, nakuyo yonkhe imisalela yaka-Israyeli, neyakaJuda, neyakaBhenjamini, kanye nakubo bonkhe lababehlala eJerusalema.

¹⁰ Bayibeka kulamadvodza labesabekwe yinkhosi kutsi akengamele umsebenti welithempeli laSimakadze. Lamadvodza ngawo labeholela tisebenti letativusetela kabusha lelithempeli.

¹¹ Lenye imali babeyinika laba lababatako nalabakhako, kuze batewutsenga ngayo ematje lasabatwe kahle kanye netingodvo, netinsika taletindlu letatiyekelelwe ngemakhosi akaJuda taze tadzilika, taba tindzala.

¹² Lamadvodza awenta ngekwetsembeka lokukhulu lomsebenti. Lababebacondzisi babo bekuboJahathi, na-Obadiya, emaLevi labeyintalelwane yaMerari, naZakhariya, naMeshulamu labebadzabuka kuKhohati. Onkhe emaLevi labebochwephesha ekudlaleni tingubhu temculo,

¹³ wona abeluse laba labasebentako, engamele tonkhe tisebenti kusuka kulomsebenti kuye kulowa. Lamanye emaLevi abebomabhalane, nebabhali, nabomahlalesangweni.

¹⁴ Batsi basatfutsetela bakhipha lemali leyayiletfwe ethempelini laSimakadze, Hilkiya, umPhristi Lomkhulu, watfola incwadzi yemtsetfo waSimakadze leyanikwa ema-Israyeli ngaMosi.

¹⁵ Hilkiya wakhuluma kuShafani, labengumabhalane, watsi: “Ngiyitfolile incwadzi yemtsetfo ekhatsi ethempelini laSimakadze.” Wase uyinika Shafani.

¹⁶ Shafani wayitsatsa lencwadzi wayakuyibika enkhosini, watsi: “Tinceku takho tenta konkhe loko letitfunywe kutsi tikwente.

¹⁷ Setiyikhiphile lemali lebeyisethempelini laSimakadze, tase tiyibeka etandleni tebengameli netisebenti.”

¹⁸ Shafani, mabhalane, wayibikela inkhosi, watsi: “Hilkiya, umphristi, unginike incwadzi.” Shafani wase ufundzela inkhosi lencwadzi.

¹⁹ Inkhosi yatsi kube iweve lamavi emtsetfo, yaklebhula tembatfo tayo.

²⁰ Yase ikhuluma kuboHilkiya, na-Ahikamu, umsa waShafani, na-Abdoni, umsa waMikha, naShafani, labengumabhalane, kanye na-Asaya, inceku yenkhosi, yatsi:

²¹ “Hambani niyekungibutela kuSimakadze, nibutele mine kanye nensali yaka-Israyeli neyakaJuda ngaloku lokubhalwe kulencwadzi leseyitfolakele. Yinkhulu kabi intfukutselo yaSimakadze layitfululele etikwetfu ngenca yekutsi bobabe abazange baligcine livi laSimakadze; abazange bakwente konkhe loku lokubhalwe kulencwadzi.”

²² Hilkiya kanye nalaba lababetfunywe yinkhosi naye bahamba bayawukhuluma nemphrofethikati labenguHulda, umkaShalumi, umsa waThokhathi, umsa waHasra. Shalumi abengumphatsi wetembatfo tasethempelini. Lomphrofethikati abehlala eJerusalema eSifundzeni Sesibili.

²³ Wabatjela watsi: “Naku lokushiwo nguSimakadze, Nkulunkulu wema-Israyeli, utsi: ‘Tjelani lendvodza lenitfumele lapha kimi, nitsi:

²⁴ Naku lokushiwo nguSimakadze, utsi: Ngitakwehlisela inhlekelele kulendzawo nakubantfu bayo, tonkhe leticalekiso letibhalwe kulencwadzi lefundvwe embikwenkhosi yakaJuda.

²⁵ Njengobe bangishiyile mine, batfuncisa imphepho kulabanye bonkulunkulu, bangitfukutselisa ngato tonkhe letithico labatibumbe ngetandla tabo, intfukutselo yami itawutfululelwa kulendzawo, futsi ingeke icisheke.’

²⁶ Tjelani inkhosi yakaJuda lenitfumele kutsi niteyibutela kuSimakadze, kutsi: ‘Naku lokushiwo nguSimakadze, Nkulunkulu wema-Israyeli, macondzana nalamavi lowevile:

²⁷ Njengobe inhlitiyo yakho itsintsekile, wase uyatitfoba embikwaNkulunkulu, nawuva kutsi abetsiteni ngalendzawo kanye nangebantfu bayo, ngobe wena utitfobile embikwami, waklebhula tingubo takho, wakhala embikwami, ngikuvile, kusho Simakadze.

²⁸ Manje-ke ngitakuyisa kuboyihlomkhulu, wena uyawufihlwa ngekuthula. Emehlo akho akayikuyibona yonkhe lenhlekelele lengitayehlisela kulendzawo nakulabo labahlala kuyo.’ ” Ngako batsatsa lemphendvulo yakhe lomphrofethikati bayimikisa enkhosini Josaya.

Inkhosi Josaya yenta sivumelwane sekulalela Simakadze

²⁹ Josaya, inkhosi, wase ubita bonkhe baholi bakaJuda nebaseJerusalema.

³⁰ Wenyuka nabo waya ethempelini laSimakadze akanye nalamadvodza akaJuda, nebantfu baseJerusalema, nebaphristi nemaLevi, ngisho nabo bonkhe bantfu kusukela kulomncane kuze kuyewufika kulomkhulu. Wabafundzela, baweva onkhe emavi alencwadzi yesivumelwane leyayitfolakele ethempelini laSimakadze.

³¹ Inkhosi yema eceleni kwensika yayo yavusetela sivumelwane embikwaSimakadze, yavuma kulandzela Simakadze nekugcina imiyalo yakhe, nemitsetfo yakhe, kanye netimiso takhe, ngayo yonkhe inhlitiyo yayo, nangawo wonkhe umphefumulo wayo, nekulalela emavi esivumelwane labhalwe kulencwadzi.

³² Wabafungisa bonkhe bantfu baseJerusalema nebakaBhenjamini kulesivumelwane. Bantfu baseJerusalema bakwenta loko njengekwesivumelwane saNkulunkulu, Nkulunkulu waboyisemkhulu.

³³ Josaya wesusa tonkhe tithico letisinengiso kulo lonkhe lelalihlala ema-Israyeli. Wenta kutsi bonkhe bantfu labakhile kulaka-Israyeli bakhonte Simakadze Nkulunkulu wabo. Ngaso sonkhe sikhatsi sekuphila kwakhe, sive asizange sisuke ekulandzeleni Simakadze, Nkulunkulu waboyisemkhulu.