2 Tikhronike 32 - Siswati 1996 Bible

Kusongelwa kweJerusalema nguSenaheribi

¹ Emvakwako konkhe loko Hezekiya asasebente konkhe ngekwetsembeka, Senaheribi, inkhosi yase-Asiriya, weta watawuhlasela lakaJuda. Wafike wemisa malungana nemadolobha latinqaba acabanga kutsi utatincobela wona abe ngewakhe.

² Watsi kube abone Hezekiya kutsi Senaheribi sewufikile, nekutsi utimisele kuhlasela iJerusalema,

³ Hezekiya wase uhlolisana netindvuna takhe kanye nebaholi bemabutfo kutsi bavale lemitfombo yemanti lephuma ngaphandle kwelidolobha, bavele bamsita kuloko.

⁴ Kwabutsana lesikhulu sicumbi sabokadzebona bemadvodza, bativimba tonkhe tiyalu nemifula leyayigijima kulo lonkhe live, batsi: “Kufanele yini kutsi emakhosi ase-Asiriya, angefika lapha akhandze emanti lamanyenti kangaka?”

⁵ Hezekiya wasebenta kamatima aphishanekile avusetela tonkhe tindzawo telubondza letase tibhidlikile, akha nemibhoshongo kulo. Waphindze wakha lolunye lubondza ngaphandle kwalolo, wacinisa kabusha tibebesi eDolobheni laDavide. Wabuye wenta incumbi yetikhali tekulwa kanye nemahawu.

⁶ Wabeka tindvuna temphi letitawuphatsa bantfu, wababutsela embikwakhe enkhundleni yelisango lelidolobha; wabakhutsata ngalamavi, atsi:

⁷ “Cinani, nime sibindzi, ningesabi, futsi ningapheli emandla ngenca yalenkhosi yase-Asiriya nalolucucaba lwemphi yayo leta nayo, ngobe kitsi kunemandla lamakhulu kunalawa lenawo yona.

⁸ Kuye kunemkhono wenyama, kodvwa kitsi kunaSimakadze Nkulunkulu wetfu lotasisita atilwe letimphi tetfu.” Bantfu bema sibindzi ngaloko Hezekiya, inkhosi yakaJuda, lakusho kubo.

⁹ Kwatsi kamuva, ngesikhatsi Senaheribi, inkhosi yase-Asiriya, kanye nawo onkhe emabutfo akhe, basevimbetele iLakhishi, watfumela tindvuna takhe eJerusalema nemlayeto kuHezekiya, inkhosi yakaJuda, nakubo bonkhe bantfu bakaJuda lababelapho, utsi:

¹⁰ “Naku lokushiwo nguSenaheribi, inkhosi yase-Asiriya, utsi: Netsembeni ngalokutsi nilibale kuguja lapha ngekhatsi kweJerusalema leseyikakwe yimphi?

¹¹ Hezekiya nakatsi: ‘Simakadze Nkulunkulu wetfu utasisindzisa esandleni senkhosi yase-Asiriya,’ uyaniyenga, wentela kutsi nitewubulawa yindlala nakoma.

¹² Akusiye yini Hezekiya lona lowasusa letindzawo letiphakeme tekukhontela loNkulunkulu kanye nemalati akhe, atsi kubakaJuda nebaseJerusalema: ‘Kufanele nikhotsame kulinye lilati, nishisele kulo imphepho’?

¹³ “Anati yini kutsi mine nabobabe sentani kuleti letinye tive tonkhe talamanye emave? Bakhona yini labonkulunkulu baleto tive kuwephula emave ato esandleni sami?

¹⁴ Ngumuphi kubo bonkhe labonkulunkulu baleto tive letabhujiswa bobabe lowake wakhona kusindzisa sive sakhe esandleni sami? Manje-ke, yena loNkulunkulu wenu utanisindzisa kanjani esandleni sami?

¹⁵ Ningavumi kuyengwa nguHezekiya, aze anedukise kanje. Ningamkholwa, ngobe kute namunye nkulunkulu ngisho ngukusiphi sive nome ngukumuphi umbuso loke wakhona kusindzisa sive sakhe esandleni sami, ngisho nasetandleni tabobabe. Ngako-ke lonkulunkulu wenu naye ngeke akhone kunisindzisa esandleni sami.”

¹⁶ Letindvuna taSenaheribi tachubeka takhuluma lokunyenti temelana naSimakadze Nkulunkulu, kanye nenceku yakhe Hezekiya.

¹⁷ Inkhosi Senaheribi wabhala netincwadzi etfuka Simakadze, Nkulunkulu wema-Israyeli, atsi kuye: “Njengaloku bonkulunkulu baleti letinye tive talamanye emave bangazange bakhone kubasindzisa bantfu babo esandleni sami, kanjalo-ke naloNkulunkulu waHezekiya ngeke abasindzise labantfu bakhe esandleni sami.”

¹⁸ Base bayamemeta ngesiHebheru, bakhuluma kulabantfu baseJerusalema lababesetulu elubondzeni, babesabisa, betama kubetfusa, khona batewukhona kutfumba lelidolobha.

¹⁹ Bakhuluma kabi ngaNkulunkulu waseJerusalema, balingisa ngesikhatsi bakhuluma ngalabonkulunkulu baletinye tive temhlaba, labangumsebenti wetandla temuntfu.

²⁰ Inkhosi Hezekiya ikanye nemphrofethi Isaya, umsa wa-Amose, bakhala kuNkulunkulu, bacela lusito lwakhe ngalendzaba.

²¹ Simakadze wase utfumela ingilosi, yafike yawabhubhisa ngenkemba onkhe emachawe lanemandla, nebaholi, netindvuna, yabacedza bonkhe lababelapho enkambu yenkhosi yase-Asiriya. Senaheribi wabuyela emuva eveni lakhe ajojobele. Watsi uyawungena ethempelini lalonkulunkulu wakhe, lamanye emadvodzana akhe amenta silo sengubo, amjuba ngenkemba.

²² Simakadze wamsindzisa kanjalo-ke Hezekiya, inkhosi, kanye nebantfu bakhe baseJerusalema esandleni saSenaheribi, inkhosi yase-Asiriya, nasetandleni tabo bonkhe labanye. Bantfu bakhe wabavikela yonkhe indzawo.

²³ Labanyenti bantfu beta baletsa iminikelo yaSimakadze eJerusalema, netipho letinelinani lelikhulu baliletsa kuHezekiya, inkhosi yakaJuda. Kusukela ngaleso sikhatsi wahlonishwa kakhulu kuto tonkhe tive.

Kugula nekutiphakamisa kwaHezekiya

²⁴ Kulawo malanga Hezekiya wagula wabangwa netibi. Wathandaza kuSimakadze, Simakadze wamphendvula ngekumnika sibonakaliso lesisimanga.

²⁵ Kodvwa inhlitiyo yakhe yatiphakamisa kangangekutsi akazange awunake lomusa longaka labentelwe wona, ngako lulaka lwaSimakadze lwehlela etikwakhe nasetikwaJuda neJerusalema.

²⁶ Hezekiya wase uyaphendvuka kulokutiphakamisa kwenhlitiyo yakhe, njengaloku kwenta bantfu baseJerusalema; ngaloko lulaka lwaSimakadze lwangabe lusehlela etikwabo ngesikhatsi saHezekiya.

Bunjinga baHezekiya nekudvuma kwakhe

²⁷ Hezekiya abengakanjingi nakadzeni, abevele ngenhloko, futsi ahlonishwa kakhulu, wenta letinkhulu tingungu tesiliva yakhe netegolide kanye netematje akhe laligugu, netetinandzisi, netemahawu, netato tonkhe tintfo letiligugu.

²⁸ Wakha letinkhulu tita tekulondvolota tivuno talokutinhlavu, neteliwayini lelisha, netemafutsa. Wakha tibaya tetinhlobonhlobo tetinkhomo, kanye netibaya tetimbuti netimvu.

²⁹ Wakha emakhaya lamanyenti, waba nenyambalala yetifuyo, timbuti, netimvu, netinkhomo, imihlambi lemikhulu. Nkulunkulu phela abemuphe bunjinga lobukhulu.

³⁰ NguHezekiya lona lowavimba siyalu lesingenhla saseGihoni, wadvonsa lamanti wawacondzisa entasi ngasenshonalanga neliDolobha laDavide. Hezekiya abephumelela kuko konkhe labekusukela akwente.

³¹ Kodvwa kwatsi nakufika emancusa aseBhabhulona atfunywe ngumbusi wakhona kutsi atewubuta ngalesimanga sesibonakaliso lesasehlele eveni lakhe, Nkulunkulu wamshiya yedvwa entela kumvivinya, kuze akwati konkhe lokwakusenhlitiyweni yaHezekiya.

Kuphela kwembuso waHezekiya

³² Leminye imininingwane ngekubusa kwaHezekiya, nako konkhe lakwenta ngekutinikela, kubhaliwe encwadzini yembono wemphrofethi Isaya, umsa wa-Amose, encwadzini yemakhosi akaJuda newaka-Israyeli.

³³ Hezekiya wase uyakhotsama, wafihlwa kubakubo entsabeni lapho kunemadliza etitukulwane taDavide khona. Sonkhe sive sakaJuda nesaseJerusalema samhlonipha kakhulu ekufeni kwakhe. Manase, umsa wakhe, waba yinkhosi esikhundleni sakhe.