2 Tikhronike 3 - Siswati 1996 Bible

Kwakhiwa kwelithempeli

¹ Solomoni wase uyacala-ke kwakha lithempeli laSimakadze eJerusalema, eNtsabeni yaseMoriya, lapho Simakadze atibonakalisa khona kuyise Davide. Kwakungusebaleni lekubhulela kolo laka-Arawuna, umJebhusi, indzawo leyayilungiswe nguDavide.

² Wacala kwakha lelithempeli mhla titimbili enyangeni yesibili emnyakeni wesine wekubusa kwakhe.

³ Sisekelo sekwakha lithempeli laSimakadze lesabekwa nguSolomoni sasingemamitha labengaba ngema-27 budze, nemamitha labengaba yimfica bubanti.

⁴ Umhubhe lekwakungenwa ngawo wawungemamitha labengaba ngema-54 kuphakama, nemamitha labengaba yimfica bubanti. Wawulingana nalelithempeli ngebubanti. Lingekhatsi lawo lalembeswe ngegolide lecengekile.

⁵ Lendlu lenkhulu yayihlotjiswe ngekunanyatsiselwa ngemapulango etipheshula lapha ngekhatsi etibondzeni talo, yase yembeswa ngegolide lecengekile, lapho kwakucoshwe khona imihlobiso yetihlahla temasundvu neyetinketane.

⁶ Inkhosi yahlobisa lithempeli ngematje laligugu nangegolide leyayitfunyelwa iphuma eveni lasePhavayimu.

⁷ Solomoni wasebentisa igolide ekwembeseni tibondza talelithempeli, nemishayo, neminyango, netivalo. Kuletibondza lababati bacopha imihlobiso yemakherubhi.

⁸ Wakha likamelo lelingekhatsi kakhulu lekutsiwa yindzawo lengcwelengcwele, lelalingemamitha labengaba yimfica budze, nemamitha labengaba yimfica bubanti, lokwakulingana ngco nalelithempeli. Indzawo lengcwelengcwele yona yembeswa ngegolide leyayingetulu kwemathani labengaba ngema-20.

⁹ Igolide lengemagremu labengaba ngema-570 yasetjentiswa ekwakheni tipikili. Netibondza temakamelo langetulu tembeswa ngegolide.

¹⁰ Endzaweni lengcwelengcwele wakha emakherubhi lamabili labatiwe, wawembesa ngegolide.

¹¹ Budze betimphiko talamakherubhi ngekweluleka kwato babungemamitha labengaba yimfica. Luphiko lulunye lwelikherubhi lekucala lwalungemamitha labengaba mabili nencenye yesine yelimitha budze, lona lwalutsintsa lubondza lwelithempeli, kantsi lolu lolunye luphiko lwalo lwalungemamitha labengaba mabili nencenye yesine yelimitha budze, lutsintsa lolu lolunye luphiko lwaleli lelinye likherubhi.

¹² Kanjalo futsi lolunye luphiko lwalelikherubhi lesibili lwalungemamitha labengaba mabili nencenye yesine yelimitha budze, lutsintsa lolu lolunye lubondza lwelithempeli ngale, nalolu lolunye nalo lungemamitha langaba mabili nencenye yesine yelimitha lutsintsa luphiko lwaleli lelinye likherubhi lekucala.

¹³ Timphiko talamakherubhi omabili setihlangene tatingemamitha labengaba yimfica budze, abeme ngetinyawo abheke kulendlu lenkhulu.

¹⁴ Wenta likhethini lemitiya leluhlata njengesibhakabhaka, nalebukhwebeletane, nalebubendze, walenta ngelineni lecolisakele, nalo lalihlotjiswe ngemakherubhi.

Tinsika letimbili telitfusi

¹⁵ Lapha embikwelithempeli wenta tinsika letimbili, setitotimbili tatingemamitha labengaba li-15 nesigamu budze, iyinye yayinengcongwane leyayingemamitha labengaba mabili nesigamu lapha enhloko.

¹⁶ Wephotsela tinketane, wase utitsandzela kuletinsika lapha etikwato. Wakha nemahananandza aze aba likhulu, wawatfungela kuletinketane.

¹⁷ Letinsika wase utimbela emnyango walelithempeli, lenye ngaseningizimu, lenye ngasenyakatfo. Lena lengaseningizimu wayetsa libito watsi nguJakhini, lena lengasenyakatfo watsi nguBowazi.