2 Tikhronike 28 - Siswati 1996 Bible

Ahazi, inkhosi yakaJuda

¹ Ahazi abeneminyaka lengema-20 budzala, nakabekwa kuba yinkhosi; wabusela eJerusalema iminyaka leli-16. Akazange ahambe etinyatselweni teyise Davide, wenta lokubi emehlweni aSimakadze.

² Wahamba etinyatselweni temakhosi aka-Israyeli, naye wabumba netitfombe tekukhontela boBhali.

³ Watfuncisa imphepho eSigodzini sakaBheni Hinomu, wanikela ngemadvodzana akhe kutsi ashiswe ngemlilo; alandzela imikhuba lesinengiso yaletive takhona Simakadze labeticoshe ngesikhatsi nakufika ema-Israyeli.

⁴ Wanikela nangemihlatjelo, watfuncisa imphepho etindzaweni letiphakeme, nasetulu eticongweni temagcuma, nangephansi kwetihlahla letikhulu letendlele emagala ato.

BakaJuda balwa nemaSiriya nebaka-Israyeli

⁵ Ngako-ke Simakadze Nkulunkulu wakhe wamnikela esandleni senkhosi yaseSiriya. EmaSiriya amehlula, atfumba bantfu bakhe labanyenti, baba titfunjwa, eta nabo eDamaseko. Waphindze waniketwa etandleni tenkhosi yaka-Israyeli, leyamehlula kabuhlungu, kwafa bantfu labanyenti.

⁶ Ngalanga linye nje Phekha, umsa waRemaliya, wabulala emasotja lati-120 000 akaJuda, ngobe phela Juda abesashiye Simakadze, Nkulunkulu waboyisemkhulu.

⁷ Zikhri, ingwazi leyayingum-Efrayimu, wabulala Maseya, indvodzana yenkhosi, na-Azrikamu, indvuna leyayiphetse sigodlo, kanye na-Elkhana labewesibili enkhosini.

⁸ Ema-Israyeli atfumba kulabomnakabo bantfu labati-200 000, lekwakubafati, nemadvodzana kanye nemadvodzakati. Baphindze bashuba nemphango lenkhulu kabi, lababuyela nayo eSamariya.

Umphrofethi Odedi

⁹ Kwakunemphrofethi waSimakadze, Odedi, labelapho, waphuma kuyawuhlangabeta emabutfo, nasabuyela eSamariya. Wakhuluma kuwo watsi: “Njengobe Simakadze Nkulunkulu waboyihlomkhulu abetfukutselele bakaJuda, uvele wabaniketa esandleni senu. Kodvwa nyalo senibabulele ngesihluku lesidzimate sefika ezulwini.

¹⁰ Manje senicondze kwenta lamadvodza nalabafati bakaJuda nebaseJerusalema kutsi babe tigcili tenu. Anati yini kutsi nani nente tono, nona kuSimakadze Nkulunkulu wenu?

¹¹ Ase nilalele lapha kimi! Babuyiseleni emuva labomnakenu lesenibente tiboshwa, ngobe intfukutselo leyesabekako yaNkulunkulu isetikwenu.”

¹² Kwase kutsi labanye bebaholi baka-Efrayimu, bo-Azariya, umsa waJehohanani, naBherekhiya, umsa waMeshilemothi, naJehizkiya, umsa waShalumi, na-Amasa, umsa waHadilayi, babhekana nalabo lababefika baphuma emphini.

¹³ Batsi: “Akukafaneli nite naletitfunjwa lapha, ngobe sitawutfolakala sinelicala kuSimakadze. Kungabe kambe nicondze kwengeta kulesono nakulelicala letfu? Empeleni licala letfu selivele likhulu, nentfukutselo yakhe leyesabekako seyisetikwa-Israyeli.”

¹⁴ Ngako lamabutfo avele akhulula letiboshwa nalemphango embikwetindvuna nalo lonkhe libandla.

¹⁵ Kwakhetfwa emadvodza labitwa ngemabito awo kutsi atsatse letitfunjwa letingcunu atigcokise ngetimphahla letatitsatfwe kulemphango. Batigcokisa, batifaka tincabule, batipha kudla nekwekunatsa, batigcobisa tilondza. Bonkhe labo lababebutsakatsaka babagibelisa etimbongolweni. Babancandzekisa bababuyisela emuva kubakubo eJerikho, Lidolobha Lemasundvu, babuyela eSamariya.

Ahazi ucela lusito lwe-Asiriya

¹⁶ Ngaleso sikhatsi inkhosi Ahazi yatfumela enkhosini yase-Asiriya kuyawucela lusito.

¹⁷ Ema-Edomu abesaphindze efika atewuhlasela bakaJuda, ahamba netitfunjwa,

¹⁸ kantsi ngasona leso sikhatsi nemaFilisti abesahlasele lamadolobha labengaphansi kwetintsaba naseningizimu yelive lakaJuda. Atfumba adla iBhethi Shemeshi, ne-Ayaloni, neGederothi, neSokho, neThimna, neGimzo kanye nemiti leyayiwatungeletile.

¹⁹ Simakadze abesatfobise Juda ngenca ya-Ahazi, inkhosi yakaJuda, ngobe wakhutsata kwandza kwebubi kaJuda, wangete wetsembeka ngisho nakancane nje kuSimakadze.

²⁰ Thiglathi Phileseri, inkhosi yase-Asiriya, weta kuye, kodvwa wamnika inhlupheko esikhundleni selusito.

²¹ Ahazi watsatsa letinye timphahla tasethempelini laSimakadze netasesigodlweni nakutiphatsimandla, watetfula enkhosini yase-Asiriya, kodvwa naloko akuzange kumsite.

Tono ta-Ahazi

²² Ahazi akazange etsembeke ngisho nakancane nje kuSimakadze ngesikhatsi sekuhlupheka kwakhe.

²³ Wanikela ngemihlatjelo etithicweni tebantfu baseDamaseko lebase bamehlulile; ngobe abecabange watsi: “Njengobe tithico temakhosi aseSiriya tiwasitile emaSiriya, nami ngitakwenta umhlatjelo kuto, khona titakungisita.” Kodvwa ngito kanye letamwisa, taphindze tawisa onkhe ema-Israyeli.

²⁴ Ahazi wabutsela ndzawonye tonkhe timphahla ethempelini laNkulunkulu watitsatsa watihambisa. Wavala iminyango yelithempeli laSimakadze, wakha emalati kuwo onkhe emakona etitaladi eJerusalema.

²⁵ Kuwo onkhe emadolobha akaJuda wakha tindzawo letiphakeme tekutfuncisela imphepho etithicweni; wachukuluta Simakadze Nkulunkulu waboyisemkhulu, kutsi atfukutsele.

²⁶ Leminye imininingwane ngekubusa kwa-Ahazi nato tonkhe tindlela takhe, kusukela ekucaleni kuye ekugcineni, kubhaliwe encwadzini yemilandvo yemakhosi akaJuda newaka-Israyeli.

²⁷ Ahazi wase uyakhotsama, wafihlwa edolobheni laseJerusalema, kodvwa akazange afihlwe emadlizeni emakhosi aka-Israyeli. Hezekiya, umsa wakhe, waba yinkhosi esikhundleni sakhe.