2 Tikhronike 27 - Siswati 1996 Bible

Jothamu, inkhosi yakaJuda

¹ Jothamu abeneminyaka lengema-25 budzala, ngesikhatsi acala kubusa. Wabusela eJerusalema iminyaka leli-16. Libito lenina bekunguJerusha, indvodzakati yaSadoki.

² Jothamu wenta lokuhle emehlweni aSimakadze, njengobe uyise Uziya ebentile, kodvwa yena akazange ashise imphepho ethempelini laSimakadze. Noko bantfu bachubeka ngetindlela tabo temonakalo.

³ Jothamu wakha kabusha LiSango Lelingenhla lasethempelini laSimakadze, waphindze wenta umsebenti lomkhulu elubondzeni egcumeni i-Ofeli.

⁴ Wakha emadolobha emagcumeni akaJuda, kwatsi tinqaba nemibhoshongo wakwakha etindzaweni letatinemahlatsi.

⁵ Jothamu wahlasela inkhosi yema-Amoni, wayehlula. Kuwona lowo mnyaka ema-Amoni etfula kuye isiliva leyayingemakhilogremu labengaba ti-3 400, nakolo labengemathani labengaba yinkhulungwane, nebhali leyayingemathani labengaba yinkhulungwane. Ema-Amoni loku akwetfula kuye nasemnyakeni wesibili newesitsatfu.

⁶ Jothamu wakhula waba nemandla, ngobe abehamba ngekwetsembeka embikwaSimakadze Nkulunkulu wakhe.

⁷ Leminye imininingwane ngekubusa kwaJothamu, tonkhe timphi takhe kanye nalokunye lakwenta kubhaliwe encwadzini yemilandvo yemakhosi aka-Israyeli newakaJuda.

⁸ Abeneminyaka lengema-25 budzala, nakabekwa kuba yinkhosi, wabusela eJerusalema iminyaka leli-16.

⁹ Jothamu wase uyakhotsama, wafihlwa eDolobheni laDavide. Ahazi, umsa wakhe, waba yinkhosi esikhundleni sakhe.