2 Tikhronike 22 - Siswati 1996 Bible

Ahaziya, inkhosi yakaJuda

¹ Bantfu baseJerusalema babeka Ahaziya, litfunjana laJehoramu, waba yinkhosi esikhundleni seyise, njengobe phela bahlaseli lababehamba nema-Arabu, bangena enkambu babulala bonkhe bomnakabo labadzala. Ngako Ahaziya, umsa waJehoramu, inkhosi yakaJuda, wacala kubusa.

² Ahaziya abeneminyaka lengema-22 budzala, nakacala kubusa; wabusela eJerusalema umnyaka waba munye. Libito lenina bekungu-Athaliya, umntfwanemntfwana-Omri.

³ Ahaziya naye wahamba etinyatselweni tebendlu yaka-Ahabi, ngobe unina wamkhutsata ekwenteni lokubi.

⁴ Wenta lokubi emehlweni aSimakadze, njengobe kwakwenta bendlu yaka-Ahabi, ngobe emvakwekufa kweyise base baba beluleki bakhe, bamyisa ekuweni kwakhe.

⁵ Wabuye wahamba ngeteluleko tabo, nakahamba naJoramu, umsa wa-Ahabi, inkhosi yaka-Israyeli, kutsi ayekulwa naHazayeli, inkhosi yaseSiriya, eRamothi Gileyadi. EmaSiriya amlimata Joramu,

⁶ ngako wancandzeka wabuyela eJezreyeli kuze ayewuphotisela khona emanceba lawatfola emphini yaseRamothi, lapho bebalwela khona naHazayeli, inkhosi yemaSiriya. Ahaziya-ke, umsa waJehoramu, inkhosi yakaJuda, wase uyehla waya eJezreyeli ayawuvusela Joramu, umsa wa-Ahabi, njengobe abegwaziwe anemanceba.

⁷ Ngekuvakasha kwa-Ahaziya kuya kuJoramu, Nkulunkulu wehlisela kuwa ku-Ahaziya. Watsi nakefika Ahaziya, waphuma kanye naJoramu wayawuhlangabeta Jehu, umsa waNimshi, labegcotjwe nguNkulunkulu kutsi abhubhise indlu yaka-Ahabi.

⁸ Watsi Jehu asematasatasa nekubhubhisa indlu yaka-Ahabi, watfola tiphatsimandla takaJuda nemadvodzana etihlobo ta-Ahaziya labenakekela Ahaziya, wefika Jehu wababulala bonkhe.

⁹ Wase uyahamba wayawutfungatsa Ahaziya, lamadvodza akakhe ambhadzama asebhace eSamariya. Ambamba amletsa kuJehu, wafike wabulawa. Base bayamfihla, ngobe babetsi: “Abengumsa waJehoshafati lowafuna Simakadze ngayo yonkhe inhlitiyo yakhe.” Ngako kwasala kungasenamuntfu endlini yaka-Ahaziya labengaba nemandla lenele kuphatsa umbuso.

Athaliya, indlovukazi yakaJuda

¹⁰ Athaliya, unabo-Ahaziya, watsi kube abone kutsi indvodzana yakhe seyifile, wachubeka wabulala bonkhe bantfwabenkhosi bakaJuda.

¹¹ Kodvwa Jehosheba, indvodzakati yenkhosi Jehoramu, watsatsa Jowashi, umsa wa-Ahaziya, wamuba, wamsusa emkhatsini walaba labanye bantfwabenkhosi labese batawubulawa. Wamtsatsa wayakumbhacisa kanye nesidzandzane sakhe ekamelweni lekulala, ngobe Jehosheba, indvodzakati yenkhosi Jehoramu, lebengumfati wemphristi Jehoyada, abengudzadzewabo-Ahaziya. Wamfihla-ke lomntfwana ku-Athaliya kuze kutsi angambulali.

¹² Wahlala nabo abhaciswe ethempelini laNkulunkulu iminyaka lesitfupha ngesikhatsi kusabusa Athaliya eveni.