2 Tikhronike 17 - Siswati 1996 Bible

Jehoshafati, inkhosi yakaJuda

¹ Jehoshafati, umsa wa-Asa, waba yinkhosi esikhundleni sakhe; waticinisa kutsi atewuba nemandla ekubhekana nebaka-Israyeli.

² Wemisa emasotja kuwo onkhe emadolobha latinqaba kaJuda, wemisa emabutfo kaJuda nasemadolobheni aka-Efrayimu labetfunjwe nguyise Asa.

³ Simakadze abenaJehoshafati, ngobe abehamba etindleleni taDavide, uyise, labehamba kuto ebusheni bakhe. Akazange abute indlela kuboBhali,

⁴ kodvwa wabuta kuNkulunkulu weyise, walandzela imiyalo yakhe esikhundleni sekulandzela bubi lobabentiwa baka-Israyeli.

⁵ Simakadze watintisa umbuso ngaphansi kwesandla sakhe; bonkhe bakaJuda baletsa tipho kuJehoshafati, kangangekutsi wanjinga kakhulu waba neludvumo.

⁶ Inhlitiyo yakhe yayitinikele etindleleni taSimakadze, ngetulu kwaloko wesusa tonkhe tindzawo letiphakeme tekukhontela tithico kanye netinsika ta-Ashera kaJuda.

⁷ Emnyakeni wesitsatfu ekubuseni kwakhe watfuma tindvuna takhe boBheni Hayili, na-Obadiya, naZakhariya, naNethaneli kanye naMikhaya kutsi tifundzise emadolobheni akaJuda.

⁸ Tatikanye nemaLevi latsite: boShemaya, naNethaniya, naZebadiya, na-Asaheli, naShemiramothi, naJehonathani, na-Adoniya, naThobiya kanye naThobi Adoniya, nebaphristi bo-Elishama naJehoramu.

⁹ Babehamba baphetse incwadzi yemtsetfo waSimakadze, bawufundzisa kulo lonkhe lakaJuda; bawangenela onkhe emadolobha akaJuda bafundzisa bantfu.

Bukhulu baJehoshafati

¹⁰ Kwesaba Simakadze kwehlela yonkhe imibuso yemave labekhelene nelakaJuda kangangekutsi ayizange seyimhlasele Jehoshafati.

¹¹ Lamanye emaFilisti aletsa kuJehoshafati tipho nesiliva lekwakutetfulo; ema-Arabu amupha imihlambi yetihhanca letatiti-7 700, netimbuti letatiti-7 700.

¹² Jehoshafati waya ngekuya wakhula kuba nemandla; wakha tinqaba nemadolobha latingungu kaJuda,

¹³ waba nekudla lokunyenti lokwakugciniwe emadolobheni akaJuda. Lapha eJerusalema abemise bonsukuwansuku bemachawe emphi.

¹⁴ Bunyenti bawo ngekwemindeni yawo babume kanje: KaJuda kwakunetindvuna tetinkhulungwane: Adna abeyindvuna yemachawe emphi lati-300 000.

¹⁵ Wesibili bekunguJehohanani labeyindvuna yemachawe emphi lati-280 000.

¹⁶ Wesitsatfu bekungu-Amasiya, umsa waZikhri, lowatinikela kutsi akhonte Simakadze ngemachawe emphi lati-200 000.

¹⁷ KaBhenjamini bekume kanje: Eliyada, labesihlabani selisotja, yena abenemadvodza lati-200 000 labehlome ngebutjoki nangemahawu.

¹⁸ Wesibili bekunguJehozabadi labenemadvodza lati-180 000 labehlomele imphi.

¹⁹ Lawa bekungemadvodza labekhonta inkhosi, ngaphandle kwalawo labewamise emadolobheni latinqaba kulo lonkhe lakaJuda.