2 Tikhronike 11 - Siswati 1996 Bible

Siphrofetho saShemaya

¹ Watsi kube efike eJerusalema Rehobowamu, wabutsa yonkhe indlu yakaJuda neyakaBhenjamini, libutfo lelalinemadvodza lati-180 000, tihlabani todvwa, wahlomisa imphi yekuhlasela indlu yaka-Israyeli, kuze batewubuyisela umbuso kuyeRehobowamu.

² Kodvwa kwefika livi laSimakadze kuShemaya, umuntfu waNkulunkulu, latsi:

³ “Tjela Rehobowamu, umsa waSolomoni, inkhosi yakaJuda, nawo onkhe ema-Israyeli akaJuda newakaBhenjamini, utsi:

⁴ ‘Naku lokushiwo nguSimakadze, utsi: Ningakhuphuki kuyakulwa nabomnakenu. Hambani niye emakhaya enu nonkhe, ngobe loku kungumuno wami.’ ” Ngako balilalela livi laSimakadze babuyela emakhaya abo, bangabe basaya kuyauhlasela Jerobowamu.

Rehobowamu wakha emadolobha latinqaba

⁵ Rehobowamu wahlala eJerusalema, wakha emadolobha latinqaba kaJuda:

⁶ iBhetlehema, ne-Etamu, neThekhowa,

⁷ neBhethi Suri, neSokho, ne-Adulamu,

⁸ neGathi, neMaresha, neZifu,

⁹ ne-Adorayimu, neLakhishi, ne-Azekha,

¹⁰ neSora, ne-Ayaloni kanye neHebroni. Lawa-ke bekungemadolobha lakhiwa aba tinqaba kulakaJuda nelakaBhenjamini.

¹¹ Wawakhisisa wawacinisa, wase ubeka netindvuna kuwo, kwabekwa kuwo kudla, nemafutsa emncumo kanye neliwayini.

¹² Wabeka emahawu netikhali kuwo onkhe lamadolobha, wawenta acina kakhulu. Ngako lakaJuda nelakaBhenjamini aba ngaphansi kwakhe.

Kuta kwebaphristi nemaLevi kaJuda

¹³ Baphristi nemaLevi ato tonkhe tifundza tema-Israyeli, basekela Rehobowamu.

¹⁴ EmaLevi adzimate ashiya onkhe emadlelo awo nemafa awo, aya kaJuda naseJerusalema, ngobe Jerobowamu kanye nemadvodzana akhe abesavele abacoshile ekutseni babe baphristi baSimakadze.

¹⁵ Wavele watibekela baphristi bakhe betindzawo letiphakeme nebetithico labetentile tinesimo sembuti nelinkhonyane.

¹⁶ Bonkhe bantfu baleso naleso sive saka-Israyeli lababebeke tinhlitiyo tabo ekufuneni Simakadze, Nkulunkulu wema-Israyeli, balandzela emaLevi baya eJerusalema kuyawunikela imihlatjelo kuSimakadze, Nkulunkulu waboyise.

¹⁷ Bacinisa umbuso wakaJuda, basekela Rehobowamu, umsa waSolomoni, iminyaka lemitsatfu, solomane bahamba etindleleni taDavide naSolomoni ngaso sonkhe leso sikhatsi.

Umndeni waka-Rehobowamu

¹⁸ Rehobowamu watsatsa Mahalathi, indvodzakati yaJerimothi, umsa waDavide, unina wayo kungu-Abihayili, indvodzakati ya-Eliyabe, umsa waJese.

¹⁹ Wamtalela emadvodzana: boJewushe, naShemariya kanye naZahamu.

²⁰ Rehobowamu wabe sewutsatsa Makha, indvodzakati ya-Absalomu, lowamtalela bo-Abiya, na-Athayi, naZiza, naShelomithi.

²¹ Rehobowamu watsandza Makha, indvodzakati ya-Absalomu, kwendlula onkhe emakhosikati kanye netingani takhe. Emakhosikati akhe abeli-18 asawonkhe, tingani takhe tatingema-60, anemadvodzana langema-28 nemadvodzakati langema-60.

²² Rehobowamu wabeka Abiya, umsa waMakha, kutsi abe ngumtfwanenkhosi lomkhulu kulabomnakabo, entela kutsi abe yinkhosi emvakwakhe.

²³ Wavele wenta kuhlakanipha ngekutsi lamadvodzana akhe awasakatele kuto tonkhe tifundza takaJuda netakaBhenjamini, nakuwo onkhe lamadolobha latinqaba. Wawabela kudla lokunyenti, wawatsatsela nebafati labanyenti.