2 Samuweli 23 - Siswati 1996 Bible

Emavi aDavide ekugcina

¹ Lawa ngemavi ekugcina enkhosi Davide: “Inkhulumo yaDavide, umsa waJese, inkhulumo yalowo lowaphakanyiswa nguLosetikwako Konkhe. Ungumuntfu lowagcotjwa nguNkulunkulu waJakobe, umhlabeleli wetingoma ka-Israyeli.

² “Moya waSimakadze wakhuluma ngami. Livi lakhe labaselulwimini lwami.

³ Nkulunkulu wema-Israyeli wakhuluma, Lidvwala laka-Israyeli latsi kimi: ‘Nangabe umuntfu ahola sive ngekulunga, asibuse ngekwesaba Nkulunkulu,

⁴ ufanana nekukhanya kwekusa nakuphuma lilanga, lakute khona emafu; unjengekukhanya emvakwemvula lokumilisa tjani emhlabatsini.’

⁵ “Indlu yami ayikalungi yini kuNkulunkulu? Akenti nami yini sivumelwane saphakadze naphakadze, lesihlelwe kahle savikeleka macala onkhana? Akayikuphumelelisa yini kusindziswa kwami, anginike konkhe lengikufisako?

⁶ Kodvwa bonkhe lababi bayawulahlwa njengemanyeva, wona angabutfwa ngesandla.

⁷ Wonkhe lotsintsa emanyeva usebentisa ludlawu lwensimbi, nome siphandla sesikhali; ashiselwa khona lapho alahlelwe khona.”

Tingwazi takaDavide teludvumo

⁸ Lawa-ke ngemabito etingwazi takaDavide letatidvumile: wekucala kwakunguJoshebi Bashebethi, umThakhemoni, abeyindvuna yaLabatsatfu. Yena-ke wagwaza ngesikhali sakhe emadvodza labengema-800, wawabulala onkhe emphini yinye.

⁹ Wesibili kwakungu-Eleyazare, umsa waDodo, welusendvo lwaka-Ahohi. Yena abengulomunye waletingwazi letintsatfu. Ngalelinye lilanga yena naDavide bake besukela emaFilisti labebutsanele imphi. Ema-Israyeli onkhe abaleka,

¹⁰ kodvwa yena wema endzaweni yakhe walwa nemaFilisti, sandla sakhe saze somelela enkembeni yakhe, sesigongobele singaseluleki. Simakadze wancoba imphi lenkhulu ngalelo langa. Yatsi kube imphi iphele, ema-Israyeli abuya eta lapho bekuna-Eleyazare khona, atewuphanga tikhali kuletidvumbu.

¹¹ Wesitsatsu bekunguShama, umsa wa-Age, waseHarari. EmaFilisti abebutsene eLehi, lapho bekunensimi yemalentili khona. Emabutfo ema-Israyeli awabalekela emaFilisti,

¹² kodvwa Shama yena wema endzaweni yakhe ekhatsi nekhatsi nensimi, wayivikela, wabulala lamaFilisti. Simakadze wancoba imphi lenkhulu ngalelo langa.

¹³ Ngesikhatsi sanakuvunwako tingwazi letintsatfu kuleti letatingema-30 tehlela kuDavide ngasemgedzeni wase-Adulamu, incumbi yemaFilisti isakambe eSigodzini semaRefa.

¹⁴ Ngaleso sikhatsi Davide abesekhatsi enqabeni, kantsi libutfo lemaFilisti lona laliseBhetlehema.

¹⁵ Davide wativela asomile, wase utsi: “Awu! Kube mane kungaba khona loyangikhelela emanti ekunatsa; ngomele emanti asemtfonjeni longasesangweni laseBhetlehema!”

¹⁶ Ngako letingwazi letintsatfu tesuka lapho tabhidla ticheme temabutfo emaFilisti ngenkhani taphumela ngale, taze tefika emtfonjeni longasesangweni laseBhetlehema, takha emanti, tabuya nawo kuDavide. Kodvwa Davide wala kuwanatsa lamanti, esikhundleni saloko wawatfululela phansi embikwaSimakadze.

¹⁷ Davide watsi: “Awu, Simakadze! Akube khashane nami kutsi ngiwanatse lamanti. Kimi kungabe kufanana nekunatsa ingati yalamadvodza latilahle ematsambo ngemphilo yawo.” Ngako Davide akazange awanatse. Nguleto-ke tento taletingwazi letintsatfu.

¹⁸ Abishayi, umnakaboJowabe, umsa waSeruya, abengumholi walaba labangema-30. Wagwaza ngesikhali sakhe, alwa nemadvodza langema-300 wawabulala onkhe, waze wadvuma kakhulu njengaletingwazi letingema-30.

¹⁹ Abishayi abengulodvume kakhulu kuletingwazi letingema-30, waze wabekwa waba yindvuna yato, lite nome yena abengakabalwa nalaba Labatsatfu.

²⁰ Bhenaya, umsa waJehoyada, waseKhabsiyeli, naye abengulomunye wetingwazi letatatiwa. Wenta tigemegeme letinyenti naye, njengekubulala kwakhe tingwazi letimbili letatatiwa takaMowabi. Wake wehlela phansi emgodzini ngalelinye lilanga kunangcocwane, wafike wabulala libhubesi.

²¹ Wabulala sichwaga lesikhulu saseGibhithe lesasihlome ngesikhali, sisibambe ngesandla, Bhenaya yena wasisukela aphetse simunya. Wahlutfula lesikhali esandleni salomGibhithe, wambulala ngaso lesikhali sakhe.

²² Lobo-ke kwaba buchawe baBhenaya, umsa waJehoyada. Naye wadvuma njengalaba Labatsatfu labebatiwa kakhulu.

²³ Abehlonishwa kakhulu kunato tonkhe letingwazi letatingema-30, kodvwa yena akabalwanga kanye nalaba Labatsatfu. Davide wamenta indvuna yaleti letatisingatsa yena.

²⁴ Kuletingwazi letatingema-30 kwakunalaba: Asaheli, umnakaboJowabe, na-Eli Hanani, umsa waDodo, waseBhetlehema,

²⁵ naboShama na-Elika baseHarodi,

²⁶ naHelesi waseBhethi Phelethi, na-Ira, umsa wa-Ikheshi, waseThekhowa,

²⁷ na-Abiyezeri wase-Anathothi, naSibhekhayi waseHusha,

²⁸ naSalmoni wase-Ahoha, naMaharayi waseNethofa,

²⁹ naHeledi, umsa waBhana, waseNethofa, na-Ithayi, umsa waRibayi, waseGibeya kulakaBhenjamini,

³⁰ naBhenaya wasePhirathoni, naHidayi wasetihosheni taseGashi,

³¹ na-Abiyalboni wase-Abha, na-Azmavethi waseBhahurimu,

³² na-Eliyaba waseShalbimu, nemadvodzana aJasheni, naJonathani,

³³ umsa waShama, waseHarari, na-Ahiyamu, umsa waSharari, waseHarari,

³⁴ na-Elifeleti, umsa wa-Ahasbayi, waseMakha, na-Eliyamu, umsa wa-Ahithofeli, waseGilo,

³⁵ na-Hesro waseKhameli, na-Pharayi wase-Arabu,

³⁶ na-Igali, umsa waNathani, waseSobha, lotalwa nguHagri,

³⁷ naSeleki, um-Amoni, naNaharayi waseBherothi, labeludzibi lwaJowabe, umsa waSeruya,

³⁸ na-Ira waseJetheri, naGarebi waseJetheri,

³⁹ na-Uriya, umHethi. Babe ngema-37 sebabonkhe.