2 Samuweli 22 - Siswati 1996 Bible

Ingoma yaDavide yekudvumisa

¹ Davide wahlabela kuSimakadze emagama anansi ingoma, ngesikhatsi Simakadze amephula etandleni tato tonkhe titsa takhe nasesandleni saSawula.

² Davide watsi: “Simakadze ulidvwala lami, nenqaba yami, neMkhululi wami;

³ Nkulunkulu wami, ulidvwala lami lengiphephela kulo. Usihlangu sami sekungivikela nemandla ensindziso yami. Yena ungumgedze wami wekubhaca. Usiphephelo sami neMsindzisi wami. Etigebengwini, wena uyangisindzisa.

⁴ Ngikhala kuSimakadze, bese uyangephula etitseni tami. Akadvunyiswe Simakadze!

⁵ “Emagagasi ekufa angitungeleta; tikhukhula tembhubhiso tangigabudzela.

⁶ Tintsambo telithuna tatingitsandzele, tingibe tekufa tangintfonya.

⁷ Ngakhala kuSimakadze ngisekudzangaleni kwami, ngacela lusito kuNkulunkulu wami. Waliva livi lami asendlini yakhe. Kuncusa kwami, nekukhala kwami, nekuthandaza kwami kwangena etindlebeni takhe.

⁸ “Umhlaba watfutfumela, watamatama, tisekelo temazulu tatfutfumela, tatamatama, ngobe Somandla abesatfukutsele.

⁹ Emakhala akhe akhafula intfutfu; umlomo wakhe wakhephuta umlilo locotfulako, kuwo kwakhehleka emalahle labovu.

¹⁰ Wabhobosa emazulu, wehlela phansi. Emafu lamnyama abengaphansi kwetinyawo takhe.

¹¹ Wagibela likherubhi wandiza; wantjuza asetikwemaphiko emoya.

¹² Wenta bumnyama baba yingubo yakhe, watungeletwa ngemafu lahlomile, lamnyama.

¹³ Ebukhatikhatini bebukhona bakhe kwaphambana imibane nemalahle lavutsako.

¹⁴ Simakadze wabhavumula asezulwini. Losetikwako Konkhe walivakalisa livi lakhe.

¹⁵ Wajijimeta ngemicibisholo, kwasakateka titsa. Ngebumanyamanya bemibane watidzidzitelisa tasiphuka.

¹⁶ Kujula kwetilwandle kwenekeka ebaleni, tisekelo temhlaba tembuleka, ngenca yekutsetsa kwaSimakadze, nangenca yekufutsa kwemakhala akhe.

¹⁷ “Welula ingalo yakhe akulelisetulu, wayehlisela phansi, wangibamba, wangenyula ekujuleni kwemanti.

¹⁸ Wangephula esitseni sami lesinemandla, wangephula nakulabangitondzako, ngobe babenemandla kakhulu kunami.

¹⁹ Bangidvumela ngesikhatsi ngehlelwa sehlakalo; kodvwa Simakadze waba sihlangu sami.

²⁰ Wangikhiphela endzaweni lebanti; wangephula, ngobe abejabula ngami.

²¹ “Simakadze wangiphatsa njengekulunga kwami, wangivuza njengebumsulwa betandla tami,

²² ngobe imiyalo yaSimakadze ngiyigcinile. Angikenti lutfo lolubi, angikamfulatseli Nkulunkulu wami.

²³ Yonkhe imiyalo yaNkulunkulu isembikwami. Angikagucuki etimisweni takhe.

²⁴ Bengisolo ngite sici embikwakhe, ngitigcinile ngangete ngona.

²⁵ Ngako-ke Simakadze ungivuze njengekulunga kwami, wangivuza njengebumsulwa bami emehlweni akhe.

²⁶ “Kulowetsembekile wena utibonakalisa wetsembekile; kulongenacala wena utibonakalisa ucotfo.

²⁷ Kulohlantekile wena utibonakalisa uhlantekile, kodvwa kulosigwegwe wena utibonakalisa ulukhuni.

²⁸ Uyabasindzisa labatfobekile, kodvwa emehlo akho akulabatiphakamisako, kuze ubatfobise.

²⁹ Awu! Simakadze, wena usibane sami, Simakadze ugucula bumnyama bami abente bube kukhanya.

³⁰ Ngawe ngisengayidvungulula imphi. NgaNkulunkulu wami ngisengagalaja lubondza lwetitsa.

³¹ “Indlela yaNkulunkulu ilungile. Livi laSimakadze letsembekile. Yena usihlangu sabo bonkhe labaphephela kuye.

³² Kambe nje ngubani longuNkulunkulu ngaphandle kwaSimakadze? Ngubani lolidvwala ngaphandle kwaNkulunkulu wetfu?

³³ Nguye loNkulunkulu longihlomisa ngemandla, ente indlela yami icondze, ibe msulwa.

³⁴ Wenta tinyawo tami tibe lula njengetenyamatane, angente ngiphephele ekuphakameni.

³⁵ Yena wenta tandla tami tifundzele kulwa, kuze imikhono yami yetayele kugoba butjoki belitfusi.

³⁶ Ungihlomisa ngesihlangu sensindziso yakho; utehlisa wena kuze uphakamise mine.

³⁷ “Wentele tinyatselo tami indzawo lebanti, kuze emacakala ami angabhinyiliki.

³⁸ “Ngaticosha titsa tami, ngatifihlita, angizange ngincandzeke, ngingakaticedzi.

³⁹ Ngatiphahlata tonkhe ngaticedza. Tatingeke tiphindze tivuke, tawela ngaphansi kwetinyawo tami.

⁴⁰ Wangihlomisa ngemandla ekulwa imphi. Titsa tami watitfobisa ngaphansi kwami.

⁴¹ Titsa tami watidvungulula, tabaleka, ngabacedza bonkhe labangitondzako.

⁴² Bakhala bacela lusito, kodvwa kwabate lobasindzisako. Bahlaba inyandzaleyo kuSimakadze, kodvwa akazange abaphendvule.

⁴³ Ngabagaya baba njengelutfuli, baba njengelutfuli lwemhlaba. Ngabagcobagcoba ngagidza etikwabo njengeludzaka lwendlela.

⁴⁴ “Wangisindzisa embangweni wesive sakitsi, wangigcina ngaba yinhloko yetive. Sive lengingazange sengisati sangikhotsama.

⁴⁵ Betive beta kimi bakhasa, batsi bangangiva, bangihloniphe masinyane.

⁴⁶ Bonkhe baphelelwa ngemandla, beta bachachatela, baphuma emigedzeni yabo.

⁴⁷ “Simakadze uyaphila! Alidvunyiswe lidvwala lami! Akaphakanyiswe Nkulunkulu, Lidvwala lami, neMsindzisi wami!

⁴⁸ UnguNkulunkulu longiphindziselelako, lobeka tive ngaphansi kwami.

⁴⁹ Wangikhulula etitseni tami. Wangiphakamisa ngaba ngetulu kwalabo labemelene nami, wangephula kubantfu belutfutfuva.

⁵⁰ Ngako-ke ngiyawukudvumisa wena, Simakadze, emkhatsini wetive, ngikugambute ngetibongelelo teLibito lakho.

⁵¹ Nguwe, Nkhosi, umenti wankhulu, inkhosi yakho uyiphe kuncoba timphi ngetimphi, wentele logcotjiwe wakho umusa wakho longapheli, yebo, Davide netitukulwane takhe phakadze naphakadze.”