2 Samuweli 15 - Siswati 1996 Bible

Emalungiselelo a-Absalomu ekutsatsa umbuso ngendlovuyangena

¹ Emvakwaloko Absalomu watihlinzeka ngencola yemphi, nemahhashi kanye nemadvodza langema-50 kutsi ahambe embikwakhe.

² Abevuka ekuseni eme eceleni kwemgwaco lowawucondze esangweni lelidolobha laseJerusalema. Kwakutsi njalo nje nakufika umuntfu nesikhalo sakhe, lasiletse enkhosini, khona itewukhipha sincumo, Absalomu ambute atsi: “Uphuma kuliphi lidolobha?” umuntfu aphendvule atsi: “Inceku yakho iphuma kulesinye setive tema-Israyeli.”

³ Absalomu abevele akhulume atsi: “Uyabona, lentfo lokhala ngayo iyevakala, futsi iliciniso, kodvwa kute lomele inkhosi lotakuva loko.”

⁴ Abese uchubeka utsi: “Kube kwakhetfwa mine kutsi ngibe ngumehluleli walelive! Ngabe kutsi wonkhe lota kimi nesikhalo lesitsite, bese ngenta konkhe lokusemandleni ami kutsi ngikulungise.”

⁵ Lokunye kwakutsi nome ngubani lota kutawukhotsama embikwakhe, Absalomu elule sandla sakhe, ambambe, bese uyamanga.

⁶ Absalomu watiphatsa kanjena kuwo onkhe ema-Israyeli labefika atewucela kusitwa yinkhosi; ngaleyo ndlela wateba tonkhe tinhlitiyo temadvodza aka-Israyeli.

⁷ Ekupheleni kweminyaka lemine Absalomu wakhuluma enkhosini, watsi: “Ngicela kutsi sengimane ngiye eHebroni kuyawufeza sifungo sami lengasenta kuSimakadze.

⁸ Ngesikhatsi inceku yakho iseseGeshuri kulaseSiriya ngenta sifungo ngatsi: ‘Nangabe Simakadze angibuyisele eJerusalema, Simakadze ngiyakumkhonta eHebroni!’ ”

⁹ Inkhosi yakhuluma kuye yatsi: “Hamba kahle.” Ngako wavele waya eHebroni.

¹⁰ Absalomu wase utfumela titfunywa latiphatsisa imfihlo kuto tonkhe tive taka-Israyeli. Letitfunywa tatimemetela titsi: “Naniva kukhala kwemacilongo, nibotsi ‘Absalomu yinkhosi eHebroni.’ ”

¹¹ Emadvodza langema-200 labephuma eJerusalema abephekeletele Absalomu. Abemenywe njengetivakashi, avuma ahamba, angati lutfo ngaleyo ndzaba.

¹² Kwatsi Absalomu asanikela ngemhlatjelo, waphindze watfumela kwalandvwa Ahithofeli, umGilo, edolobheni lakubo laseGilo; Ahithofeli abengulomunye webeluleki baDavide. Ngako loluzungu lwacina, sibalo sebantfu lababelandzela Absalomu sandza.

Kubaleka kwaDavide eJerusalema

¹³ Sitfunywa sefika sabika kuDavide, satsi: “Tinhlitiyo tawo onkhe emadvodza aka-Israyeli setiku-Absalomu.”

¹⁴ Davide wakhuluma kuto tonkhe tindvuna takhe letatinaye eJerusalema, watsi: “Wotani! Asibalekeni, ngaphandle kwaloko kute nome munye lotawusindza ku-Absalomu. Asiphangise sibaleke, ngobe angahle asheshe asihlasele asibhubhise sonkhe nalelidolobha lonkhe ngelusiko lwenkemba.”

¹⁵ Letindvuna takhe, Davide, tamphendvula tatsi: “Tinceku takho setivele tikulungele kwenta loko lokukhetfwe yinkhosi yato.”

¹⁶ Inkhosi yaphuma yabaleka, ilandzelwa ngumndeni wayo wonkhe; kodvwa yashiya emaphovela ayo lalishumi kutsi asale anakekela sigodlo.

¹⁷ Ngako inkhosi yavele yaphuma yabaleka nesive sonkhe siyilandzela, base bema endzaweni letsite, bucamama.

¹⁸ Onkhe emadvodza ayo endlula eceleni kwayo kanye nawo onkhe emaKherethi nemaPhelethi, nawo onkhe emaGathi langema-600 labehamba nawo esuka eGathi, nawo futsi endlula embikwenkhosi.

¹⁹ Inkhosi yakhuluma ku-Ithayi, umGathi, yatsi: “Uhambelani natsi? Ncandzeka uyewuhlala nenkhosi yakho Absalomu, ungewetive lowatfunjwa eveni lakini.

²⁰ Ufike itolo loku. Lamuhla sengitakwenta uzulazule natsi, kantsi angati nalapho ngiya khona. Ncandzeka uhambe nesive sakho. Shangatsi umusa nekwetsembeka kungaba nawe.”

²¹ Kodvwa Ithayi waphendvula inkhosi, watsi: “Nkhosi, ngifunga kuphila kwaSimakadze, nangenkhosi yami lephilako ngitsi, lapho inkhosi yami iya khona, ekuphileni nasekufeni, nenceku yakho itakuya khona.”

²² Davide, inkhosi, waphendvula Ithayi, watsi: “Kulungile, chubeka, uhambe.” Ngako Ithayi, umGathi, wachubeka wahamba nawo onkhe emadvodza akakhe kanye nemindeni labehamba nayo.

²³ Kuyo yonkhe leyo ndzawo sive sakhala kakhulu sisendlula. Inkhosi nayo yewela Sigodzi seKhidroni, sonkhe sive sahamba sacondza ngasehlane.

²⁴ Sadoki naye abelapho naye, akanye nawo onkhe emaLevi, betfwele libhokisi lesivumelwane saNkulunkulu. Balibeka phansi libhokisi lesivumelwane saNkulunkulu, Abiyatha wase unikela ngemihlatjelo, baze baphuma bonkhe bantfu edolobheni.

²⁵ Inkhosi yakhuluma kuSadoki, yatsi: “Tsatsani lelibhokisi lesivumelwane nilibuyisele edolobheni. Nangitfole umusa emehlweni aSimakadze, utangibuyisa, angivumele ngiphindze ngilibone, kanye nendzawo lapho lihlala khona.

²⁶ Kodvwa nangabe utsi: ‘Angijabuli ngawe,’ sengikulungele loko; akente kimi loko lakubona kumlungele.”

²⁷ Inkhosi yaphindze yakhuluma kuSadoki, umphristi, yatsi: “Awusiye yini umboniswa? Ncandzeka ngekuthula wena na-Ahimasi, naJonathani, umsa wa-Abiyatha, nibuyele edolobheni. Wena na-Abiyatha tsatsani lamadvodzana enu omabili, nihambe nawo.

²⁸ Mine ngitawufike ngime ematubukweni ehlane, ngize ngitfole livi leliphuma kini.”

²⁹ Ngako boSadoki na-Abiyatha batsatsa lelibhokisi lesivumelwane saNkulunkulu balibuyisela emuva eJerusalema, bahlala khona lapho.

³⁰ Kodvwa Davide yena wachubeka wenyuka iNtsaba Yemincumo, ahambe akhala; inhloko yakhe yayimbonyiwe, nasetinyaweni angakafaki lutfo. Bonkhe bantfu lababenaye lapho babembonye tinhloko tabo, nabo benyuka bakhala.

³¹ Davide abesatjeliwe kwatsiwa: “Ahithofeli usemkhatsini walabo labenta luzungu lwekutsatsa bukhosi kanye na-Absalomu.” Ngako Davide wathandaza watsi: “Awu, Simakadze, gucula kweluleka kwa-Ahithofeli kube nebulima.”

³² Watsi kube Davide efike esicongweni, lapho sive sasivamise kukhontela Nkulunkulu khona, Hushayi, um-Akhi, abefike khona lapho kutakumhlangabeta, ingubo yakhe idzatjuliwe nasenhloko yakhe atitsele ngelutfuli.

³³ Davide wakhuluma kuye watsi: “Nawuhamba nami, utawuba ngumtfwalo kimi.

³⁴ Kodvwa nawungancandzeka ubuyele edolobheni ufike ukhulume ku-Absalomu utsi: ‘Ngitawuba yinceku yakho, nkhosi; kadze ngiyinceku yeyihlo, kodvwa manje ngitawuba yinceku yakho,’ ngaleyo ndlela utangisita ekugwegwiseni teluleko ta-Ahithofeli.

³⁵ Bangeke yini baphristi boSadoki na-Abiyatha babe nawe lapho? Batjele konkhe lokuvako esigodlweni senkhosi.

³⁶ Emadvodzana abo lamabili, bo-Ahimasi, umsa waSadoki, naJonathani, umsa wa-Abiyatha, anabo khona lapho. Batfumele lapha kimi baletse umlayeto ngako konkhe lokuvile.”

³⁷ Ngako Hushayi, umngani waDavide, wefika ngesikhatsi Absalomu angena nje edolobheni, eJerusalema.