2 Samuweli 11 - Siswati 1996 Bible

BoDavide naBhatisheba

¹ Kwatsi entfwasahlobo lelandzelako, ngesikhatsi emakhosi laphuma ngaso timphi, Davide yena watfumela Jowabe, wamkhipha kanye netindvuna takhe kanye nayo yonkhe imphi yema-Israyeli. Bafike babhubhisa ema-Amoni, bavimbetela lidolobha laseRabha. Davide yena abesele eJerusalema.

² Kwatsi ngalelinye lilanga kusihlwa Davide wavuka embhedzeni wakhe, wahambahamba etulu endlini yakhe yebukhosi. Watsi aselapho, wabona umfati ageza. Lomfati abemuhle, acedzile.

³ Davide wase utfumela umuntfu kuyawubuta kutsi ungubani. Lomuntfu wakhuluma watsi: “Phela lowo nguBhatisheba, indvodzakati ya-Eliyamu; ungumka-Uriya, umHethi.”

⁴ Davide wase uyatfumela kutsi akalandvwe. Wefika kuDavide, Davide wamtsatsa, walala naye. Bhatisheba abesandza kucedza kutihlambulula ekungcoleni kwakhe. Wase uyancandzeka ubuyela ekhaya.

⁵ Bhatisheba wase uyatibona kutsi sewutetfwele, wase utfumela ligama kuDavide, wamatisa watsi: “Sengitetfwele.”

⁶ Davide watfumela ligama kuJowabe atsi: “Ngitfumelele Uriya, umHethi.” Ngako Jowabe watfumela Uriya kuDavide.

⁷ Watsi nakefika Uriya, Davide wambuta Jowabe kutsi unjani, nekutsi emabutfo wona anjani, nekutsi imphi ichubeka kanjani.

⁸ Davide wase utsi ku-Uriya: “Yehla uye ekhaya kakho uyewuphumula sikhashana.” Ngako Uriya waphuma esigodlweni; inkhosi yatfumela sipho ekhaya ka-Uriya.

⁹ Kodvwa Uriya akazange aye ekhaya lakhe, walala emasangweni esigodlo kanye naletinye tinceku tenkhosi yakhe.

¹⁰ Watsi Davide nakeva kutsi Uriya akayi ekhaya kakhe, wambuta, watsi: “Awukayi ngani ekhaya lakho? Angitsi uyefika nje ubuya khashane?”

¹¹ Uriya waphendvula Davide watsi: “Libhokisi lesivumelwane nemadvodza aka-Israyeli newakaJuda asemathendeni kanye nendvuna yami Jowabe netindvuna takhe bakambe ebaleni esigangeni. Pho, mine ngingaya kanjani ekhaya lami ngiyekudla, nginatse, ngilale kumkami? Ngifunga ngawe nangemphefumulo wakho, ngitsi: Ngingeke sengiyente mine intfo lenjalo!”

¹² Davide wase ukhuluma utsi: “Ase uhlale natsi-ke lonkhe lelilanga lalamuhla, ngitakuncandzekisa kusasa.” Ngako Uriya wahlala eJerusalema lonkhe lelo langa, nangakusasa kwakhona.

¹³ Davide wammema kutsi atewudla kanye naye ekudleni kwakusihlwa, wamklinkla ngetjwala, entela kutsi adzakwe. Kodvwa nangalobo busuku Uriya akazange aye ekhaya lakhe, wesuka walala kanye naletinye tinceku tenkhosi yakhe esigodlweni.

¹⁴ Ekuseni ngakusasa Davide wabhala incwadzi, wabhalela Jowabe, wayiphatsisa Uriya.

¹⁵ Kulencwadzi abebhale watsi: “Beka Uriya embili lapho imphi ishisa ngakhona. Bese niyakhwesha kuye, nentele kutsi atewubulawa.”

¹⁶ Ngako kwatsi Jowabe nasavimbetele lidolobha, wabeka Uriya endzaweni lapho abati kahle khona kutsi titsa tinemandla.

¹⁷ Emabutfo etitsa atsi nasaphumela ngaphandle kwelidolobha, ahlasela Jowabe kanye nemabutfo akhe, letinye tihlabani letibalulekile taDavide tabulawa kanye na-Uriya, umHethi, tafa.

¹⁸ Jowabe wase utfumela kuDavide umbiko lophelele ngekuchubeka kwemphi.

¹⁹ Wayala lesitfunywa watsi: “Nasewucedzile kunika inkhosi lombiko ngalemphi,

²⁰ inkhosi ingahle ikuvutsele ngelukaka, bese iyabuta itsi: ‘Nisondzeleleni madvutane kangako nelidolobha kuyakulwa nalo? Beningati yini kutsi bangahle banijijimete ngetikhali lapha etulu elubondzeni?

²¹ Ngubani lowabulala Abimeleki, umsa waJerubheshethi? Akabulawanga yini ngumfati lowehlisela imbakadza yelitje etikwakhe asetulu elubondzeni, kuze afele eThebesi? Benisondzelelani ngaphansi kwalolubondza?’ Nakakubuta konkhe loko, umtjele utsi: ‘Nenceku yakho Uriya, umHethi, ifile.’ ”

²² Lesitfunywa saphuma sahamba, satsi kube sifike kuDavide, samtjela konkhe lesasikutfunywe nguJowabe kutsi sikusho.

²³ Lesitfunywa satsi kuDavide: “Lemphi isengeme futsi iphume yahlangabetana natsi ebaleni, kodvwa sibadvudvule sayawubabeka esangweni lelidolobha.

²⁴ Banembi bakhona base bajijimeta tinceku takho basetulu elubondzeni, lamanye emadvodza enkhosi afa. Ngetulu kwaloko kufe nenceku yakho Uriya, umHethi.”

²⁵ Davide watsi kulesitfunywa: “Ubofike utjele Jowabe utsi: ‘Kungakujabhisi loku; umkhonto udla umuntfu njengalomunye. Cinisa kakhulu uhlasele lelo dolobha ulibhubhise.’ Khuluma loko ukhutsate Jowabe.”

²⁶ Umka-Uriya watsi kube eve kutsi indvodza yakhe seyifile, wayizilela.

²⁷ Kwatsi nase siphelile sikhatsi sekumzilela, Davide watsi akalandvwe aletfwe kakhe. Wabe sewumenta umfati wakhe, wamtalela indvodzana. Kodvwa lentfo leyayentiwe nguDavide yaba yimbi emehlweni aSimakadze.