2 Samuweli 1 - Siswati 1996 Bible

Kuva kwaDavide ngekufa kwaSawula

¹ Emvakwekufa kwaSawula, Davide wancandzeka nasancobe ema-Amaleki, wafike wahlala eSikilagi emalanga lamabili.

² Ngelilanga lesitsatfu kwefika indvodza iphuma enkambu yaSawula, inetimphahla tayo letidzabukile kanye nelutfuli enhloko. Yatsi nayifika kuDavide, yawa phansi, yakhotsama, imhlonipha.

³ Davide wayibuta watsi: “Uphumaphi?” Yaphendvula yatsi: “Ngibaleke enkambu yaka-Israyeli.”

⁴ Davide wayibuta watsi: “Kwenteke njani? Ngitjele.” Yamphendvula yatsi: “Emadvodza abalekile ashiya imphi. Linyenti lawo ligwaziwe lafa. NaboSawula nemsa wakhe Jonathani bafile.”

⁵ Davide wakhuluma kulelijaha lelalimletsele lombiko, watsi: “Wati ngani kutsi Sawula nemsa wakhe Jonathani bafile?”

⁶ Lelijaha latsi: “Kwentekile ngaba setikwentsaba iGilbowa, ngabona Sawula eyeme etikwesikhali sakhe, tincola kanye nebagibeli bemahhashi sekusondzele kutawukhwela etikwakhe.

⁷ Watsi kube agucuke angibone, wamemeta, mine ngabuta ngatsi: ‘Yini nje lengingayenta?’

⁸ “Wase uyangibuta watsi: ‘Ungubani wena?’ “Mine ngamphendvula ngatsi: ‘Ngingum-Amaleki.’

⁹ “Wabe sewukhuluma kimi utsi: ‘Mani lapha ngenhla kwami ungibulale! Sengisemlonyeni wekufa, kodvwa seloku ngisaphila.’

¹⁰ “Ngako ngivele ngema ngenhla kwakhe, ngambulala, ngobe ngatile kutsi njengobe asawile angeke aphindze asindze. Ngibese ngitsatsa lomchele lobewusenhloko yakhe kanye nelibhengela lelisemkhonweni wakhe, ngakuletsa lapha enkhosini yami.”

¹¹ Davide kanye nawo onkhe emadvodza labenawo badzabula tembatfo tabo.

¹² Balila bakhala kwaze kwaba nguntsambama, bazilela Sawula, nemsa wakhe Jonathani, nemabutfo aSimakadze, nesive sema-Israyeli, ngobe babebulewe ngenkemba.

¹³ Davide wabuta lelijaha lelaliletse lombiko kuye, watsi: “Wena uphumaphi?” Laphendvula latsi: “Mine ngiyindvodzana yemuntfu wesive, um-Amaleki.”

¹⁴ Davide wambuta watsi: “Wena awukesabi ngani kuphakamisa sandla sakho nekubulala umgcotjwa waSimakadze?”

¹⁵ Ngako Davide wabita lenye yalamadvodza, watsi kuyo: “Hamba kuye, umbulale!” Wavele wambulala, wafa.

¹⁶ Ngobe Davide abetsite kuye: “Ingati yakho itawubasetikwakho. Nemlomo wakho ukulahla ngebufakazi, nawutsi: ‘Ngibulele logcotjiwe waSimakadze.’ ”

Kulila kwaDavide, alilela boSawula naJonathani

¹⁷ Davide washo nasi sililo, alilela Sawula nemsa wakhe Jonathani,

¹⁸ wakhipha nemlayeto kutsi emadvodza akaJuda afundziswe lesililo sebutjoki. Sibhalwe encwadzini yaJasheri:

¹⁹ “Bukhosi bakho, Israyeli, bulele phansi, bubulawelwe etintsabeni. Emachawe lanemandla kakhulu asawile!

²⁰ “Loku akusiwumenyetelwa eGathi, kungakhulunywa nasetitaladini tase-Ashkeloni, funa emadvodzakati emaFilisti ajabule, funa emadvodzakati alabangakasoki atfokote.

²¹ “Nine tintsaba taseGilbowa, shangatsi ningabate ematolo nemvula, nibete nemasimi laneminikelo yalokutinhlavu. Ngobe lihawu lalabanemandla lilele ehlazweni, lihawu laSawula alisamanyateliswa ngemafutsa.

²² Engatini yalabagwaziwe nasetidvunjini temachawe, butjoki baJonathani bashaya bacotfula, nenkemba yaSawula ayibuyanga yabayaba.

²³ “Sawula naJonathani basaphila babetsandvwa, baligugu, nasekufeni abazange behlukane. Bebanematubane kwendlula emangce, bebanemandla kwendlula emabhubesi.

²⁴ “Awu, madvodzakati aka-Israyeli, lilelani Sawula. Wanembatsisa ngaletibovu naleticolisakele, wahlobisa tingubo tenu ngemihlobiso yegolide.

²⁵ “Emachawe lanemandla awile emphini! Jonathani ulele, ubulawelwe etintsabeni takho.

²⁶ “Ngiyakukhalela, mnaketfu Jonathani, bewuligugu kimi! Lutsandvo lwakho kimi belumangalisa, lumangalisa kwendlula lwalabasikati.

²⁷ “Emachawe lanemandla awile! Tikhali temphi nato setibhubhile.”