2 kubaseThesalonika 3 - Siswati 1996 Bible

Kukhulekelana

¹ Kwekugcina-ke, bazalwane, sithandazeleni, kuze kutsi livi leNkhosi lichubeke landze ngekushesha, lemukeleke ngeludvumo, njengobe kwaba njalo nakini.

² Nisithandazele nekutsi sikhululeke kubantfu labonakele nalababi, ngobe akusibo bonkhe labakholwako.

³ Kodvwa iNkhosi yetsembekile, iyawunicinisa, ineluse, iniphephise kuLomubi.

⁴ Sinesibindzi eNkhosini ngani ngekutsi tonkhe letintfo lesiniyala ngato niyatenta, futsi niyawuhlala nitenta.

⁵ Shangatsi iNkhosi ingacondzisa tinhlitiyo tenu elutsandvweni lwaNkulunkulu nasekubeketeleni kwaKhristu.

Umyalo ngekukhutsala

⁶ Siyaniyala, bazalwane, egameni leNkhosi Jesu Khristu kutsi nibagege bazalwane labangemavila nalabangayilandzeli imiyalo lesaninika yona.

⁷ Ngobe nani matfupha niyati kutsi kufanele nisilingise njani, tsine asizange sesivilaphe ngesikhatsi sisesemkhatsini wenu,

⁸ sasingadli sinkhwa semuntfu singakasikhokheli; kodvwa sasidla ngekukhandleka sishikashikeka imini nebusuku, kuze kutsi singasindzi ngisho namunye wenu.

⁹ Loko asikwentanga ngobe site lilungelo lekufuna emaholo etfu, kodvwa kuze sibe sibonelo sekutsi nisilingise.

¹⁰ Ngesikhatsi sisenani saneluleka satsi: “Nakukhona longasebenti, akasikudla.”

¹¹ Siyeva kutsi labanye emkhatsini wenu abasebenti, abenti lutfo ngaphandle kwekutigaca etindzabeni talabanye bantfu.

¹² Bantfu labanjalo siyabayala sibakhutsata eNkhosini Jesu Khristu kutsi abatiphatse kahle bente imisebenti yabo, kuze badle titfukutfuku tabo.

¹³ Bazalwane, ningadzinwa kwenta lokuhle.

¹⁴ Nangabe kukhona longafuni kulalela loku lesikushoko kulencwadzi, mbukisiseni, ningahlanganyeli naye, khona atewudliwa ngemahloni.

¹⁵ Noko ningamtsatsi njengesitsa, kodvwa nimeluleke njengemzalwane.

Emavi ekugcina nesibusiso

¹⁶ Shangatsi iNkhosi lengumtfombo wekuthula inganinika kuthula ngaso sonkhe sikhatsi ngetindlela tonkhe. INkhosi ayibe nani nonkhe.

¹⁷ Mine Pawula ngibhala lomkhontiso ngesandla sami, lolu luphawu lengilubhala kuto tonkhe tincwadzi tami.

¹⁸ Umusa weNkhosi yetfu Jesu Khristu awube nani nonkhe.