2 kubaseKorinthe 9 - Siswati 1996 Bible

Lusito lwemaKhristu

¹ Mayelana nekunikelela bazalwane, asikho sidzingo sekutsi nginibhalele.

² Ngiyati kutsi nitimisele kangakanani kusita. Ngiko loko lengiyaye ngitigcabhe ngako kubaseMasedoniya, ngibatjela kutsi base-Akhaya bese bavele bakulungele kunikela khona nyakenye. Inshisekelo yenu ibavusele umdlandla labanyenti.

³ Kodvwa labazalwane ngibatfumelele kutsi kube bufakazi kutsi konkhe loko lesakusho sitigcabha ngani kulendzaba kuliciniso. Ngifuna nihlale nilungele;

⁴ ngobe phela nangingafika nemaMasedoniya sikhandze ningakalungeli, tsine nani siyawuba nemahloni, ngobe besinetsembe kakhulu.

⁵ Ngiko nje ngibone kufanele kutsi ngicele labazalwane bahambe embili bete lapho kini, batewulungisa lesipho lenisetsembisile, kuze kutsi sihlale sesilungile, hhayi ngekuphocelelwa, kodvwa ngesihle.

⁶ Khumbulani naku: Lowo lohlanyela kancane, uyawuvuna kancane; lowo lohlanyela kakhulu, uyawuvuna kakhulu.

⁷ Lowo nalowo akatincumele yena enhlitiyweni yakhe kutsi utawunikela kangakanani, bese unikela ngekukhululeka, hhayi ngekusola nangekucindzetelwa. Nkulunkulu utsandza umuntfu lonikela ngenhlitiyo lemhlophe.

⁸ Nkulunkulu unawo emandla ekuninika konkhe lenikudzingako, nangetulu kwako, kuze kutsi ngaso sonkhe sikhatsi nibe nako kube kunyenti, nitekwati kusita emisebentini yonkhe lemihle.

⁹ NemBhalo utsi: “Wenetisa ngekukhululeka, aphe labaphuyile; kulunga kwakhe kungeke kuphele phakadze naphakadze.”

¹⁰ Lowo lonika inhlanyelo kumhlanyeli ephane ngesinkhwa sekudliwa, uyawuninika inhlanyelo aphindze ayente imile ikhule, asandzise nesivuno sekunikela kwenu ngekwephana.

¹¹ Uyawunipha konkhe lokuhle, kuze nikwati kwephana ngato tonkhe tindlela; loko kuyakwenta labanye babonge Nkulunkulu ngetipho tenu labatitfole ngatsi.

¹² Ngobe lenkonzo lesiyentako ayisiti labangcwele kuphela, kodvwa iphuphuma ngekutsi labanyenti babonge Nkulunkulu.

¹³ Bantfu bayawudvumisa Nkulunkulu ngalenkonzo yenu lefakazela kulalela kwenu liVangeli laKhristu, lelisivumo senu. Lokusitana kufakazela kwephana kwenu ngekubanikelela bona kanye nabo bonkhe labanye.

¹⁴ Bayawubona bukhulu bemusa waNkulunkulu kini, bese bafisa kakhulu kuhlanganyela nani emthandazweni.

¹⁵ Akabongwe Nkulunkulu ngesipho sakhe lesingachazeki.