2 kubaseKorinthe 13 - Siswati 1996 Bible

Imiyalo yekugcina

¹ Sekwesitsatfu ngilungiselela kuta lapho kini. “Yonkhe inkhulumo yenu iboba nabofakazi lababili nome labatsatfu,” njengobe kusho umBhalo.

² Ngabecwayisa labo labona kucala, namanje futsi ngiyabecwayisa naloku ngingekho, njengobe ngabatjela nangilapho ekuvakasheni kwami kwesibili kutsi nangingefika lapho ngiyakubashiya emehlo ekubuka,

³ njengobe nifuna siciniseko kutsi Khristu ukhuluma kimi. Yena angeke aniphatse ngebutsakatsaka, kodvwa unemandla kini.

⁴ Ngobe wabetselwa ebutsakatsakeni, kodvwa sewuphila ngemandla aNkulunkulu. Sibutsakatsaka kuye, kodvwa sitawuphila kanye naye ngemandla aNkulunkulu, kuze sikwati kunisita.

⁵ Tihlolisiseni nine ngekwenu nitibone kutsi nibambelele yini ekukholweni kwenu. Tivivinyeni nine. Aniboni yini kutsi Jesu Khristu ukini? Ngaphandle kwaloko nitehluleki!

⁶ Ngiyetsemba niyawukhandza kutsi asikehluleki.

⁷ Kodvwa sithandaza kuNkulunkulu kutsi ningoni, hhayi kutsi sibonakale singulabancono, kodvwa kuze nente loko lokufanele, nome kungabonakala shangatsi sehlulekile.

⁸ Ngobe site emandla ekwenta lutfo, nasimelene neliciniso, kodvwa sinawo kuphela nasimele liciniso.

⁹ Ngobe tsine siyajabula nangabe nine nicinile nome tsine sibutsakatsaka. Sithandazela kutsi nine nipheleliswe kuKhristu.

¹⁰ Loku ngikubhala ngisengakefiki kini, kuze kutsi nangifika lapho kungadzingeki kutsi nginiphatse ngesandla lesimatima lenginikwe sona yiNkhosi, kutsi ngakhe, ngingahliphiti.

Siphetfo

¹¹ Kwekugcina-ke bazalwane, ngitsi: Salani kahle. Lungisani imihambo yenu, netsabele kwemukela imiyalo, nivumelane, nihlalisane ngekuthula, khona Nkulunkulu wekuthula newelutsandvo atewuba nani.

¹² Bingelelanani ngekwangana lokungcwele. Bayanihambisa bonkhe bazalwane.

¹³ Umusa weNkhosi Jesu, nelutsandvo lwaNkulunkulu, nebudlelwane baMoya Longcwele akube nani nonkhe.