2 Emakhosi 4 - Siswati 1996 Bible

Kusitwa kwemfelokati lophuyile ngu-Elisha

¹ Umfati walomunye webaphrofethi wakhala ku-Elisha, watsi: “Inceku yakho, lebekuyindvodza yami, seyifile; nawe uyati kutsi beyesaba Simakadze. Manje lomuntfu lebeyimkweleda uyeta utawutsatsa lamadvodzana ami lamabili, kutsi ayekuba tigcili takhe.”

² Elisha wambuta watsi: “Pho, ngingakusita ngani? Ngitjele kutsi unani endlini yakho?” Lomfelokati wamphendvula, watsi: “Incekukati yakho kute lenako ekhaya, ngaphandle kwemafushana nje lamancane.”

³ Elisha watsi: “Hamba ucele bonkhe bomakhelwane bakho bakunike tindziwo letingenalutfo. Ungaticeli tibe mbalwa.

⁴ Ubobe sewuyangena wena nemadvodzana akho, bese nitivalela ngekhatsi. Ubotsela lamafutsa kuto tonkhe tindziwo, lutsi lolo nalolo ludziwo lungagcwala ulubeke eceleni.”

⁵ Wesuka lomfelokati ku-Elisha. Emvakwaloko lomfelokati nemadvodzana akhe bangena endlini, bavala umnyango. Lomfelokati wacala watsela emafutsa etindziweni, emadvodzana akhe amniketa letindziwo, yena wachubeka nekutsela ekhatsi.

⁶ Tatsi nase tigcwele tonkhe letindziwo, wabuta kutsi lusekhona yini lolunye ludziwo. Lenye yemadvodzana akhe yaphendvula, yatsi: “Sekute ludziwo lolusasele.” Emafutsa ase ayancamuka kutfululeka.

⁷ Wahamba wayawubikela lomuntfu waNkulunkulu, wafike waphendvula watsi: “Hamba uyewutsengisa lamafutsa, bese ukhokha leto tikwelede takho. Wena nemadvodzana akho sewutawuphila ngaloko lokutawusala.”

Elisha nemfati lonjingile waseShunemu

⁸ Ngalelinye lilanga Elisha waya eShunemu. Kwakukhona umfati labenjingile kuleyo ndzawo, wacela Elisha kutsi aphambukele kakhe, khona atewutfola lokuya ngasetfunjini. Ngako abetsi njalo nje nakendlula kuleyo ndzawo, aphambukele kuyawudla.

⁹ Lomfati wase ukhuluma nendvodza yakhe, watsi: “Ngiyati kutsi lendvodza levamise kuphambukela lapha ekhaya ingumuntfu longcwele waNkulunkulu.

¹⁰ Asakhe likamelo lelincane etikwendlu, bese sifaka umbhedze, nelitafula, nesitulo kanye nesibane ngekhatsi. Kutabotsi njalo nje nakendlula, angene, ahlale khona, nakete lapha kitsi.”

¹¹ Ngalelinye lilanga watsi Elisha nakefika, wenyukela ekamelweni lakhe lelalisetulu, wafike wacambalala.

¹² Wakhuluma kuGehazi, inceku yakhe, watsi: “Ase ubite lomfati waseShunemu.” Ngako wambita, wafike wema embikwakhe.

¹³ Elisha wakhuluma kuGehazi, watsi: “Mtjele utsi: ‘Seningene kuyo yonkhe lenhlupheko ngenca yetfu. Manje wena ungentelwani? Singakukhulumela yini enkhosini nome endvuneni yemphi?’ ” Lomfati waphendvula, watsi: “Nginemuti lena kubantfu besive sakitsi.”

¹⁴ Elisha wabuta, watsi: “Yini longentelwa yona?” Gehazi waphendvula, watsi: “Empeleni, akanandvodzana, kantsi nendvodza yakhe seyikhule kakhulu.”

¹⁵ Elisha watsi: “Mbite.” Wambita; weta wafike wema ngasemnyango.

¹⁶ Elisha wakhuluma kulomfati, watsi: “Cishe ngalesikhatsi ngemnyaka lotako, utawube ugone indvodzana.” Lomfati wekhuta imihlolo, watsi: “Cha, nkhosi yami, incekukati yakho ungayiyengi, muntfu waNkulunkulu!”

¹⁷ Kodvwa lomfati wakhulelwa, kwatsi ngemnyaka lolandzelako wabeleka indvodzana, cishe ngasona leso sikhatsi lesasibekwe ngu-Elisha; kwaya njengobe Elisha abeshito.

¹⁸ Lomntfwana wakhula, kwatsi ngalelinye lilanga waphuma waya kuyise, labenebavuni ensimini.

¹⁹ Lomfana wakhala kuyise watsi: “Ngafa yinhloko! Ngafa yinhloko!” Uyise watfuma sisebenti watsi: “Mtsatse ummikise kunina.”

²⁰ Satsi lesisebenti kube simetfwale, safike samnika unina. Lomfana wagona kunina kwaze kwaba ngusemini, wabe sewuyafa.

²¹ Unina wenyuka naye wafike wambeka etikwembhedze wemuntfu waNkulunkulu; wavala umnyango, waphumela ngephandle.

²² Wabita indvodza yakhe, watsi kuyo: “Ngicela lesinye setisebenti kanye nembongolo, khona ngitekuya kulomuntfu waNkulunkulu ngekushesha, ngiphindze ngibuye.”

²³ Yabuta yatsi: “Pho, uyelani kuye lamuhla? Isengaketfwasi inyanga, futsi akusilo neliSabatha.” Lomkakhe watsi: “Kulungile.”

²⁴ Wekhweta sihlalo embongolweni, watsi kulenceku: “Hamba embili; ungahambi kancane ungakatjelwa ngimi.”

²⁵ Ngako waphuma wahamba, waze wefika kulomuntfu waNkulunkulu eNtsabeni iKhameli. Watsi nakabona lomfati asesekhashane, wakhuluma kuGehazi, inceku yakhe, watsi: “Ase ubuke! Nanguya lomfati waseShunemu!

²⁶ Gijima uyekumhlangabeta, ufike umbute utsi: ‘Uyaphila yini? Isaphila yini indvodza yakhe? Umntfwana wakho yena usaphila yini?’ ” Lomfati waphendvula watsi: “Konkhe kuhamba kahle.”

²⁷ Watsi kube efike kulomuntfu waNkulunkulu entsabeni, wabamba tinyawo ta-Elisha. Gehazi weta kuye wafike wamfuca, amkhweshisa; kodvwa lomuntfu waNkulunkulu watsi: “Myekele! Uselusizini lolukhulu, kodvwa Simakadze ungifihlele loko, futsi nami abesengakangitjeli.”

²⁸ Lomfati wakhuluma watsi: “Ngake ngayicela yini kuwe indvodzana, nkhosi yami? Angikutjelanga yini ngatsi: ‘Ungangivuseli litsemba’?”

²⁹ Elisha wakhuluma kuGehazi, watsi: “Shesha uvunule, utsatse indvuku yami uyiphatse ngesandla sakho, ugijime. Lohlangana naye endleleni, ungambingeleli, kantsi nakukhona lokubingelelako, ungavumi. Lendvuku yami ubofike uyibeke etikwebuso balomfana.”

³⁰ Kodvwa unina walomntfwana wakhuluma, watsi: “Ngifunga ngekuphila kwaSimakadze nangekwakho, ngitsi ngingeke ngisuke kuwe.” Ngako Elisha wavele wasukuma walandzela lomfati.

³¹ Gehazi wahamba embili, wafike wabeka lendvuku etikwebuso balomfana, kodvwa kwabate umsindvo nome ingucuko. Ngako Gehazi wase uyancandzeka uhlangabeta Elisha, wafike wamtjela, watsi: “Lomfana akavuki.”

³² Watsi kube Elisha efike kulendlu, wakhandza lomfana afile, alele embhedzeni wakhe.

³³ Wangena, wabavalela umnyango bobabili, wase uthandaza kuSimakadze.

³⁴ Wekhwela embhedzeni, wabhabhalala etikwalomfana, umlomo wacondzana nemlomo, emehlo acondzana nemehlo, tandla tacondzana netandla. Watsi asatelula etikwakhe, umtimba walomfana wafutfumala.

³⁵ Elisha wesuka lapho wahambahamba lapha ekamelweni, waphindze wabhabhalala etikwalomfana. Lomfana watsimula kasikhombisa, wase uvula emehlo.

³⁶ Elisha wabita Gehazi, watsi kuye: “Bita lomfati waseShunemu.” Wambita. Watsi kube efike, watsi kuye: “Tsatsa indvodzana yakho.”

³⁷ Lomfati wangena, wawela etinyaweni ta-Elisha, wakhotsamela emhlabatsini. Wase utsatsa lendvodzana yakhe, waphuma nayo.

Timangaliso letinye letimbili

³⁸ Elisha wancandzeka wabuyela eGilgali; bekunendlala kuleso sifundza. Satsi lesicumbi sebaphrofethi sisahlangene naye, wakhuluma kulenceku yakhe, watsi: “Ase ubeke libhodo lelikhulu etiko, uphekele nankha emadvodza sitjulo.”

³⁹ Lomunye wabo wahamba waya ematsafeni wayakukha imibhidvo, wakhandza intsandzela. Wabutsa lamanye emaselwa kuyo wawagcwalisa engutjeni yakhe. Watsi kube efike ekhaya, wawacoba wawafaka ekhatsi kulelibhodo lesitjulo, nome labanye babengati kutsi kuyini.

⁴⁰ Lesitjulo saphakelwa lamadvodza, kodvwa batsi basacala nje kudla, bakhala batsi: “Hawu, muntfu waNkulunkulu! Kunekufa lapha ebhodweni!” Base bayakuyekela kukudla.

⁴¹ Elisha watsi: “Letsani fulaha.” Wase umfaka ekhatsi ebhodweni, watsi: “Phakelani labantfu badle.” Kwabate lokwaba yingoti ebhodweni.

⁴² Kwabe sekufika indvodza leyayiphuma eBhali Shalisha, iletsele lomuntfu waNkulunkulu imikhama yetinkhwa letingema-20 tebhali yetilinga kanye netihloko takolo lomusha emnyakeni. Elisha wakhuluma watsi: “Nika labantfu batekudla.”

⁴³ Inceku yakhe yabuta, yatsi: “Ngingabaphakela kanjani lentfo lencane bantfu labalikhulu?” Kodvwa Elisha waphendvula, watsi: “Nika labantfu badle. Ngobe nguloko lokushiwo nguSimakadze, utsi: ‘Bayawukudla, kuze kusale.’ ”

⁴⁴ Wabe sewuyabaphakela, wakubeka embikwabo, badla, kwaze kwasala; kwaya njengekwelivi laSimakadze.