2 Emakhosi 3 - Siswati 1996 Bible

Kulwa kwema-Israyeli nemaMowabi

¹ Joramu, umsa wa-Ahabi, waba yinkhosi yaka-Israyeli, eSamariya, emnyakeni weli-18 wekubusa kwaJehoshafati, inkhosi yakaJuda; wabusa iminyaka leli-12.

² Wenta lokubi emehlweni aSimakadze, noko hhayi njengaboyise nenina. Wesusa litje laBhali lelalakhiwe nguyise.

³ Noko wajinge wanamatsela etonweni taJerobowamu, umsa waNebati, leto ladvonsela ngato sive saka Israyeli ekoneni; akazange esuke kuto.

⁴ Mesha, inkhosi yakaMowabi, abefuye timvu, abevamise kwetfula enkhosini yaka-Israyeli emazinyane ato lati-100 000 kanye navolo wetihhanca letiti-100 000.

⁵ Kodvwa watsi kube Ahabi afe, inkhosi yakaMowabi yavukela inkhosi yaka-Israyeli.

⁶ Ngako ngaleso sikhatsi inkhosi Joramu yesuka eSamariya, yahlomisa sive sonkhe saka-Israyeli.

⁷ Waphindze watfumela umlayeto kuJehoshafati, inkhosi yakaJuda, watsi: “Inkhosi yakaMowabi seyingivukele. Ungete wangelekelela yini uhambe nami siyekulwa naMowabi?” Waphendvula watsi: “Ngitakuhamba nawe. Mine nginguwe, nesive sami sakho, kantsi futsi nemahhashi ami ngakho.”

⁸ Wachubeka wabuta watsi: “Nguyiphi indlela lesitawuhamba ngayo nasiyawuhlasela?” Wayiphendvula watsi: “Sitawuhamba sidzabule liHlane laka-Edomu.”

⁹ Ngako inkhosi yaka-Israyeli yaphuma ihambisana nenkhosi yakaJuda kanye nenkhosi yaka-Edomu. Emvakwemalanga lasikhombisa lamabutfo ashuca agega, aphelelwa ngemanti wona kanye netifuyo tawo tekwetfwala imitfwalo.

¹⁰ Inkhosi yaka-Israyeli yekhuta umhlolo, yatsi: “Ini! Simakadze ngabe usibitele ndzawonye, tsine makhosi lamatsatfu kutsi atesiniketa esandleni saMowabi?”

¹¹ Kodvwa Jehoshafati wabuta, watsi: “Kute yini lapha umphrofethi waSimakadze, kuze siyewubuta ngaye kuSimakadze?” Indvuna yenkhosi yaka-Israyeli yaphendvula, yatsi: “Elisha, umsa waShafati, ulapha. Abevamise kutsela emanti etandleni ta-Elija.”

¹² Inkhosi Jehoshafati yatsi: “Livi laSimakadze likuye.” Ngako inkhosi yaka-Israyeli, neyakaJuda kanye neyaka-Edomu ehla aya kuye.

¹³ Elisha wakhuluma enkhosini yaka-Israyeli, watsi: “Sihlangene ngani nje tsine nawe? Hamba uye kubaphrofethi beyihlo nakubaphrofethi benyoko uyewubuta kubo.” Inkhosi yaka-Israyeli yaphendvula, yatsi: “Cha, kungobe nguSimakadze lobitele tsine, makhosi lamatsatfu, ndzawonye, kuze asinikele esandleni saMowabi.”

¹⁴ Elisha watsi: “Ngifunga kuphila kwaSimakadze longuSomandla nalengimkhontako ngitsi kube bengingahloniphi Jehoshafati, inkhosi yakaJuda, ngabe angikubuki nekukubuka, futsi bengingeke ngikunake.

¹⁵ Kodvwa letsa lapha umdlali welihabhu.” Watsi umdlali welihabhu asadlala, sandla saSimakadze sehlela ku-Elisha,

¹⁶ wabe sewutsi: “Naku-ke Simakadze lakushoko: ‘Yenta lesihosha sigcwale tikhilikitsi.’

¹⁷ Ngobe naku lokushiwo nguSimakadze: ‘Ningeke niyibone imvula nemoya, noko lesihosha sitawugcwala emanti, khona kutewunatsa nine, netinkhomo tenu, naleti letinye tifuyo tenu.’

¹⁸ Loku yintfo lemalula kabi emehlweni aSimakadze, kantsi futsi naMowabi utamnikela etandleni tenu.

¹⁹ Nitawehlula onkhe emadolobha latinqaba kanye nalawo lamakhulu. Nitatigeca tonkhe tihlahla letinhle, nivimbe yonkhe imitfombo, niwabhubhise ngematje onkhe emasimi lavundzile.”

²⁰ Ngakusasa ekuseni, ngesikhatsi sekunikela ngemhlatjelo, emanti ageleta aphuma ngaka-Edomu! Live lagcwala emanti.

²¹ Onkhe emaMowabi abesevile kutsi emakhosi lamatsatfu ahlomele kutakulwa nawo; ngako onkhe emadvodza, labancane nalabadzala lababengaba nemandla ekwetfwala tikhali, abitwa, eta, emisa ngasemnyeleni.

²² Atsi nakavuka ekuseni ngakusasa, lilanga lakhanyisa emantini. KumaMowabi labengesheya kwendlela, lamanti abonakala abovu, afanana nengati.

²³ Akhuluma atsi: “Yingati leya! Lamakhosi lamatsatfu alwe odvwana agwazana. Asambeni siye enkambu yabo siyekutikholisa ngemphango, maMowabi!”

²⁴ Kodvwa atsi emaMowabi nakefika enkambu yaka-Israyeli, ema-Israyeli avumbuka, alwa nawo, aze emaMowabi abaleka. Ema-Israyeli alihlasela lelo live, agwaza emaMowabi.

²⁵ Abhubhisa emadolobha, kwatsi leyo naleyo ndvodza yajikijela litje kuwo onkhe emasimi lavundzile, aze avaleka angabonakali. Avimba yonkhe imitfombo, agawula tonkhe tihlahla letinhle. Kwaba yiKhiri Heresi yodvwa leyasala inematje asetindzaweni tawo. Kodvwa emadvodza labehlome ngetidubulelo ayitungeleta nayo, ayihlasela.

²⁶ Yatsi kube inkhosi yakaMowabi ibone kutsi yehluliwe, yabe seyitsatsa emadvodza labengema-700 labehlome ngetinkemba, yetama kudzabula ekhatsi icondze enkhosini yaka-Edomu, kodvwa behluleka.

²⁷ Yabe seyitsatsa umsa wayo labelitubulo layo lelalitakuyilandzela litsatse bukhosi, yalinikela laba ngumhlatjelo wekushiswa elubondzeni lwelidolobha. Ema-Israyeli atfutfumela kakhulu; akhawula kulwa, ancandzeka abuyela eveni lawo.