2 Emakhosi 24 - Siswati 1996 Bible

¹ Ngesikhatsi sekubusa kwaJehoyakimu, Nebukhadnezari, inkhosi yaseBhabhulona, wahlasela live. Jehoyakimu waba yinceku yaNebukhadnezari, iminyaka lemitsatfu. Kodvwa wabe sewugucula ingcondvo yakhe, wavukela Nebukhadnezari.

² Simakadze wamtfumelela emaBhabhulona, nemaSiriya, nemaMowabi, nema-Amoni kutsi atemhlasela. Wabatfumela kutsi batewubhubhisa Juda, ngekulandzela livi laSimakadze lalikhuluma ngetinceku takhe baphrofethi.

³ Ngempela letintfo tenteka kaJuda njengekwemyalo waSimakadze, kuze atekubasusa ebukhoneni bakhe ngenca yetono taManase nako konkhe labekwentile,

⁴ kanye nekucitsa kwakhe ingati leyayingenacala, ngobe phela iJerusalema yayigcwele ingati yebantfu lababengenacala. Simakadze abengakatimiseli kutsetselela Manase ngaloko.

⁵ Leminye imininingwane ngekubusa kwenkhosi Jehoyakimu, nako konkhe lakwenta, kubhaliwe encwadzini yemilandvo yemakhosi akaJuda.

⁶ Jehoyakimu wakhotsama, Jehoyakhini, umsa wakhe, waba yinkhosi esikhundleni sakhe.

⁷ Inkhosi yaseGibhithe nemabutfo ayo ayizange iphindze ivive iyewuhlasela ngephandle kwelive layo, ngobe phela inkhosi yaseBhabhulona yase ilitsetse lonkhe live layo, kusukela emfudlaneni waseGibhithe kuze kufike emfuleni iYufrathe.

Jehoyakhini, inkhosi yakaJuda

⁸ Jehoyakhini abeneminyaka leli-18 budzala, nakabekwa kuba yinkhosi. Wabusela eJerusalema tinyanga letintsatfu. Libito lenina bekunguNehushta, indvodzakati ya-Elnathani, waseJerusalema.

⁹ Jehoyakhini wenta lokubi emehlweni aSimakadze, njengobe bekwente uyise.

¹⁰ Ngaleso sikhatsi tindvuna taNebukhadnezari, inkhosi yaseBhabhulona, tahlasela iJerusalema tayivimbetela,

¹¹ naNebukhadnezari cobo lwakhe, waya kulo lelidolobha ngesikhatsi tindvuna takhe tisalivimbetele.

¹² Jehoyakhini, inkhosi yakaJuda, nenina, netinceku takhe, netikhulu takhe, kanye netindvuna takhe bavele baphakamisa tandla bashweleta kuye. Ngemnyaka wesiphohlongo wekubusa kwenkhosi yaseBhabhulona, lenkhosi yatfumba Jehoyakhini, waba siboshwa.

¹³ Njengobe Simakadze abeshito, Nebukhadnezari watsatsa yonkhe ingcebo, wayisusa ethempelini laSimakadze nasesigodlweni senkhosi, watitsatsa tonkhe leto timphahla tegolide letatentiwe nguSolomoni, inkhosi yaka-Israyeli, latentela lithempeli laSimakadze.

¹⁴ Wayitfumba yonkhe iJerusalema: tonkhe tindvuna, netingwazi, nato tonkhe tingcweti temisebenti yetandla kanye nebabumbi betinsimbi; babeti-10 000 sebabonkhe. Kwashiywa labo bantfu lababetimphofana kuphela.

¹⁵ Nebukhadnezari watfumba Jehoyakhini, wahamba naye waya eBhabhulona. Labanye labatfumba lapha eJerusalema bekungunina wenkhosi Jehoyakhini, nemakhosikati aJehoyakhini, netindvuna takhe kanye nemadvodza lamcoka elive.

¹⁶ Inkhosi yaseBhabhulona yatfumbela eBhabhulona tingwazi letiti-7 000, letaticinile tilungele kulwa imphi; watitfumba kanye nenkhulungwane yetingcweti emisebentini yetandla kanye nasekubumbeni tintfo ngensimbi.

¹⁷ Nebukhadnezari wase ubeka Mathaniya, malume waJehoyakhini, kutsi abe yinkhosi esikhundleni sakhe, wabe sewumetsa libito watsi nguSedekiya.

Sedekiya, inkhosi yakaJuda

¹⁸ Sedekiya abeneminyaka lengema-21 budzala, nakabekwa kuba yinkhosi. Wabusela eJerusalema iminyaka leli-11. Libito lenina bekunguHamutali, indvodzakati yaJeremiya, waseLibna.

¹⁹ Wenta lokubi emehlweni aSimakadze, njengobe naJehoyakimu abentile.

²⁰ Kwabangelwa yintfukutselo yaSimakadze lokutsi loku kwenteke eJerusalema nakaJuda, kwaze kwatsi ekugcineni wabesusa ebukhoneni bakhe. Sedekiya wase uyayivukela inkhosi yaseBhabhulona.