2 Emakhosi 22 - Siswati 1996 Bible

Josaya, inkhosi yakaJuda

¹ Josaya abeneminyaka lesiphohlongo budzala, nakabekwa kuba yinkhosi. Wabusela eJerusalema iminyaka lengema-31. Libito lenina bekunguJedida, indvodzakati ya-Adaya, waseBhoskhathi.

² Josaya wenta lokuhle emehlweni aSimakadze, wahamba ngato tonkhe tindlela teyise Davide, akazange aphambukele ngesekudla nome ngesancele.

Kutfolakala kwencwadzi yemtsetfo

³ Emnyakeni weli-18 ekubuseni kwakhe, inkhosi Josaya watfumela mabhalane Shafani, umsa wa-Asaliya, umsa waMeshulamu, kutsi aye ethempelini laSimakadze. Wakhuluma kuye watsi:

⁴ “Hamba uye kuHilkiya, umPhristi Lomkhulu, umtjele alungise lemali beyiletfwa kuSimakadze ethempelini, lebeyitsatfwa ngulabomahlalesangweni kubantfu.

⁵ Mtjele ayinike lamadvodza labekelwa kwengamela umsebenti welithempeli. Lamadvodza akakhokhele labo labavusetela lithempeli laSimakadze:

⁶ babati, nebakhi, nebacoti bematje. Lokunye futsi kufanele batsenge tingodvo kanye nematje labatiwe ekuvusetela lelithempeli.

⁷ Lamadvodza akukafaneli alandzise ngalemali lanikwe yona, ngobe asebenta ngekwetsembeka.”

⁸ Hilkiya, umPhristi Lomkhulu, wakhuluma kumabhalane Shafani, watsi: “Ngiyitfolile incwadzi yemtsetfo ekhatsi ethempelini laSimakadze.” Wase uyinika Shafani, kutsi ayifundze.

⁹ Shafani, mabhalane, waya enkhosini, wafike wabika watsi: “Tinceku takho setiyikhiphile lemali beyisethempelini laSimakadze, tivele tayibeka etandleni tetisebenti nebagcugcuteli.”

¹⁰ Shafani, mabhalane, wayibikela inkhosi, watsi: “Hilkiya, umphristi, unginike incwadzi.” Shafani wase ufundzela inkhosi lencwadzi.

¹¹ Inkhosi yatsi kube iweve lamavi alencwadzi yemtsetfo, yeklebhula tembatfo tayo.

¹² Yase ikhuluma kuboHilkiya, umphristi, na-Ahikamu, umsa waShafani, na-Akbori, umsa waMikhaya, naShafani, labengumabhalane, kanye na-Asaya, inceku yenkhosi, yatsi:

¹³ “Hambani niyekungibutela kuSimakadze mine kanye nebantfu kanye nesive sonkhe sakaJuda macondzana naloko lokubhalwe kulencwadzi leseyitfolakele. Yinkhulu kabi intfukutselo yaSimakadze lesivutselako; ngobe bobabe abazange bawalalele emavi alencwadzi. Abazange bakwente konkhe loku lokubhalwe kuyo macondzana natsi.”

¹⁴ Hilkiya, umphristi, na-Ahikamu, na-Akbori, naShafani kanye na-Asaya bahamba bayawukhuluma naHulda, umphrofethikati, labengumkaShalumi, umsa waThikva, umsa waHahasi; Shalumi abengumphatsi wetembatfo tasethempelini. Lomphrofethikati abehlala eJerusalema eSifundzeni Sesibili.

¹⁵ Wabatjela watsi: “Naku lokushiwo nguSimakadze, Nkulunkulu wema-Israyeli, utsi: Tjelani lendvodza lenitfumele lapha kimi, nitsi:

¹⁶ ‘Naku lokushiwo nguSimakadze, utsi: Ngitakwehlisela inhlekelele kulendzawo nakubantfu bayo, kuye njengobe kubhaliwe kulencwadzi lefundvwe yinkhosi yakaJuda.

¹⁷ Njengobe bangikhohliwe mine, batfuncisa imphepho kulabanye bonkulunkulu, bangitfukutselisa ngato tonkhe letithico labatente ngetandla tabo, intfukutselo yami itawuvutsela lendzawo, futsi ingeke icisheke.’

¹⁸ Tjelani inkhosi yakaJuda lenitfumele kutsi nitekuyibutela kuSimakadze, kutsi: ‘Naku-ke lokushiwo nguSimakadze, Nkulunkulu wema-Israyeli, macondzana nalamavi lowevile:

¹⁹ Njengobe inhlitiyo yakho itsintsekile, wase uyatitfoba embikwaSimakadze, nawuva loko lengikukhulumile ngalendzawo kanye nangebantfu bayo, kutsi batawucalekiswa balahlwe njengetibi, nekutsi njengobe uklebhule tingubo takho, wakhala embikwami, sengikuvile, kusho Simakadze.

²⁰ Ngako-ke ngitakuyisa kuboyihlomkhulu, wena uyawufihlwa ngekuthula. Emehlo akho akayikuyibona yonkhe lenhlekelele lengitayehlisela kulendzawo.’ ” Ngako batsatsa lemphendvulo yakhe lomphrofethikati bayimikisa enkhosini.