2 Emakhosi 21 - Siswati 1996 Bible

Manase, inkhosi yakaJuda

¹ Manase abeneminyaka leli-12 budzala, nakabekwa kuba yinkhosi. Wabusela eJerusalema iminyaka lengema-55. Libito lenina bekunguHefsiba.

² Manase wenta lokubi emehlweni aSimakadze, alandzela leto tintfo letatisinengiso letatentiwa nguleto tive Simakadze latidvungulula ngesikhatsi nakufika sive sema-Israyeli.

³ Wavusa kabusha tindzawo letiphakeme tekukhontela tithico, letatibhidlitwe nguyise Hezekiya. Waphindze wakha emalati aBhali, wakha nensika ya-Ashera, njengobe na-Ahabi, inkhosi yaka-Israyeli, abentile. Wakhotsama wakhonta tonkhe tinkhanyeti tesibhakabhaka.

⁴ Wakha emalati ekhatsi ethempelini laSimakadze, Simakadze labekhulume ngalo watsi: “Libito lami ngiyakulibeka eJerusalema.”

⁵ Kuto totimbili tibuya telithempeli laSimakadze wakha emalati ekukhonta tinkhanyeti.

⁶ Wanikela ngendvodzana yakhe kutsi ishiswe ngemlilo, wangenela bungoma nemilingo, wabuye watihlanganisa nalabanemadloti kanye nalabaphengulako. Wenta lokubi kakhulu emehlweni aSimakadze, wamtfukutselisa.

⁷ Watsatsa insika ya-Ashera labeyentile wayibeka ethempelini, lelo Simakadze labekhulume ngalo kuDavide nakuSolomoni, umsa wakhe, watsi: “Kulelithempeli naseJerusalema lengiyikhetse emkhatsini wato tonkhe tive tema-Israyeli, ngitawubeka Libito lami kuyo phakadze naphakadze.

⁸ Ngingeke ngiphindze ngente tinyawo tema-Israyeli tibe solomane tizulazula tisuke kulelive lengalipha bokhokho bawo, kuphela nje nangabe bangacaphela kutsi bente konkhe loko lengabayala ngako kutsi bakwente nekutsi bagcine wonkhe umtsetfo lengawunika Mosi, inceku yami.”

⁹ Kodvwa bantfu abazange balalele. Manase wabedukisa, ngako benta lokubi kakhulu kwendlula letive letabhujiswa nguSimakadze, ngesikhatsi nakufika ema-Israyeli.

¹⁰ Simakadze wakhuluma ngetinceku takhe, baphrofethi, watsi:

¹¹ “Manase, inkhosi yakaJuda, wente letono letisinengiso. Wente lokubi kakhulu kwendlula ema-Amori labekhona ngaphambi kwakhe, sewuze wahola bakaJuda wayawubafaka esonweni sekukhonta tithico.

¹² Ngako-ke naku lokushiwo nguSimakadze Nkulunkulu wema-Israyeli, utsi: ‘Ngitakwehlisela inhlekelele eJerusalema nakaJuda, kangangekutsi tindlebe talowo loyawuva ngayo tiyawuncencetsa.

¹³ IJerusalema ngiyayijezisa njengeSamariya nanjengobe ngajezisa Ahabi, inkhosi yaka-Israyeli. Ngitabashanyela bonkhe bantfu baseJerusalema, sincane sendishi lekususwe kuyo konkhe bekungekhatsi, yase ibhekiswa phansi.

¹⁴ Insali yelifa lami ngitayifulatsela, ngiyetfule etitseni tayo. Insali itawuphangwa ichwagwe ngito tonkhe titsa tayo,

¹⁵ ngobe yente lokubi emehlweni ami yangitfukutselisa, ngatfukutsela kusukela mhlazana bokhokho bayo baphuma eGibhithe kuze kube ngulamuhla.’ ”

¹⁶ Ngetulu kwaloko, Manase wacitsa kakhulu ingati yalabangenacala, kangangekutsi titaladi taseJerusalema tatigeleta ingati kusukela ekucaleni kuze kuyewuphuma ekugcineni. Loko wakwengetela ekwenteni sive sakaJuda kutsi sikhonte tithico, wasenta sona kuSimakadze.

¹⁷ Leminye imininingwane ngekubusa kwaManase, nako konkhe lakwenta, netono latenta, kubhaliwe encwadzini yemilandvo yemakhosi akaJuda.

¹⁸ Manase wase uyakhotsama, wafihlwa ensimini yesigodlo lekwakutsiwa yinsimi ya-Uza. Amoni, umsa wakhe, waba yinkhosi esikhundleni sakhe.

Amoni, inkhosi yakaJuda

¹⁹ Amoni abeneminyaka lengema-22 budzala, nakabekwa kuba yinkhosi. Wabusela eJerusalema iminyaka lemibili. Libito lenina bekunguMeshulemethi, indvodzakati yaHarusi, waseJotbha.

²⁰ Amoni wenta lokubi emehlweni aSimakadze, walingisa uyise Manase.

²¹ Wahamba kuto tonkhe tindlela teyise; wakhonta wakhotsamela letithico, njengobe kwenta uyise.

²² Walahla Simakadze, Nkulunkulu waboyise, wangete wahamba endleleni yaSimakadze.

²³ Tiphatsimandla ta-Amoni, tamakhela luzungu tamenta silo sengubo tambulalela endlunkhulu yakhe.

²⁴ Kodvwa sonkhe sive salelo live sabulala bonkhe labo bebente luzungu lwekubulala Amoni, inkhosi. Sabeka Josaya, umsa wakhe, kutsi abe yinkhosi esikhundleni sakhe.

²⁵ Leminye imininingwane ngekubusa kwa-Amoni, nako konkhe lakwenta, kubhaliwe encwadzini yemilandvo yemakhosi akaJuda.

²⁶ Wafihlwa ethuneni lakhe, ensimini ya-Uza. Josaya, umsa wakhe, waba yinkhosi esikhundleni sakhe.