2 Emakhosi 17 - Siswati 1996 Bible

Hosheya, inkhosi yekugcina ka-Israyeli

¹ Ngemnyaka weli-12 wekubusa kwa-Ahazi, inkhosi yakaJuda, ka-Israyeli kwabekwa Hosheya, umsa wa-Ela, waba yinkhosi. Wabusela eSamariya iminyaka leyimfica.

² Wenta lokubi emehlweni aSimakadze, kodvwa hhayi njengalawa lamanye emakhosi aka-Israyeli labewalandzela.

³ Shalmaneseri, inkhosi yase-Asiriya, wakhuphuka watawuhlasela Hosheya, labengumuntfu longaphansi kwakhe, atsela kuye umtselo.

⁴ Kodvwa inkhosi yase-Asiriya yase iyatfola kutsi Hosheya abelimbuka, ngobe abetfumele emancusa eSayisi kuyo inkhosi yaseGibhithe, wangabe asatsela kulenkhosi yase-Asiriya, njengobe bekenta iminyaka ngeminyaka. Ngako-ke Shalmaneseri wambamba, wamvalela ejele.

⁵ Inkhosi yase-Asiriya yahlasela lonkhe live, yavimbetela iSamariya, kwaze kwaba ngiminyaka lemitsatfu.

⁶ Kwatsi ngemnyaka wemfica wekubusa kwaHosheya, inkhosi yase-Asiriya yatfumba iSamariya, yase itfumba baka-Israyeli yabayisa e-Asiriya. Yabeka labanye eHala, labanye eGozani ngasemfuleni iHabori, nalabanye emadolobheni emaMede.

Kutfunjwa kwebaka-Israyeli ngenca yesono

⁷ Konkhe loku kwenteka ngobe baka-Israyeli bona kuSimakadze Nkulunkulu wabo, labekabakhiphe eGibhithe, ngaphansi kwemandla aFaro, inkhosi yaseGibhithe. Besuka bakhonta labanye bonkulunkulu,

⁸ balandzela imikhuba yaleto tive Simakadze labetidvungulule nabefikako, benta nemikhuba lemisha leyayentiwa ngemakhosi aka-Israyeli.

⁹ Baka-Israyeli benta tintfo ngasense letatiphambene naSimakadze Nkulunkulu wabo, letatingakalungi. Kusukela etimbonisweni kuye emadolobheni labiyelwe, batakhela tindzawo letiphakeme tekukhontela tithico kuwo onkhe emadolobha abo.

¹⁰ Batimisela tithicomatje netinsika ta-Ashera kuto tonkhe tintsaba letiphakeme, nangaphansi kwato tonkhe tihlahla letikhulu letendlele emagala ato.

¹¹ Kuto tonkhe letindzawo letiphakeme, babetfuncisa imphepho njengaletive Simakadze latidvungulula ngesikhatsi ema-Israyeli efika. Benta tintfo letimbi letamcunula Simakadze waze watfukutsela.

¹² Bakhonta tithico, nome Simakadze abekadze ashito watsi: “Ningabokwenta loko.”

¹³ Simakadze abebayalile baka-Israyeli nebakaJuda ngabo bonkhe baphrofethi nebaboniswa bakhe, watsi: “Phendvukani etindleleni tenu letimbi. Nakekelani imiyalo yami netimiso tami, mayelana nawo wonkhe umtsetfo lengayala ngawo boyihlomkhulu kutsi bawulalele, nalengawetfula kini ngetinceku tami baphrofethi.”

¹⁴ Kodvwa abazange balalele, bacinisa tinhloko njengaboyise, labangazange betsembele kuSimakadze Nkulunkulu wabo.

¹⁵ Batala timiso takhe nesivumelwane sakhe labesente naboyisemkhulu, kanye neteluleko labebeluleke ngato. Balandzela tithico letingenamsebenti walutfo, nabo bagcina sebangenamsebenti walutfo. Basuke balingisa letive letatakhelene nabo, kantsi Simakadze abebayalile watsi: “Ningabalingisi.” Benta kona kanye loko Simakadze labetsite bangabokwenta.

¹⁶ Bayifulatsela yonkhe imiyalo yaSimakadze Nkulunkulu wabo, batakhela tabo tithico letimbili letimise kwematfole, batakhela nensika ya-Ashera. Bakhotsama tinkhanyeti, bakhonta sithico saBhali.

¹⁷ Benta imihlatjelo ngemadvodzana nangemadvodzakati abo bawashisa ngemlilo. Baphengula, babhula, batitsengisa ekwenteni bubi emehlweni aSimakadze, bamcunula.

¹⁸ Simakadze wase uyabatfukutselela baka-Israyeli, wabesusa ebukhoneni bakhe, kwasala kuphela sive sakaJuda;

¹⁹ naso sive sakaJuda asizange siwugcine umyalo waSimakadze Nkulunkulu waso. Salandzela imikhuba lemibi leyase ifakwe baka-Israyeli.

²⁰ Ngako-ke Simakadze wase uyatala tonkhe tive tema-Israyeli, watihlupha, watinikela etandleni tebatfumbi bato, waze waticosha ebukhoneni bakhe.

²¹ Kwatsi ngesikhatsi adzabula baka-Israyeli emndenini wakaDavide, besuka babeka Jerobowamu, umsa waNebati, kutsi abe yinkhosi yabo. Jerobowamu wasihuha sive saka-Israyeli, wasiphambukisa ekulandzeleni Simakadze, wasentisa sono lesikhulu.

²² Baka-Israyeli baphikelela njalo kuto tonkhe tono taJerobowamu, bangete baphendvuka kuto,

²³ waze wabesusa Simakadze ebukhoneni bakhe, njengobe abevele abecwayisile ngato tonkhe tinceku takhe baphrofethi. Ngako-ke bantfu baka-Israyeli batsatfwa emitini yabo naseveni labo, bayiswa ekutfunjweni e-Asiriya; basesekhona lapho nalamhlanje.

Kwakhiwa kabusha kweSamariya

²⁴ Inkhosi yase-Asiriya yaletsa bantfu baseBhabhulona nebaseKutha, nebase-Ava, nebaseHamathi, nebaseSefavayimu, yabahlalisa emadolobheni aseSamariya, esikhundleni sema-Israyeli. Bayitsatsa-ke iSamariya, bahlala emadolobheni ayo.

²⁵ Ngesikhatsi basandza kufika khona, abazange bamkhonte Simakadze, ngako Simakadze wabatfumelela ngemabhubesi, afike adla labanye babo.

²⁶ Loko kwabikwa enkhosini yase-Asiriya, kwatsiwa: “Labantfu lowabatfumba wayakubahlalisa emadolobheni aseSamariya abamati nkulunkulu wakhona kutsi ufunani. Sewutfumele emabhubesi emkhatsini wabo, ayababhobabhoba nje nyalo, ngobe labantfu abakwati lakufunako kubo.”

²⁷ Ngako inkhosi yase-Asiriya yase ikhipha umyalo, yatsi: “Khiphani munye walabo baphristi lenabatfumba eSamariya abuyele emuva ayewuhlala nabo, abafundzise labantfu kutsi nkulunkulu wakhona ukhontwa njani.”

²⁸ Ngako-ke lomunye webaphristi lababetfunjwe eSamariya waya wayawuhlala eBetheli, wabafundzisa kutsi ukhontwa njani Simakadze.

²⁹ Noko, nguleso sive satentela taso tithico kulawo madolobha letatihleti kuwo, satimisa etindzaweni letatihlonishwa letatakhiwe ngulabantfu baseSamariya etindzaweni letiphakeme.

³⁰ Emadvodza aseBhabhulona atakhela Sukhothi Bhenothi, aseKutha atakhela Negali, aseHamathi atakhela Ashima,

³¹ ase-Ava amisa boNibhazi naThataki, tithico tawo. EmaSefavayimu wona abeshisa bantfwabawo emlilweni njengemhlatjelo ku-Adrameleki naku-Anameleki, bonkulunkulu bakubo eSefavayimu.

³² Babekhonta naSimakadze, kodvwa babetimisela yonkhe inhlobo yebantfu bakubo kutsi bakhonte njengebaphristi kuletithico tabo etindzaweni letiphakeme.

³³ Babechubeka bona bamkhonte Simakadze, kodvwa babechubeka bakhonte naletithico tabo njengekwemasiko etive takubo lapho babesuswe khona.

³⁴ Kuze-ke kube ngulamuhla loku basaphikelele nekwenta imikhuba yabo yakadzeni. Abamkhonti Simakadze, futsi abayilandzeli imiyalo netimiso, nemitsetfo, neteluleko Simakadze lakunika titukulwane taJakobe, lametsa libito watsi ngu-Israyeli.

³⁵ Mzukwana Simakadze enta sivumelwane nema-Israyeli, wabayala watsi: “Ningabakhonti labanye bonkulunkulu, futsi ningabakhotsameli, nibasebentele nome nibahlabele imihlatjelo.

³⁶ Kodvwa Simakadze lowanikhipha eGibhithe ngemandla lamakhulu, nangengalo leyelulekile, nguye yedvwa lekufanele nimkhonte. Niyawukhotsama kuye, ninikele kuye ngemihlatjelo.

³⁷ Nifanele nicaphele njalo kugcina imiyalo netimiso takhe, imitsetfo neteluleko takhe lanibhalela tona. Ningabakhonti labanye bonkulunkulu.

³⁸ Ningasikhohlwa sivumelwane lengisente nani, futsi ningabakhonti labanye bonkulunkulu,

³⁹ kodvwa niyawukhonta Simakadze Nkulunkulu wenu. Nguye loyakunikhulula esandleni sato tonkhe titsa tenu.”

⁴⁰ Noko abazange balalele, kodvwa baphikelela ekwenteni imikhuba yabo yakadzeni.

⁴¹ Nangesikhatsi labantfu sebakhonta Simakadze, kodvwa babesachubeka nekukhonta tithico tabo. Kuze kube ngulamuhla loku, bantfwababo, nebantfwana bebantfwababo basachubeka nekwenta njengaboyisemkhulu.