1 yaJohane 4 - Siswati 1996 Bible

Umoya wemanga neweliciniso

¹ Batsandzekako, ningabohambe nikholwa ngibo bonkhe bomoya, nibobahlola bomoya kutsi baNkulunkulu yini, ngobe banyenti baphrofethi bemanga labaphumele eveni.

² Moya waNkulunkulu niyawumati ngaloku: Wonkhe umoya lovumako kutsi Jesu Khristu wefika waba ngumuntfu, yena unguMoya waNkulunkulu.

³ Wonkhe umoya longamvumi Jesu, akusiwo waNkulunkulu; lowo ngumoya wamphikakhristu leneva ngaye kutsi uyeta, nangempela sewukhona la kulomhlaba.

⁴ Bantfwabami, nine nibaNkulunkulu, senibehlulile baphrofethi bemanga, ngobe lowo lokini mkhulu kunalowo losemhlabeni.

⁵ Bona belive, ngako-ke nalabakukhulumako kwaseveni, futsi nelive liyabeva.

⁶ Tsine sibaNkulunkulu, lomatiko Nkulunkulu uyasiva, lowo longesiye waNkulunkulu akasiva. Siwehlukanisa ngaloko-ke umoya weliciniso nemoya wekweduka.

Nkulunkulu ulutsandvo

⁷ Batsandzekako, asitsandzaneni ngobe lutsandvo luvela kuNkulunkulu; wonkhe umuntfu lonelutsandvo usuke atelwe nguNkulunkulu, futsi uyamati Nkulunkulu.

⁸ Kodvwa lote lutsandvo akamati Nkulunkulu, ngobe Nkulunkulu ulutsandvo.

⁹ Lutsandvo lwaNkulunkulu lwabonakaliswa kitsi ngekutsi Nkulunkulu watfumela iNdvodzana yakhe leyodvwa emhlabeni, khona sitewuphila ngayo.

¹⁰ Ngulolo-ke lutsandvo, hhayi kutsi ngitsi lesatsandza Nkulunkulu, kepha kutsi nguye lowasitsandza, wadzimate watfumela iNdvodzana yakhe kutsi ibe yinhlawulo yetono tetfu.

¹¹ Batsandzekako, nangabe Nkulunkulu wasitsandza kangaka, natsi sifanele kutsi sitsandzane.

¹² Kute umuntfu lowase wabona Nkulunkulu; nasitsandzana-ke, Nkulunkulu uhlala kitsi, nelutsandvo lwakhe luphelelisiwe kitsi.

¹³ Siyati kutsi sihlala kuye naye kitsi, ngobe usiphile kwaMoya wakhe.

¹⁴ Tsine sitibonele, sifakaza kutsi uYise utfumele iNdvodzana yakhe kutsi itewuba nguMsindzisi welive.

¹⁵ Lowo lovuma kutsi Jesu uyiNdvodzana yaNkulunkulu, Nkulunkulu uhlala kuye, naye uhlala kuNkulunkulu.

¹⁶ Tsine siyalwati lutsandvo Nkulunkulu lasitsandza ngalo, futsi siyakholwa ngilo. Nkulunkulu ulutsandvo. Umuntfu lohlala elutsandvweni uhlala kuNkulunkulu, naNkulunkulu uhlala kuye.

¹⁷ Lutsandvo luphelelisiwe kitsi kuze sibe nesibindzi ngelilanga lekwehlulela, ngobe njengaloku abenjalo Khristu natsi sinjalo kulomhlaba.

¹⁸ Lutsandvo lute kwesaba, kodvwa lutsandvo loluphelele luyakucosha kwesaba. Kwesaba kuhambisana nesijeziso; lowo lowesabako akapheleli elutsandvweni.

¹⁹ Tsine sitsandza, ngobe kwacala yena wasitsandza.

²⁰ Umuntfu nakatsi: “Ngiyamtsandza Nkulunkulu,” kepha abe atondza umzalwane wakhe, ungulocalemanga; ngobe umuntfu longamtsandzi umzalwane wakhe lambonako, angeke amtsandze Nkulunkulu langazange asambone.

²¹ Sinemyalo lasinika wona Khristu kutsi umuntfu lotsandza Nkulunkulu ufanele kutsandza nemzalwane wakhe futsi.