1 Tikhronike 5 - Siswati 1996 Bible

Titukulwane takaRubeni

¹ Leti-ke titukulwane takaRubeni, litubulo la-Israyeli. Rubeni abelitubulo, kodvwa watsi kube alale nesingani seyise, walahlekelwa ngemalungelo ebutubulo bakhe, ase anikwa emadvodzana aJosefa, umsa wa-Israyeli. Ngako akabange asabalwa emlandvweni weluhlanga lwekutalana kwabo njengekwemalungelo ekutalwa kwakhe.

² Noko kwase kuba nguJuda lowaba sive lesasinemandla kakhulu, ngiso lesabe sesitala umbusi wato tonkhe tive tema-Israyeli, nome nje emalungelo ebutubulo abenikwe Josefa.

³ Emadvodzana aRubeni, litubulo la-Israyeli, bekuboHanoki, naPhalu, naHesroni, naKhami.

⁴ Leti bekutitukulwane takaJoweli: umsa waJoweli bekunguShemaya, umsa wakhe kunguGogi, umsa wakhe kunguShimeyi,

⁵ umsa wakhe kunguMikha, umsa wakhe kunguReyaya, umsa wakhe kunguBhali,

⁶ umsa wakhe kunguBhera, lowatfunjwa nguThiglathi Phileseri, inkhosi yase-Asiriya; Bhera abengumholi wesive sakaRubeni.

⁷ Emilandvweni yemindeni yakaRubeni baholi bayo bekuboJeyiyeli sikhulu, naZakhariya,

⁸ naBela, umsa wa-Azazi, umsa waShema, umsa waJoweli. Bebakhe kusukela e-Aroyeri kuya eNebo naseBhali Meyoni.

⁹ Ngasemphumalanga bebakhe kusukela emnyeleni welihlane kuze kuyewufika emfuleni iYufrathe, ngobe phela netifuyo tabo tase tandze kakhulu kaGileyadi.

¹⁰ Ngesikhatsi sekubusa kwenkhosi Sawula sive sakaRubeni sahlasela bakaHagari, lesabehlula; sase sidla lelive labo lonkhe lelingasemphumalanga nelakaGileyadi.

Titukulwane takaGadi

¹¹ Sive sakaGadi sasihlala edvutane nesakaRubeni, eveni laseBhashani, kuze kuyewufika eSalekha.

¹² Joweli waba ngumholi, wesibili kwaba nguShafamu, kwase kulandzela Janayi, naShafati eBhashani.

¹³ Labanye lekwakungimindeni letihlobo tabo bekuboMikhayeli, naMeshulamu, naSheba, naJorayi, naJakani, naZiya, na-Ebheri; babesikhombisa sebabonkhe.

¹⁴ Lawa ngemadvodzana a-Abihayili, umsa waHuri, umsa waJarowa, umsa waGileyadi, umsa waMikhayeli, umsa waJeshishayi, umsa waJado, umsa waBuze.

¹⁵ Ahi, umsa wa-Abdiyeli, umsa waGuni, abengumholi wemndeni wakhe.

¹⁶ BakaGadi babehlala kaGileyadi, naseBhashani nasetabelweni tayo nakulo lonkhe lelo live lemadlelo aseSharoni, kwaze kwaba ngusemikhawulweni yalo.

¹⁷ Yonkhe lemilandvo yeluhlanga lwekutalana kwato yayibhalwe phansi ngesikhatsi sekubusa kwaJothamu, inkhosi yakaJuda, naJerobowamu, inkhosi yaka-Israyeli.

Emabutfo etive letatingasemphumalanga

¹⁸ Sive sakaRubeni nesakaGadi kanye nencenye yesive sakaManase tatinemadvodza labeti-44 760, labengangenela umbutfo wemphi, imiswahla leyayihloma ngelihawu nangenkemba, ikwati nekusebentisa butjoki, ngobe yayivele iceceshelwe kulwa imphi.

¹⁹ Lamadvodza alwa nebakaHagari, nebakaJeturi, nebakaNafishi, nebakaNodabi.

²⁰ Babeka litsemba labo kuNkulunkulu, bathandaza kuye, bacela lusito. Nkulunkulu wayiphendvula imithandazo yabo, wabenta basincoba sive sakaHagari kanye netive letatisitana naso.

²¹ Batfumba tifuyo tebakaHagari lekwakungemakamela lati-50 000, netimvu letati-250 000, netimbongolo letati-2 000 kanye nebantfu lababeti-100 000.

²² Linyenti labulawa, ngobe lemphi beyiyaNkulunkulu. Lelo live balidla, bahlala kulo kwaze kwaba sikhatsi sekudzingiswa kwabo.

Incenye yesive sakaManase ngasemphumalanga

²³ Bantfu bencenye yesive sakaManase babebanyenti kakhulu; bona babehlala eveni kusukela eBhashani kuze kuyewufika eBhali Hemoni, lokusho kutsi, eSeniri, naseNtsabeni iHemoni.

²⁴ Baholi balemindeni bekubo-Eferi, na-Ishi, na-Eliyeli, na-Azriyeli, naJeremiya, naHodaviya, naJadiyeli. Babengemachawe labenesibindzi, ladvumile nalabebaholi bemindeni yawo.

Kucoshwa kwetive tangasemphumalanga

²⁵ Kodvwa abazange betsembele kuNkulunkulu waboyisemkhulu, baphinga ngekukhonta labanye bonkulunkulu baletive takulelo live, Nkulunkulu latibhubhisa nakungena tive tema-Israyeli.

²⁶ Ngako Nkulunkulu wema-Israyeli wacunula inhlitiyo yaPhuli, inkhosi yase-Asiriya, lekwakunguThiglathi Phileseri, inkhosi yase-Asiriya, watfumba bakaRubeni, nebakaGadi kanye nencenye yesive sakaManase, wabadzingisa. Wabatsatsa wabayisa eHala, naseHabori, naseHara, nasemfuleni iGozani, lapho basekhona khona ngisho nalamuhla loku.