1 Tikhronike 4 - Siswati 1996 Bible

Titukulwane takaJuda

¹ Titukulwane takaJuda bekuboPheresi, naHesroni, naKhami, naHure, naShobali.

² Shobali abenguyise waReyaya, Reyaya anguyise waJahathi, Jahathi anguyise wabo-Ahumayi naLahadi. Lena-ke bekungimindeni yemaSorathi.

³ Emadvodzana a-Etamu bekuboJezreyeli, na-Ishma, na-Idibashi. Dzadzewabo bekunguHaselelponi.

⁴ Phenuweli abenguyise waGedori, Ezeri anguyise waHusha. Leti bekutitukulwane taHure, litubulo la-Efratha. Hure abenguyise waBhetlehema.

⁵ Ashuri, uyise waThekhowa, abenebafati lababili, lekwakuboHela naNara.

⁶ Nara wamtalela bo-Ahuzami, naHeferi, naThemeni, naHahashtari; kwaba nguleto titukulwane taNara.

⁷ Hela wamtalela boSerethi, naSohari, na-Ethnani.

⁸ Khosi abenguyise wa-Anubi, naHasobeba, nemindeni ya-Ahaheli, umsa waHarumu.

⁹ Jabesi abehlonipheke kakhulu kunabomnakabo emndenini wakabo. Unina abemetse libito watsi nguJabesi, ngobe abetsi: “Ngimtele kabuhlungu.”

¹⁰ Jabesi wakhala kuNkulunkulu wema-Israyeli, watsi: “Ngicela ungibusise ungandzisele live lami! Shangatsi sandla sakho singaba nami, ungiphephise engotini, khona ngitewukhululeka ebuhlungwini.” Nkulunkulu wamupha loko labekucelile.

Lolunye luhla lwemindeni

¹¹ Khelubi, umnakaboShuha, abenguyise waMehiri, Mehiri anguyise wa-Eshtoni.

¹² Eshtoni abenguyise waboBhethi Rafa, naPhaseya, naThehina, uyise wa-Iri Nahashi. Lawa bekungemadvodza labehlala eRekha.

¹³ Khenazi abenemadvodzana lamabili lekwakubo-Othniyeli naSeraya. Emadvodzana a-Othiniyeli bekuboHathathi, naMeyonothayi.

¹⁴ Meyonothayi abenguyise wa-Ofra. Seraya abenguyise waJowabe, Jowabe abengumsunguli weGe Harashimu, loko phela kusho kutsi bantfu bakhona babetingcweti.

¹⁵ Emadvodzana aKhalebi, umsa waJefune, bekubo-Iru, na-Ela, naNamu. Indvodzana ya-Ela bekunguKhenazi.

¹⁶ Emadvodzana aJehaleli bekuboZifi, naZifa, naThiriya, na-Asareli.

¹⁷ Emadvodzana a-Ezra bekuboJetheri, naMeredi, na-Eferi kanye naJaloni. Lomunye webafati baMeredi watala boMiriyamu, naShamayi, kanye na-Ishbha, uyise wa-Eshtemowa.

¹⁸ Umkakhe waseJudiya watala boJaredi, uyise waGedori, naHebhere, uyise waSokho, kanye naJekuthiyeli, uyise waZanowa. Laba labanye bekubantfwana baBithiya, indvodzakati yaFaro, leyayingumfati waMeredi.

¹⁹ Emadvodzana emkaHodiya, dzadzewaboNahamu, bekunguyise waKheyila, umGami, na-Eshtemowa, um-Makha.

²⁰ Emadvodzana aShimoni bekubo-Amnoni, naRina, naBheni Hanani kanye naThiloni. Titukulwane taka-Ishi bekuboZohethi naBheni Zohethi.

Titukulwane takaShela

²¹ Emadvodzana aShela, umsa waJuda, bekubo-Era, uyise waLekha, naLada, uyise waMaresha, nemindeni leyayeluka ilineni eBhethi Ashbeya,

²² naJokimi, nebantfu baseKhozeba, naJowashi, naSarafi, lababebusa eMowabi, naseJashubi Lehemi. Loku kwabhalwa endvulo.

²³ Babebabumbi lababehlala eNethayimu naseGedera, basebentela inkhosi.

Titukulwane takaSimeyoni

²⁴ Emadvodzana aSimeyoni bekuboNemuweli, naJamini, naJaribi, naZera kanye naShawula.

²⁵ Umsa waShawula bekunguShalumi, umsa wakhe kunguMibsamu, umsa wakhe kunguMishma.

²⁶ Umsa waMishma bekunguHamuweli, umsa wakhe kunguZakhuri, umsa wakhe kunguShimeyi.

²⁷ Shimeyi abenemadvodzana lali-16 nemadvodzakati lasitfupha, kodvwa bomnakabo babete bantfwana labanyenti; ngako lusendvo lwakabo lonkhe aluzange lwandze lube ngangelusendvo lwakaJuda.

²⁸ Babehlala eBherisheba, naseMolada, naseHasari Shuwali,

²⁹ naseBhala, nase-Esemu, naseTholadi,

³⁰ naseBhethuweli, naseHoma, naseSikilagi,

³¹ naseBhethi Makhabothi, naseHasari Susimu, naseBhethi Bhiri, naseSharayimu. Lawa kwakungemadolobha abo kwaze kwefika sikhatsi sekubusa kwenkhosi Davide.

³² Imiti leyayitungelete lamadolobha bekuyi-Etamu, ne-Ayini, neRimona, neThokheni, ne-Ashani; emadolobha lasihlanu asawonkhe,

³³ nayo yonkhe leyo miti kuze kuyewufika eBhalathi. Leto bekutabelo tabo. Babewugcina nemlandvo weluhlanga lwekutalana kwabo.

³⁴ Meshobabi, naJamleki, naJosha, umsa wa-Amasiya,

³⁵ naJoweli, naJehu, umsa wa-Joshibiya, umsa waSeraya, umsa wa-Asiyeli,

³⁶ kanye na-Eliyoyenayi, naJakoba, naJeshohaya, na-Asaya, na-Adiyeli, naJesimiyeli, naBhenaya,

³⁷ naZiza, umsa waShifi, umsa wa-Aloni, umsa waJedaya, umsa waShimri, umsa waShemaya:

³⁸ Lawa-ke bekungemabito ebaholi baleto tinsendvo. Imindeni yabo yandza kakhulu,

³⁹ base benabela nasemacentselweni aseGedori, ngasemphumalanga kwesigodzi, solomane bafunana nemadlelo etifuyo tabo.

⁴⁰ Lapho bakhandza emadlelo labeneluhlata, nelive lalapho lalilikhulu linekuthula futsi lipholile. Bekuke kwahlala emaHhamu kuleyo ndzawo.

⁴¹ Bantfu lekwakubhalwe emabito abo befika ngesikhatsi kusabusa Hezekiya, inkhosi yakaJuda. Bahlasela lamaHhamu lapho abehlala khona kanye nemaMehuni labelapho, bawabhubhisa onkhe, njengobe nalamuhla loku kusabonakala nje. Bahlala kuleyo ndzawo yabo, ngobe bekunemadlelo lakahle etifuyo tabo.

⁴² Labanye bakaSimeyoni lababengema-500 bahlasela eNtsabeni iSeyiri, baholwa nguPhelatiya, naNeyariya, naRefaya, na-Uziyeli, emadvodzana a-Ishi.

⁴³ Babulala leyo misalela yema-Amaleki leyayibalekile, solomane bahlala lapho kuze kube ngulamuhla.