1 Tikhronike 26 - Siswati 1996 Bible

Bomahlalesangweni basethempelini

¹ Leti-ke ticheme temaLevi letatibomahlalesangweni: Belusendvo lwaKhora bekunguMeshelemiya, umsa waKhore, lomunye wemadvodzana a-Asafa.

² Meshelemiya abenemadvodzana: Zakhariya abelitubulo, wesibili kunguJediyayeli, wesitsatfu kunguZebadiya, wesine kunguJatniyeli,

³ wesihlanu kungu-Elamu, wesitfupha kunguJehohanani, wesikhombisa kungu-Eliyoyenayi.

⁴ Na-Obedi Edomu abenemadvodzana: Shemaya abelitubulo, wesibili kunguJehozabadi, wesitsatfu kunguJowa, wesine kunguSakhari, wesihlanu kunguNethaneli,

⁵ wesitfupha kungu-Amiyeli, wesikhombisa kungu-Isakhari, wesiphohlongo kunguPhewulethayi. Ngobe Nkulunkulu abembusisile Obedi Edomu.

⁶ Indvodzana yakhe Shemaya nayo yayinemadvodzana labebaholi emndenini weyise, ngobe bekungemadvodza labenelikhono.

⁷ Emadvodzana aShemaya bekubo-Othni, naRefayeli, na-Obedi, na-Elzabadi, tihlobo takhe bo-Elihu naSemakhiya nato tatinelikhono.

⁸ Tonkhe leti bekutitukulwane ta-Obedi Edomu; bona nemadvodzana abo kanye netihlobo tabo babengemadvodza labenelikhono nemandla ekwenteni umsebenti, batukulu ba-Obedi Edomu babengema-62 sebabonkhe.

⁹ Meshelemiya abenemadvodzana kanye netihlobo letatinelikhono, babeli-18 sebabonkhe.

¹⁰ Hosa labengumMerari abenemadvodzana: Inhloko yabo bekunguShimri, noko abengesilo litubulo, kodvwa uyise wambeka kutsi abe wekucala.

¹¹ Wesibili bekunguHilkiya, wesitsatfu kunguThabaliya, wesine kunguZakhariya. Emadvodzana kanye netihlobo taHosa babeli-13 sebabonkhe.

¹² Labomahlalesangweni behlukaniswa baba ticheme ngeticheme, ngebaholi bemindeni yabo, base babelwa imisebenti letsite ekukhonteni Simakadze ethempelini, njengobe bekwenta lamanye emaLevi.

¹³ Lelo nalelo sango lentelwa inkatho, kuze kutewutfolakala kutsi ngumuphi umndeni lekufanele uligadze, labancane nalabadzala ngalokufanako.

¹⁴ Inkatho yelisango langasemphumalanga yadla Shelemiya. Kwentiwa inkatho yaZakhariya, umsa wakhe, umeluleki labenekuhlakanipha, yadla yena kutsi agadze lisango langasenyakatho.

¹⁵ Inkatho yelisango langaseningizimu yadla Obedi Edomu, kwatsi inkatho yengungumakamelo yadla emadvodzana akhe.

¹⁶ Inkatho yelisango langasenshonalanga kanye nelisango laShalekethi lelisemgwacweni longenhla yadla Shuphimi naHosa. Mahlalesangweni abecondzene namahlalesangweni kanje:

¹⁷ BekunemaLevi lasitfupha ngelilanga ngasemphumalanga, lamane ngelilanga angasenyakatfo, lamane ngelilanga angaseningizimu, bese kutsi lamabili ngasikhatsi sinye agadze ingungumakamelo.

¹⁸ Esibuyeni lesingasenshonalanga bebabane emgwacweni, bese baba babili esibuyeni ngekhatsi.

¹⁹ Leti-ke bekuticheme tabomahlalesangweni lababetitukulwane takaKhora naMerari.

Bosikhwama naletinye tindvuna

²⁰ EmaLevi lamanye abephatsa ingcebo yendlu yaNkulunkulu nengcebo yetintfo letinikelwe kuNkulunkulu.

²¹ Titukulwane taLadani, letatingetakaGeshoni ngaLadani, futsi titinhloko temindeni yakaLadani, umGeshoni, bekuboJehiyeli

²² nemadvodzana aJehiyeli, naZethami kanye naJoweli, umnakabo. Bona babeciza ingcebo yelithempeli laSimakadze.

²³ Imisebenti yanikwa netitukulwane ta-Amramu, netaJisihari, netaHebroni, neta-Uziyeli:

²⁴ Shubayeli, umtukulu waGeshomu, umsa waMosi, yena abeciza tindlu tengcebo.

²⁵ Tihlobo takhe nga-Eliyezeri bekunguRehabiya, umsa wakhe, naJeshaya, umsa wakhe, naJoramu, umsa wakhe, naZikhri, umsa wakhe, kanye naShelomithi, umsa wakhe.

²⁶ Shelomithi netihlobo takhe babeciza yonkhe ingcebo yetintfo letatinikelwe kuNkulunkulu yinkhosi Davide nebaholi bemindeni, netindvuna tetinkhulungwane netemakhulu kanye naletinye tindvuna temabutfo.

²⁷ Lenye imphango leyayidliwe emphini bayinikelela kutsi kulungiswe ngayo kabusha lithempeli laSimakadze.

²⁸ Konkhe lokwakunikelwe nguSamuweli, umboniswa, kanye naSawula, umsa waKhishi, na-Abneri, umsa waNeri, naJowabe, umsa waSeruya, kanye nato tonkhe tintfo letatinikelwe tatisesandleni saShelomithi netihlobo takhe.

Imisebenti leminye yemaLevi

²⁹ Etitukulwaneni temaJisihari: Khenaniya nemadvodzana akhe banikwa imisebenti ngephandle kwelithempeli kutsi babhale imilandvo babuye babe behluleli besive sema-Israyeli.

³⁰ Etitukulwaneni tebakaHebroni: boHashabiya kanye netihlobo takhe letatingemadvodza layi-1 700 lanelikhono, bona babekwa kutsi baphatse ema-Israyeli langasenshonalanga neJordane etinkonzweni taSimakadze nasemsebentini wenkhosi.

³¹ KubakaHebroni, Jeriya abengumholi ngekwemlandvo weluhlanga lwekutalana kwemindeni yabo. Ngemnyaka wema-40 wekubusa kwaDavide kwaba neluphenyo emilandvweni, kwaze kwatfolakala bakaHebroni lababengemadvodza lanelikhono eJazeri yaseGileyadi.

³² Jeriya abenetihlobo letatiti-2 700, lekwakungemadvodza labenelikhono abaholi bemindeni, Davide wababeka kutsi baphatse bakaRubeni nebakaGadi kanye nencenye yesive sakaManase, kuyo yonkhe intfo nome indzaba yaNkulunkulu nome nguloko lokwakucondzene nenkhosi.