1 Tikhronike 24 - Siswati 1996 Bible

Umsebenti lomiselwe baphristi

¹ Leti-ke bekuticheme temadvodzana a-Aroni: Emadvodzana a-Aroni bekuboNadabi, na-Abihu, na-Eleyazare, na-Ithamari.

² Kodvwa bo-Abihu naNadabi bafa kucala kuneyise, babesete bantfwana. Bo-Eleyazare-ke na-Ithamari bona basale bakhonta babaphristi.

³ Ngekusitwa boSadoki, umtukulu wa-Eleyazare, na-Ahimeleki, umtukulu wa-Ithamari, Davide wabehlukanisa ticheme ngeticheme entela kutsi basebente ngendlela enkonzweni.

⁴ Linani lelikhulu lebaholi latfolakala kubendlu yaka-Eleyazare kunalabo lababetfolakala ka-Ithamari, behlukaniswa njengemfanelo. Lababetfolakala ka-Eleyazare baholi baba li-16, kwatsi baka-Ithamari baba siphohlongo, tinhloko temindeni letatibatukulu.

⁵ Loku bakwenta ngekungatikhetseli, ngobe babesebentisa inkatho, bekunetindvuna tendzawo lengcwelengcwele, netindvuna taNkulunkulu kuto njalo titukulwane tabo-Eleyazare na-Ithamari.

⁶ Umbhali Shemaya, umsa waNethaneli, umLevi, wababhalisa emabito abo embikwenkhosi netindvuna, naboSadoki, umphristi, na-Ahimeleki, umsa wa-Abiyatha, netinhloko temindeni yebaphristi neyemaLevi, kutsatfwa umndeni munye ka-Eleyazare, kwase kutsatfwa munye ka-Ithamari. Inkatho yahamba kanje:

⁷ Yekucala yadla Jehoyaribi, yesibili yadla Jedaya,

⁸ yesitsatfu yadla Harimi, yesine yadla Seyorimu,

⁹ yesihlanu yadla Malkhiya, yesitfupha yadla Mijamini,

¹⁰ yesikhombisa yadla Hakhosi, yesiphohlongo yadla Abiya,

¹¹ yemfica yadla Jeshuwa, yelishumi yadla Shekhaniya,

¹² yeli-11 yadla Eliyashibi, yeli-12 yadla Jakimu,

¹³ yeli-13 yadla Hupha, yeli-14 yadla Jeshebeyabe,

¹⁴ yeli-15 yadla Bilgayi, yeli-16 yadla Imeri,

¹⁵ yeli-17 yadla Heziri, yeli-18 yadla Haphisesi,

¹⁶ yeli-19 yadla Phethahiya, yema-20 yadla Jehezekeli.

¹⁷ Yema-21 yadla Jakhini, yema-22 yadla Gamuli,

¹⁸ yema-23 yadla Delaya, yema-24 yadla Maziya.

¹⁹ Lamadvodza-ke abhaliswa ngekulandzelana kwekukhonta kwawo lokwakumisiwe, kwetikhatsi tekungena kwawo ethempelini laSimakadze, njengekwemininingwane yemiyalo labekelwa yona nguyisemkhulu Aroni, njengobe Simakadze, Nkulunkulu wema-Israyeli, abeshito kuye.

Lamanye emaLevi

²⁰ Mayelana naletinye tinhloko tetitukulwane temaLevi: Kumadvodzana a-Amramu bekunguShubayeli; kumadvodzana aShubayeli bekunguJedeya.

²¹ Mayelana naRehabiya, kumadvodzana akhe, wekucala bekunguJishiya.

²² KaJisihari bekunguShelomothi; kumadvodzana aShelomothi kwakunguJahathi.

²³ Emadvodzana aHebroni: wekucala kwakunguJeriya, wesibili kwaba ngu-Amariya, wesitsatfu kwaba nguJahaziyeli, wesine kunguJekameyamu.

²⁴ Umsa wa-Uziyeli bekunguMikha, kumadvodzana aMikha kwaba nguShamiri.

²⁵ UmnakaboMikha bekunguJishiya, kumadvodzana aJishiya kwaba nguZakhariya.

²⁶ Emadvodzana aMerari bekuboMahali naMushi. Umsa waJaziya bekunguBeno.

²⁷ Emadvodzana aMerari kusuka kuJaziya bekuboBeno, naShohamu, naZakhuri, na-Ibri.

²⁸ Kusukela kuMahali kwakungu-Eleyazare labete emadvodzana.

²⁹ KaKhishi: umsa waKhishi kwakunguJerameli.

³⁰ Emadvodzana aMushi bekuboMahali, na-Ederi, naJerimothi. Lawa-ke bekungemaLevi njengekwetindlu tawo.

³¹ Benta inkatho nabo njengabomnakabo, batukulu ba-Aroni, ngesikhatsi basembikwenkhosi Davide, naSadoki, na-Ahimeleki, netinhloko temindeni yebaphristi netemaLevi. Imindeni yalabangematubulo yayiphatfwa ngendlela lekwakuphatfwa ngayo botfunjana.