1 Tikhronike 22 - Siswati 1996 Bible

¹ Davide wakhuluma watsi: “Indlu yaSimakadze longuNkulunkulu itakuba lapha, ibe kanye nelilati lemnikelo wekushiswa wema-Israyeli.”

Emalungiselelo ekwakhiwa kwelithempeli

² Davide wase ukhipha simemetelo kutsi akubutfwe bonkhe bekuhamba labebahlala ka-Israyeli, emkhatsini wabo wabeka bacoti bematje kutsi batewucota kahle ematje bawalungiselele kwakha indlu yaNkulunkulu.

³ Waletsa insimbi lenyenti yekutsi kwakhiwe ngayo tipikili tetivalo temasango netako konkhe lokudzinga kubetselwa, waletsa nencumbi yelitfusi lelalingeke likaleke ngebunyenti balo.

⁴ Waletsa futsi naletinyenti tingodvo temisedari, nato tatingenakubalwa, tona-ke tatiletfwe ngemaSidoni nebaseThire kuDavide.

⁵ Davide watsi: “Umsa wami Solomoni usemncane, futsi akakafundzi lutfo lolunyenti. Lendlu letakwakhelwa Simakadze kufanele kube ngubhazabhaza futsi ibe yinhle itewudvuma ibe nelidvumela kuto tonkhe tive. Ngako-ke ngitayentela kahle emalungiselelo ayo.” Davide wenta emalungiselelo lamanyenti alendlu asengakafi.

⁶ Davide wase ubita indvodzana yakhe Solomoni wayitjela kutsi ibokwakha indlu, iyakhele Simakadze longuNkulunkulu wema-Israyeli.

⁷ Davide watsi kuSolomoni: “Msawami, benginesifiso enhlitiyweni yami sekutsi ngakhe indlu, ngiyakhele Libito laSimakadze Nkulunkulu wami.

⁸ Kodvwa kwefika kimi livi laSimakadze, latsi: ‘Wena sewucitse kakhulu ingati, walwa timphi letinyenti. Awukafaneli kutsi wakhe indlu, uyakhele Libito lami, ngobe sewucitse ingati lenyenti emhlabeni embikwami.

⁹ Kodvwa noko utawutala indvodzana letawuba ngumuntfu wekuthula newekuphumula, futsi ngitamnika kuthula kuto tonkhe titsa takhe letibomakhelwane bakhe. Libito lakhe kuyawuba nguSolomoni. Ngiyawunika ema-Israyeli kuthula nenhlalakahle ekubuseni kwakhe.

¹⁰ Nguye-ke loyakwakha indlu, akhele Libito lami. Uyawuba yindvodzana yami, mine ngibe nguyise. Ngiyawumisa kahle umbuso wakhe, ngiwutintise ka-Israyeli kuze kube phakadze.’

¹¹ “Manje-ke, ndvodzana yami, Simakadze akabe nawe ube nemphumelelo, uze wakhe indlu yaSimakadze Nkulunkulu wakho, njengobe atsi utakwenta.

¹² Shangatsi Simakadze angakupha kuhlakanipha kwebudvodza nekucondza kahle tintfo, nase akubeke kutsi ube ngumcondzisi wema-Israyeli, khona utekwati kugcina kahle imitsetfo yaSimakadze Nkulunkulu wakho.

¹³ Ngaloko-ke uyawuphumelela, nawuticaphela wena unakekele tonkhe timiso nemitsetfo yaSimakadze layinike Mosi ngenca yema-Israyeli. Cina ube nesibindzi. Ungesabi, ungaphelelwa ngemandla.

¹⁴ “Kungibite imijuluko leshisako kutsi ngente emalungiselelo ekwakhiwa kwelithempeli laSimakadze, ngicokelele igolide lengemathani langetulu kweti-3 400, nesiliva lengemathani langetulu kweti-34 000. Ngetulu kwaloko kunetincumbi telitfusi kanye netensimbi letingeke tikaleke. Futsi-ke nginetingodvo nematje lasalungiswe kahle, kodvwa-ke kufuneka ukwengete.

¹⁵ Manyenti kakhulu emadvodza lotabe usebenta nawo: Kutaba nalabacota kahle ematje, nalababumba ngematje, nalabababati kanye nalamanyenti nje emadvodza lanebuchwephesha kuto tonkhe tinhlobo temisebenti

¹⁶ yegolide, neyesiliva, neyelitfusi, neyensimbi, kube nebabati longeke ubabale. Manje-ke sale uwucala lomsebenti, Simakadze akabe nawe.”

¹⁷ Davide wase ubita bonkhe baholi bema-Israyeli wabayala kutsi abasitane naSolomoni, umsa wakhe.

¹⁸ Watsi kubo: “Simakadze Nkulunkulu wenu akekho ngakini yini? Akaniniki yini kuthula kuyo yonkhe indzawo? Ubanikele kimi bonkhe labakhile kulelive, lelive liphetfwe nguSimakadze kanye nesive sakhe.

¹⁹ Manje-ke nikelani tinhlitiyo tenu nemiphefumulo yenu ekufuneni Simakadze Nkulunkulu wenu. Calani nyalo nakhe indzawo lengcwele yaSimakadze Nkulunkulu, lapho nitawuletsa khona libhokisi lesivumelwane saSimakadze nato tonkhe tintfo letingcwele letitaNkulunkulu, nitifake tonkhe kulelithempeli lenitabe senilakhile nalakhela Libito laSimakadze.”