1 Tikhronike 20 - Siswati 1996 Bible

Kutfumba kwaDavide iRabha

¹ Kwatsi entfwasahlobo, ngesikhatsi emakhosi laphuma ngaso imphi, Jowabe waphuma nemasotja wayakulwa. Wahlasela live lema-Amoni wendlula wayakuvimbetela iRabha, kodvwa Davide wasala eJerusalema. Jowabe wahlasela iRabha wayehlula, wayibhidlita wayishiya itindzala.

² Davide watsatsa umchele lowawusenhloko yalenkhosi yema-Amoni. Lomchele wawunesisindvo lesasingemakhilogremu labengaba ngema-34 egolide, uhlotjiswe nangematje laligugu, wafakwa enhloko yaDavide. Watsatsa imphango lenyenti kabi kulelo dolobha,

³ nalabantfu bebalapho wabakhipha wabafaka emsebentini lababewenta ngemasaha, nangemapiki ensimbi, nangemazembe. Davide konkhe loko wakwenta kuwo onkhe emadolobha ema-Amoni. Davide nawo onkhe emabutfo akhe base bayancandzeka, babuyela eJerusalema.

Timphi netichwaga temaFilisti

⁴ Kwaphindza futsi kwabhedvuka lenye imphi emkhatsini wemaFilisti nema-Israyeli eGezeri. Ngaleso sikhatsi Sibhekayi, waseHusha, wabulala lesinye sichwaga lekwakutsiwa nguSiphayi, lomunye webatukulu baRefa; ngako emaFilisti entiwa aba tisebenti tema-Israyeli.

⁵ Kwaba nalenye futsi imphi nemaFilisti, lapho Eli Hanani, umsa waJayire, abulala khona Lami, umnakaboGoliyathi, waseGathi, labenesikhali lesasinelutsi lolwalungangelipulango lembongolo yemeluki.

⁶ Kwaphindza futsi kwaba nalenye imphi eGathi. Lapho-ke bekunalesinye sichwaga lesidze lesasinemino lesitfupha sandla sisinye netintwane letisitfupha lunyawo lulunye, kungema-24 sekukonkhe. Naso bekungumtukulu waRefa.

⁷ Watsi nakedzelela ema-Israyeli, Jonathani, umsa waShimeya, umnakaboDavide, wamsukela wambulala.

⁸ Labo-ke babeyintalelwane yaRefa waseGathi. Bafa babulawa nguDavide nemadvodza akakhe.