1 Tikhronike 18 - Siswati 1996 Bible

Kuncoba kwaDavide

¹ Kwatsi emvakwaloko, Davide wahlasela emaFilisti wawehlula, wawemuka emandla ekutibusa eveni, watfumba iGathi kanye nemiti yayo leyayiyitungeletile, wayikhipha ekubusweni ngemaFilisti.

² Davide wachubeka wahlasela nemaMowabi, wawehlula. Ngako emaMowabi ase aba ngaphansi kwakhe, aletsa imitselo yawo kuDavide.

³ Ngetulu kwaloko Davide wahlasela, wehlula Hadadezeri, inkhosi yaseSobha, waze wayakufika eHamathi, ngaleso sikhatsi Hadadezeri abecondze kubusa lonkhe lelo live langasemfuleni iYufrathe.

⁴ Davide watfumba inkhulungwane yetincola takhe temphi, nebashayeli betincola temphi labati-7 000, nemasotja lahamba ngetinyawo lati-20 000. Onkhe emahhashi wawageca imisipha, washiya emahhashi etincola letatilikhulu.

⁵ Atsi ayeta emaSiriya aseDamaseko, atsi etekwelekelela Hadadezeri, inkhosi yaseSobha, Davide wabulala aba ti-22 000 kuwo,

⁶ Davide wase umisa tinkambu temabutfo embusweni wemaSiriya eDamaseko. EmaSiriya ase aba bantfu baDavide, atsela kuye. Simakadze wapha Davide kuncoba nome ngukuphi lapho ahlasela khona.

⁷ Davide watsatsa lamahawu egolide labengewetindvuna taHadadezeri, wahamba nawo wawayisa eJerusalema.

⁸ Davide watitsatsela incumbi yelitfusi edolobheni laseThebha nelaseKhuni, emadolobha labebuswa nguHadadezeri. Lelitfusi lasetjentiswa nguSolomoni ekwakheni libhavu lelitfusi, netinsika kanye naletinye tintfo letatentiwa ngelitfusi.

⁹ Kwatsi kube Thoyi, inkhosi yaseHamathi, eve kutsi Davide ubhubhise yonkhe imphi yakaHadadezeri, inkhosi yaseSobha,

¹⁰ wase utfumela indvodzana yakhe, Hadoramu, kuDavide, inkhosi, kutsi iyekumbingelela iphindze imhalalisele ngekuncoba kwakhe emphini yabo naHadadezeri. Hadadezeri abeke walwa naThoyi. Hadoramu waphatsela Davide tonkhe tintfo letinhle tegolide, netesiliva, netelitfusi.

¹¹ Inkhosi Davide letintfo yatinikela kuSimakadze, njengobe beyentile nangaleti tesiliva, nangetegolide letatiphuma kuto tonkhe letive beyitincobile yatitfumba: ema-Edomu, nemaMowabi, nema-Amoni, nemaFilisti kanye nema-Amaleki.

¹² Abishayi, umsa waSeruya, wabulala ema-Edomu labeti-18 000 eSigodzini Seluswayi.

¹³ Wase umisa tinkambu temasotja kulaka-Edomu. Onkhe ema-Edomu ase aba ngaphansi kwaDavide. Simakadze wapha Davide kuncoba nome ngukuphi lapho ahlasela khona.

Tindvuna taDavide

¹⁴ Davide walibusa lonkhe lema-Israyeli, enta loko lokulungile kubo bonkhe bantfu bakhe.

¹⁵ Jowabe, umsa waSeruya, abengumphatsi wemphi; Jehoshafati, umsa wa-Ahiludi, abengulobhalisako;

¹⁶ boSadoki, umsa wa-Ahitubi, kanye na-Ahimeleki, umsa wa-Abiyatha, bona babebaphristi, Shavsha yena angumabhalane.

¹⁷ Bhenaya, umsa waJehoyada, abephetse emaKherethi nemaPhelethi; emadvodzana aDavide wona abebeluleki lababesingatsa inkhosi.