1 Tikhronike 16 - Siswati 1996 Bible

¹ Libhokisi lesivumelwane saNkulunkulu baliletsa balibeka ekhatsi ethendeni Davide labelakhele lona, base banikela ngeminikelo yekushiswa nangeminikelo yebudlelwane kuNkulunkulu.

² Watsi kube Davide acedze kwenta iminikelo yekushiswa neminikelo yebudlelwane, wabe sewubusisa bonkhe bantfu egameni laSimakadze.

³ Wesuka lapho wanika wonkhe longum-Israyeli, lomdvuna nalomsikati, sinkhwa nelicebelengwane lemasundvu, nelicebelengwane lemagelebisi lomisiwe.

⁴ Wakhetsa labanye bemaLevi kutsi bakhonte embikwelibhokisi lesivumelwane saSimakadze, bancuse, babonge babuye badvumise Simakadze Nkulunkulu wema-Israyeli:

⁵ Asafa abengumholi wabo lomkhulu, wesibili kunguZakhariya, bese kuba boJeyiyeli, naShemiramothi, naJehiyeli, naMathithiya, na-Eliyabe, naBhenaya, na-Obedi Edomu kanye naJeyiyeli. Bekufanele badlale emalire nemahabhu, bese kutsi Asafa adlale emasimbali.

⁶ BoBhenaya naJahaziyeli labebabaphristi bona babefanele bashaye emacilongo njalo nje ngetikhatsi letitsite embikwelibhokisi lesivumelwane saNkulunkulu.

Ingoma yekudvumisa

⁷ Ngalelo langa Davide wacala kunika Asafa kanye nalawa lamanye emaLevi kutsi ahlabele lengoma yekudvumisa kuSimakadze, letsi:

⁸ “Bongani Simakadze, nibite libito lakhe, nimemetele tento takhe emkhatsini wetive.

⁹ Hlabelani kuye, nimdvumise, nibalise ngetimangaliso takhe tonkhe.

¹⁰ Tibongeni ngeLibito lakhe lelingcwele, atijabule tinhlitiyo talabafuna Simakadze.

¹¹ Funani Simakadze longemandla enu, nifunisise buso bakhe onkhe emalanga.

¹² Khumbulani timanga takhe latentile, nikhumbule netimangaliso takhe, kanye netehlulelo temlomo wakhe,

¹³ nine titukulwane ta-Israyeli, inceku yakhe, nine madvodzana aJakobe, labakhetsiwe bakhe.

¹⁴ “Yena Simakadze unguNkulunkulu wetfu, tehlulelo takhe tisemhlabeni wonkhe.

¹⁵ Uyasikhumbula sivumelwane sakhe phakadze naphakadze, livi layala ngalo uyalikhumbula titukulwane ngetitukulwane.

¹⁶ Sivumelwane lasenta na-Abrahama, sifungo sakhe ku-Isaka,

¹⁷ wasicinisa kuJakobe, saba ngumtsetfo, ku-Israyeli saba sivumelwane saphakadze.

¹⁸ Watsi: ‘Wena ngiyakupha live laseKhenani leliyawuba sabelo lesilifa lakho.’

¹⁹ “Babesembalwa ngesibalo, yebo, babeseyingcosana, futsi batihambi kulelo live.

²⁰ Bazula bandzindza etiveni ngetive, besuka kulomunye umbuso beye kulomunye.

²¹ Kodvwa akavumelanga muntfu kutsi abacindzetele, ngenca yabo wajezisa ngisho emakhosi.

²² Watsi: ‘Ningabatsintsi labagcotjiwe bami, ningacali nilimate baphrofethi bami.’

²³ “Hlabelani kuSimakadze, mhlaba wonkhe, memetelani insindziso yakhe imihla ngemihla.

²⁴ Vakalisani bukhosi bakhe etiveni, tento takhe letimangalisako nitimemetele etiveni tonkhe.

²⁵ Ngobe mkhulu Simakadze, ufanele kudvunyiswa kakhulu, ufanele kwesatjwa kunabo bonkhe bonkulunkulu.

²⁶ Ngobe bonkhe bonkulunkulu betive batithico, kodvwa nguSimakadze lowenta emazulu.

²⁷ Ludvumo nebukhosi kusembikwakhe, emandla nenjabulo kusendlini yakhe lengcwele.

²⁸ “Nikani Simakadze, nine mindeni yetive, nikani Simakadze ludvumo nemandla.

²⁹ Nikani Simakadze ludvumo lolufanele libito lakhe, ngenani embikwakhe, niletse kuye umnikelo. Khotsamani nikhuleke kuSimakadze, lowembetse bungcwele bakhe.

³⁰ “Tfutfumelani embikwakhe, mhlaba wonkhe! Yebo, umhlaba usinyisiwe, ungeke utanyatanyiswe.

³¹ Jabulani mazulu, tsakasa nawe mhlaba, tjelani tive nitsi: ‘Simakadze uyabusa!’

³² Akubhodle lwandle nako konkhe lokukulo. Emadlelo akajabule nako konkhe lokukuwo.

³³ Tihlahla telihlatsi tiyakuhlabela, tiyakuhlatjeliswa yinjabulo embikwaSimakadze, ngobe yena uyeta kutakwehlulela umhlaba.

³⁴ “Bongani Simakadze, ngobe ulungile, nemusa wakhe ume kuze kube phakadze.

³⁵ Khalani kuye nitsi: ‘Sisindzise, Nkulunkulu longuMsindzisi wetfu, sibutse usikhulule etiveni, kuze sibonge Libito lakho lelingcwele, kuze sigungubale ngeludvumo lwakho.’

³⁶ Akabongwe Simakadze, Nkulunkulu wema-Israyeli, kusukela phakadze kuze kube phakadze!” Sonkhe sive satsi: “Amen!” sadvumisa Simakadze.

Kukhonta Nkulunkulu eJerusalema naseGibeyoni

³⁷ Davide wesuka washiya Asafa kanye nebangani bakhe embikwelibhokisi lesivumelwane saSimakadze, kutsi atewukhonta njalonjalo njengekwesidzingo salelo nalelo langa.

³⁸ Waphindze washiya bo-Obedi Edomu kanye nalamadvodza labengema-68 labebambisene nawo ekukhonteni. Bo-Obedi Edomu, umsa waJeduthuni, naHosa babebomahlalesangweni.

³⁹ Davide washiya Sadoki, umphristi, kanye nebaphristi labenabo embikwelithende laSimakadze endzaweni lephakeme eGibeyoni,

⁴⁰ kutsi ayekwetfula umnikelo wekushiswa kuSimakadze elatini lemnikelo wekushiswa, njalo nje ekuseni nasentsambama ngekulandzela konkhe lokubhalwe emtsetfweni Simakadze lawunika ema-Israyeli.

⁴¹ Lababenabo bekuboHemani, naJeduthuni kanye nalabanye lababekhetsiwe ngemabito abo bakhetselwe umsebenti wekubonga Simakadze, batsi: “Ngobe umusa wakhe ume kuze kube phakadze.”

⁴² BoHemani naJeduthuni bona umsebenti wabo bekukushaya emacilongo, nemasimbali kanye nekudlala letinye tingubhu tekuhlabela ingoma lengcwele yekudvumisa. Emadvodzana aJeduthuni wona abema esangweni.

⁴³ Ngako bonkhe bahamba, ngulowo nalowo waya ekhaya lakhe, naDavide wabuyela ekhaya lakhe kutsi ayekubusisa umndeni wakhe.