1 Tikhronike 15 - Siswati 1996 Bible

Emalungiselelo ekuletfwa kwelibhokisi lesivumelwane eJerusalema

¹ Emvakwekuba Davide asatakhele tindlu takhe eDolobheni laDavide, wabe sewulungisa indzawo yekubeka libhokisi lesivumelwane saNkulunkulu, wadzimate wemisa lithende lekulifaka ekhatsi.

² Davide wakhuluma watsi: “Kute nome munye ngaphandle kwemaLevi lekufanele etfwale libhokisi lesivumelwane saNkulunkulu, ngobe ngawo lakhetfwa nguSimakadze kutsi amkhonte ngaleyo nkonzo phakadze naphakadze.”

³ Davide wahlanganisa onkhe ema-Israyeli eJerusalema kutsi aletse lelibhokisi lesivumelwane saSimakadze kulendzawo labesayilungiselele lona.

⁴ Wabita wahlanganisa titukulwane taka-Aroni kanye nemaLevi:

⁵ Lababetitukulwane takaKhohati, bekungu-Uriyeli, umholi, netihlobo letatili-120.

⁶ Lababetitukulwane takaMerari, bekungu-Asaya, umholi, netihlobo letatingema-220.

⁷ Lababetitukulwane takaGeshoni, bekunguJoweli, umholi, netihlobo letatili-130.

⁸ Lababetitukulwane taka-Elisafani, bekunguShemaya, umholi, netihlobo letatingema-200.

⁹ Lababetitukulwane takaHebroni, bekungu-Eliyeli, umholi, netihlobo letatingema-80.

¹⁰ Lababetitukulwane taka-Uziyeli, bekungu-Aminadabi, umholi, netihlobo letatili-112.

¹¹ Davide wabita Sadoki na-Abiyatha, baphristi, nemaLevi: Bo-Uriyeli, na-Asaya, naJoweli, naShemaya, na-Eliyeli, na-Aminadabi.

¹² Wakhuluma kubo watsi: “Nine nibaholi bemindeni yemaLevi. Ngini nalamanye emaLevi lekufanele nitihlambulule nibe ngcwele, bese niletsa lelibhokisi lesivumelwane saSimakadze, Nkulunkulu wema-Israyeli, nilimikise kulendzawo lesengiyilungiselele lona.

¹³ Kungobe nine, maLevi, anilenyusanga kwekucala, ngako-ke Simakadze wasitfukutselela ngaleso sikhatsi. Asizange sike sibute kuSimakadze kutsi singakwenta kanjani njengobe kubhaliwe.”

¹⁴ Baphristi nemaLevi batihlambulula kutsi batekwenyusa libhokisi lesivumelwane saSimakadze, Nkulunkulu wema-Israyeli.

¹⁵ EmaLevi etfwala lelibhokisi lesivumelwane ngetimboko emahlombe awo, njengobe Mosi abekhulumile ngekwemyalo waSimakadze.

¹⁶ Davide watjela baholi bemaLevi kutsi bakhetse bantfu nebahlabeli kutsi batewuhlabela tingoma tekujabula, baphekeletelwa ngimintjingozi: emalire, nemahabhu kanye nemasimbali.

¹⁷ Ngako emaLevi akhetsa boHemani, umsa waJoweli; kubomnakabo akhetsa Asafa, umsa waBherekhiya; kubomnakabo emaMerari akhetsa Ethani, umsa waKhushaya;

¹⁸ kwatsi emvakwabo kwalandzela bomnakabo: boZakhariya, naJaziyeli, naShemiramothi, naJehiyeli, na-Uni, na-Eliyabe, naBhenaya, naMaseya, naMathithiya, na-Elifelehu, naMikneya, na-Obedi Edomu kanye naJeyiyeli, bomahlalesangweni.

¹⁹ Bahlabeli boHemani, na-Asafa kanye na-Ethani bakhetselwa kudlala emasimbali elitfusi.

²⁰ BoZakhariya na-Aziyeli, naShemiramothi, naJehiyeli, na-Uni, na-Eliyabe, naMaseya kanye naBhenaya bona bakhetfwa kutsi babe bahlabeli bekudlala emalire ngekwe-alamothi,

²¹ kantsi boMathithiya, na-Elifelehu, naMikneya, na-Obedi Edomu, naJeyiyeli kanye na-Azaziya bakhetfwa kutsi bona babe bahlabeli bekudlala emahabhu ngekwesishiminithi.

²² Khenaniya, inhloko yemaLevi, wakhetselwa kutsi engamele lenkonzo yekuhlabela; leyo bekuyinkonzo yakhe, ngobe abenelikhono kulowo msebenti.

²³ BoBherekhiya na-Elkhana bona bakhetselwa kutsi babe bomahlalesangweni belibhokisi lesivumelwane.

²⁴ BoShebaniya, naJosafati, naNethaneli, na-Amasayi, naZakhariya, naBhenaya kanye na-Eliyezeri bona bekubaphristi lekwakufanele bashaye emacilongo embikwelibhokisi lesivumelwane saNkulunkulu. Bo-Obedi Edomu naJehiya nabo bakhetselwa kutsi babe bomahlalesangweni belibhokisi lesivumelwane.

Kumikiswa kwelibhokisi lesivumelwane eJerusalema

²⁵ Ngako Davide, nebaholi bema-Israyeli, netindvuna tetinkhulungwane bahamba bayawutsatsa libhokisi lesivumelwane saSimakadze endlini ya-Obedi Edomu ngekujabula.

²⁶ Njengobe Nkulunkulu abesasite emaLevi labetfwele libhokisi lesivumelwane saSimakadze, kwahlatjwa tinkunzi letisikhombisa netihhanca letisikhombisa, tentiwa umhlatjelo.

²⁷ Davide abembetse umjiva lowawentiwe ngelineni lecolisakele, njengawo onkhe lamaLevi labetfwele libhokisi lesivumelwane saSimakadze, nanjengalabo bahlabeli, naKhenaniya labengamele lawo makwaya ekuhlabela; Davide abembetse nesidziya selineni.

²⁸ Ngako onkhe ema-Israyeli enyuka nelibhokisi lesivumelwane saSimakadze amemeta, ashaya timphondvo tetihhanca, nemacilongo, nemasimbali, ashaya ngisho nemalire nemahabhu.

²⁹ Latsi libhokisi lesivumelwane saSimakadze nalingena eDolobheni laDavide, Mikhali, indvodzakati yaSawula, wabukela avele ngelifasitelo. Watsi nakabona Davide, inkhosi, agidza agubha, wamedzelela enhlitiyweni yakhe.