1 Tikhronike 11 - Siswati 1996 Bible

Kubekwa kwaDavide kuba yinkhosi

¹ Tonkhe tive taka-Israyeli teta kuDavide eHebroni, tafike tatsi: “Tsine siyinyama yakho nengati yakho.

² Kadzeni, ngesikhatsi Sawula ayinkhosi, nguwe lowawuhola sive sema-Israyeli nasiyawulwa timphi. Simakadze Nkulunkulu wakho wakhuluma kuwe, watsi: ‘Wena utawuba ngumelusi wesive sami, ema-Israyeli, ube ngumbusi waso.’ ”

³ Batsi kube befike bonkhe baholi bema-Israyeli enkhosini Davide eHebroni, wenta nabo sivumelwane eHebroni embikwaSimakadze; base bagcoba Davide kutsi abe yinkhosi yema-Israyeli, njengobe Simakadze abetsembisile ngaSamuweli.

Kwehlulwa kweJerusalema nguDavide

⁴ Davide nesive sonkhe sema-Israyeli bashuca bacondza eJerusalema, lekwakuyiJebhusi. EmaJebhusi labehlala lapho

⁵ akhuluma kuDavide atsi: “Ungeke ungenise lapha.” Noko, Davide wayitfumba inqaba yaseSiyoni, Lidolobha laDavide.

⁶ Davide abekhulume watsi: “Lowo lotawuba wekucala kuhlasela emaJebhusi utawuba yindvuna.” Jowabe, umsa waSeruya, wenyuka kucala, ngako wavele waba yindvuna.

⁷ Davide wangena wahlala kuleyo nqaba, ngako yabitwa ngekutsi Lidolobha laDavide.

⁸ Lelidolobha walakha watungeleta lenqaba, kusukela etibebesini tekwentiwa kuye kulolubondza lolutungeletile; loko kwenteka ngesikhatsi Jowabe asabuyisela lelo dolobha esimeni salo.

⁹ Davide wachubeka waba nemandla kakhulu, ngobe Simakadze Somandla abenaye.

Tingwazi taDavide letatidvumile

¹⁰ Leti tinhloko tetingwazi taDavide letatidvumile, tona kanye nesive sonkhe sema-Israyeli, tabusekela kakhulu bukhosi bakhe, tabenta bandza nalo lonkhe live, njengobe Simakadze abetsembisile.

¹¹ Lolu luhla lwetingwazi taDavide letatidvumile: wekucala kwakungu-Jashobeyamu, umHakhamoni, labeyindvuna yaLabatsatfu. Yena-ke wagwaza ngesikhali sakhe emadvodza langema-300, wawabulala onkhe emphini yinye.

¹² Wesibili kwakungu-Eleyazare, umsa waDodo, welusendvo lwaka-Ahohi, labengulomunye waletingwazi letintsatfu.

¹³ AbenaDavide ePhasi Damimu ngesikhatsi emaFilisti ahlanganele khona kulwa imphi. Endzaweni lapho bekunensimi leyayigcwele ibhali, emabutfo ema-Israyeli awabalekela lamaFilisti.

¹⁴ Kodvwa ema endzaweni yawo ekhatsi nekhatsi nensimi. Ayivikela, abulala lamaFilisti, Simakadze wanika ema-Israyeli kuncoba lokukhulu.

¹⁵ Ngalelinye lilanga tingwazi letintsatfu kuleti letatingema-30 tehlela kuDavide edvwaleni lemgedze wase-Adulamu, emaFilisti asakambe eSigodzini semaRefa.

¹⁶ Ngaleso sikhatsi Davide abesekhatsi enqabeni, kantsi libutfo lemaFilisti lona laliseBhetlehema.

¹⁷ Davide wativela asomile, wase utsi: “Awu! Kube mane kungaba khona longangikhelela emanti ekunatsa; ngomele emanti asemtfonjeni longasesangweni laseBhetlehema!”

¹⁸ Ngako letingwazi letintsatfu tesuka lapho tabhidla ticheme temabutfo emaFilisti ngenkhani taphumela ngale, taze tefika emtfonjeni longasesangweni laseBhetlehema, takha emanti, tabuya nawo kuDavide. Kodvwa Davide wala kuwanatsa lamanti, esikhundleni saloko wawatfululela embikwaSimakadze.

¹⁹ Davide watsi: “Nkulunkulu akangavumi kutsi ngikwente loku! Kufanele yini kutsi nginatse ingati yalamadvodza latilahle ematsambo ngemphilo yawo?” Njengobe abetilahle ematsambo ngemphilo yawo ngekumkhelela lamanti, Davide akazange awanatse. Nguleto-ke tento taletingwazi letintsatfu.

²⁰ Abishayi, umnakaboJowabe, abengumholi walaba labangema-30. Wagwaza ngesikhali sakhe, alwa nemadvodza langema-300, wawabulala onkhe, waze wadvuma kakhulu njengaletingwazi letingema-30,

²¹ yena wadvunyiswa ngalokuphindvwe kwendlula leti letingema-30, waze wabekwa waba yindvuna yato, lite nome yena abengakabalwa nalaba Labatsatfu.

²² Bhenaya, umsa waJehoyada, waseKhabsiyeli, naye abengulomunye wetingwazi letatatiwa. Wenta tigemegeme letinyenti naye, njengekubulala kwakhe tingwazi letimbili letatatiwa takaMowabi. Wake wehlela phansi emgodzini ngalelinye lilanga kunangcocwane, wafike wabulala libhubesi.

²³ Wabulala sichwaga lesikhulu saseGibhithe lesasingemamitha labengaba mabili nemasentimitha langema-30 budze. Nome lomGibhithe abephetse sikhali lesasingangelipulango lembongolo yemeluki esandleni sakhe, Bhenaya yena wamsukela aphetse simunya. Wahlutfula lesikhali esandleni salomGibhithe, wambulala ngaso lesikhali sakhe.

²⁴ Lobo kwaba buchawe baBhenaya, umsa waJehoyada. Naye wadvuma njengalaba labatsatfu labebatiwa kakhulu.

²⁵ Abehlonishwa kakhulu kunato tonkhe letingwazi letatingema-30, kodvwa yena akabalwanga kanye nalaba Labatsatfu. Davide wamenta indvuna yaleti letatisingatsa yena.

²⁶ Letingwazi bekunguleti: Asaheli, umnakaboJowabe, na-Eli Hanani, umsa waDodo, waseBhetlehema,

²⁷ naboShama waseHarodi, aHelesi wasePhelethi,

²⁸ na-Ira, umsa wa-Ikheshi, waseThekhowa, na-Abiyezeri wase-Anathothi,

²⁹ naSibhekayi waseHusha, na-Ilayi waka-Ahohi,

³⁰ naMaharayi waseNethofa, naHeledi, umsa waBhana, waseNethofa,

³¹ na-Ithayi, umsa waRibayi, waseGibeya kulakaBhenjamini, naBhenaya wasePhirathoni,

³² naHurayi wasetihosheni taseGashi, na-Abiyalboni wase-Abha,

³³ na-Azmavethi waseBhahurimu, na-Eliyaba waseShalbimu,

³⁴ nemadvodzana aHashemu waseGizoni, naJonathani, umsa waShage, waseHarari,

³⁵ na-Ahiyamu, umsa waSakhari, waseHarari, na-Elifali, umsa wa-Ure,

³⁶ naHeferi waseMekhera, na-Ahiya wasePhelethi,

³⁷ naHesro waseKhameli, naNarayi, umsa wa-Ezbayi,

³⁸ naJoweli, umnakaboNathani, naMibhari, umsa waHagri,

³⁹ naSeleki, waka-Amoni, naNaharayi waseBherothi, labeludzibi lwaJowabe, umsa waSeruya,

⁴⁰ na-Ira waseJetheri, naGarebi waseJetheri,

⁴¹ na-Uriya, umHethi, naZabadi, umsa wa-Ahilayi,

⁴² na-Adina, umsa waShiza, wakaRubeni, labesikhulu sebakaRubeni, akanye nalabangema-30,

⁴³ naHanana, umsa waMakha, naJosafati, waseMitheni,

⁴⁴ a-Uziya wase-Ashtarothe, naboShama, naJeyiyeli, emadvodzana aHothami, wase-Aroyeri,

⁴⁵ naJediyayeli, umsa waShimri, nemnakabo longuJoha, waseThisi,

⁴⁶ na-Eliyeli, waseMahavi, naboJeribayi naJoshaviya, emadvodzana a-Elnamu, na-Jithma, wakaMowabi,

⁴⁷ nabo-Eliyeli, na-Obedi kanye naJasiyeli waseSobha.